Փաստ ինֆո

Սահմանադրական բարեփոխումների հանձնաժողովի հայեցակարգում արձանագրվում է, որ Հայաստանը կանգնած  է լուրջ ընտրության առջև՝ քաղաքական համաձայնությամբ ու բարեփոխումների միջոցով երաշխավորել երկրի կայուն զարգացումը կամ գնալ նախկին ԽՍՀՄ որոշ երկրների ճանապարհով՝ իրականացնել գունավոր հեղափոխություն՝ լրջորեն վտանգված հեռանկարով:

Այս մասին Ազգային ժողովի հայտարարությունների ժամին այսօր հայտարարեց ՀՅԴ խմբակցության անդամ Արծվիկ Մինասյանը՝ ընդգծելով, որ այս հաստատումները, կարծես թե, պետք է բավարար լինեին, որ սահմանադրական փոփոխություններին դեմ հանդես եկողների մի մասը գոնե փորձեր կարդալ սա:

«Նրանք, ովքեր կարդացել են, սակայն հետևողականորեն չեն հավատում, անկեղծորեն կարող եմ հասկանալ, և հրավիրում ենք հենց դրա համար քննարկումների, որպեսզի ձևավորենք այն առաջարկները, այն փաթեթը, որ ավելի վստահություն կներշնչի: Նրանք, ովքեր հետևողականորեն կարդացել են, բայց ստում են, չեն ուզում տեսնել այդ ամենը, նրանց, կարծում եմ, ընտրությունը մեկն է՝ կամ դուրս գալ փողոց և իշխանափոխություն անել՝ ըստ իրենց պատկերացման, անձնափոխության միջոցով, ինչը, կարծում եմ, որևէ մեկը իրենց չի խանգարում, և թող չփորձեն գտնել մեղավորներ ընդդիմադիր դաշտում:

Կամ երրորդ խումբը կա, որը հետևողականորեն չի ուզում կարդալ այս ամենը: Նրանք, ովքեր որ չեն կարդում և հպարտությամբ էլ ասում են, որ չեն էլ պատրաստվում կարդալ, լուսահոգի Վլադիմիր Նազարյանը գեղեցիկ խոսք ուներ. ասում էր՝ մտածում եք, որ կարդաք, կարող է հանկարծ ձեր ուղեղը աշխատի և հանկարծ բթության կուսությունը վնասվի»,-ասաց Ա.Մինասյանը՝ խորհուրդ տալով գործընկերներին սահմանադրական փոփոխությունների անհրաժեշտության հարցում ոչ թե փորձել հակառակվել, այլ մտնել քննարկումների դաշտ, ձևավորել այնպիսի պահանջ, որը թույլ չի տա երկրում դիկտատուրական համակարգի հաստատումը:

ԱԺ հայտարարությունների ժամին սահմանադրական փոփոխությունների անհրաժեշտությանն անդրադարձավ նաև ՀՅԴ խմբակցության ղեկավար Արմեն Ռուստամյանը՝ մասնավորապես հայտարարելով, որ «եթե ոմանց թվում է, որ Սերժ Սարգսյանը փոխվեց ու ինքնստինքյան իշխանությունն էլ է փոխվելու, ուրեմն` նրանք լավ չեն ուսումնասիրել մեր անցած ճանապարհը»:

Ըստ նրա՝ «իրական իշխանափոխությունը երբեք չի կարող անձափոխությամբ սահմանափակվել և պետք է զուգորդվի համապատասխան համակարգային փոփոխությամբ»:

«Միջազգային փորձը աչքի առաջ ունենալով` անգրագիտություն կամ կանխամտածված վնասարարություն է պետականության կայացման գործում արհամարհել կամ նսեմացնել սահմանադրական զարգացումների անհրաժեշտությունը»,- հայտարարեց Ա.Ռուստամյանը՝ հավելելով, որ սահմանադրական զարգացումների ճանապարհով է աշխարհը զարգանում:

«Սա չընկալելը ավելի դիպուկ, քան աշուղ Ջիվանին է բնորոշել,  դժվար է ասել: Ասում է մարդը. «Աշխարհից կտրված անգետի համար գետի քարն էլ մեկ է, գոհարն էլ մեկ է»»,- ընդգծեց Ա.Ռուստամյանը:

Հիշեցնենք, որ ոչ իշխանական քառյակից ՀՅԴ-ի դուրս գալը հիմնականում պայմանավորված էր սահմանադրական փոփոխությունների անհրաժեշտության հարցում մյուս երեք ուժերի՝ «Բարգավաճ Հայաստան»-ի, «Հայ ազգային կոնգրես»-ի և «Ժառանգության», հետ ունեցած տարաձայնություններով: