Փաստ ինֆո

Եվրոպական ակադեմիայի ուսանող Աշոտ Նիկոյանը մեղավոր է ճանաչվել ՀՀ քրեական օրենսգրքի 116-րդ հոդվածի 2-րդ մասով՝ մեկ ուրիշին ծանր վնաս պատճառելն անհրաժեշտ պաշտպանության սահմանազանցմամբ, և դատապարտվել ազատազրկման՝ 1 տարի ժամկետով:

Նշանակված պատժին հաշվակցվել է Աշոտ Նիկոյանին 2013 թվականի ապրիլի 23-ից մինչև 2013 թվականի ապրիլի 26-ը կալանքի տակ պահելու ժամկետը և նրա նկատմամբ վերջնական պատիժ է նշանակվել ազատազրկում՝ 11 ամիս 27  օր ժամկետով:

Նախաքննության մարմնի կողմից ամբաստանյալին մեղադրանք էր առաջադրվել ՀՀ քրեական օրենսգրքի 112-րդ հոդվածի 1-ին մասով՝ դիտավորությամբ առողջությանը ծանր վնաս պատճառելը: Դատարանը, սակայն, վերլուծելով ամբաստանյալ Ա.Նիկոյանին առաջադրված մեղադրանքը, ամբաստանյալի, տուժողի, վկաների ցուցմունքները և համակցության մեջ գնահատելով դատաքննությամբ հետազոտված ապացույցները, գտել է, որ արարքի իրավաբանական որակումը նախնական քննության մարմնի կողմից ճիշտ չի կատարվել, և արարքը պետք է վերաորակել:

Ամբաստանյալ Աշոտ Նիկոյանը ցուցմունք է տվել այն մասին, որ իր և Նաիրի Գրիգորյանի կողմնակիցների միջև տեղի ունեցած կռվի ու ծեծկռտուքի ընթացքում հակառակորդ կողմի հարվածներից վայր ընկնելուց հետո բարձրանալիս նրանցից մեկի ձեռքում տեսել է դեպի իրեն եկող դանակ, խլել է այդ դանակը /որի ընթացքում վնասվել է նրա ձախ ձեռքի միջնամատը/: Այնուհետև, իր ուղղությամբ տեղացող բազմաթիվ հարվածներից պաշտպանվելու նպատակով այդ նույն դանակն անկանոն թափահարել է, որի ընթացքում տուժող Վիգեն Սահակյանի առողջությանը պատճառվել է ծանր վնաս: Համանման ցուցմունք են տվել նաև ամբաստանյալի ընկեր Վիգեն Շահբազյանը և ամբաստանյալի հայր Հակոբ Նիկոյանը, որոնց այդ մասին դեպքից հետո պատմել է ամբաստանյալը:

Դատարանը, գնահատելով ամբաստանյալի, վկաներ Վիգեն Շահբազյանի և Հակոբ Նիկոյանի նշված ցուցմունքներն այն մասին, որ դանակն ամբաստանյալը կռվի ընթացքում հակառակորդ կողմի մասնակիցներից մեկի ձեռքից է խլել, դրանք արժանահավատ չի համարում, քանի որ այդ հանգամանքը չի հաստատվում քրեական գործով ձեռքբերված մյուս ապացույցներով:

Դատարանը հաստատված է համարել, որ Աշոտ Նիկոյանի և Նաիրի Գրիգորյանի կողմից նույն համալսարանում սովորող Ռիմա Ասատրյանին սիրահետելու կապակցությամբ 2013 թվականի ապրիլի 23-ին, Երևան քաղաքի Սուրենյանց փողոցում վեճ, ապա նաև կռիվ է տեղի ունեցել՝ մի կողմից ամբաստանյալ Աշոտ Նիկոյանի ու նրա ընկերոջ Վիգեն Շահբազյանի, մյուս կողմից՝ Նաիրի Գրիգորյանի ու նրա կողմնակիցների /ավելի քան 10 հոգի/ միջև:

Այդ ընթացքում Նաիրի Գրիգորյանը բռունցքով հարվածել է Աշոտ Նիկոյանի դեմքին, որից վերջինս վայր է ընկել: Ն.Գրիգորյանի կողմնակիցները ոտքերով ու քարերով բազմաթիվ հարվածներ են հասցրել գետին ընկած վիճակում գտնվող Աշոտ Նիկոյանին:

Վերջինս կարողացել է ընկած տեղից բարձրանալ և դեռևս կիսածնկած վիճակում իր մոտ գտնվող դանակով սկսել է անկանոն հարվածներ հասցնել տարբեր ուղղություններով: Դանակի այդ հարվածներից մեկը դիպել է տուժող Վիգեն Սահակյանի թիկունքի շրջանին և նրան պատճառվել է ծանր մարմնական վնասվածք:

Կռվի ընթացքում գլխի, ծոծրակային մասի, պարանոցի, նախաբազկի, արմնկահոդի, դաստակների ֆալանգների շրջանում սալջարդ վերքերի և քերծվածների ձևով մարմնական վնասվածքներ է ստացել նաև ամբաստանյալ Նիկոյանը: Վերջինս ստացել է նաև ձախ դաստակի 3-րդ ֆալանգի կտրած վերք:

Դատարանը հաստատված է համարել  այն փաստական հանգամանքը, որ ամբաստանյալ Աշոտ Նիկոյանը և նրա ընկերը Վիգեն Շահբազյանը մի կողմից, Նաիրի Գրիգորյանը և նրա կողմնակիցները /ավելի քան 10 հոգի/ մյուս կողմից կռվել են միմյանց հետ:

Այդ ընթացքում ամբաստանյալը, դեմքին ստանալով Նաիրի Գրիգորյանի բռունցքի հարվածը, տապալվել է գետին: Ընկած վիճակում ամբաստանյալի գլխին և մարմնի այլ մասերին ոտքերով ու քարերով հարվածներ են հասցրել Ն. Գրիգորյանի կողմանկիցները: Ա.Նիկոյանը, ձեռքերով պաշտպանվելով հարվածներից, կարողացել է բարձրանալ ընկած տեղից և կիսածնկած վիճակում, իր մոտ գտնվող դանակով սկսել է տարբեր ուղղություններով անկանոն հարվածներ հասցնել՝ դեռևս շարունակվող հարվածներից պաշտպանվելու նպատակով: Այդ հարվածներից մեկը դիպել է տուժող Վիգեն Սահակյանի թիկունքի շրջանին ու նրա առողջությանը պատճառվել է ծանր վնաս:

Այն հանգամանքը, որ կռվի ընթացքում Նաիրի Գրիգորյանի կողմնակիցների թիվը եղել է տասից ավելի, հաստատվել է ամբաստանյալ Աշոտ Նիկոյանի, տուժող Վիգեն Սահակյանի, թվով 7 վկաների ցուցմունքներով: Ընդ որում, նրանցից Նաիրի Գրիգորյանն իր ցուցմունքով ընդունել է, որ առաջինն ինքն է բռունցքով հարվածել Աշոտ Նիկոյանի դեմքին, որից վերջինս գետին է ընկել:

Այնուհետև ընկած վիճակում այլ անձինք հարվածել են ամբաստանյալին: Ծեծի և ստացած մարմնական վնասվածների հետևանքով ամբաստանյալ Աշոտ Նիկոյանի մոտ առաջացել է գլխապտույտ, հիշողության ընդհատումներ և սրտխառնոց: Այդ մասին են վկայում, որ վերջինս ինչպես դեպքի վայրում, այնպես էլ՝ այդ օրվա ընթացքում հիվանդանոցում բուժօգնություն ստանալիս և երեկոյան ոստիկանության քննչական բաժնում. հարցաքննության ընթացքում ունեցել է փսխումներ ու առողջական վիճակի վատացում: Այդ պատճառով ընդհատվել է Ա.Նիկոյանի՝ ոստիկանության Քանաքեռ-Զեյթունի քննչական բաժնում կատարվող  հարցաքննությունը:

Դատարանը գտել է, որ ամբաստանյալի կողմից գործադրված պաշտպանության միջոցը /դանակի գործադրումը/ համարժեք չէ նրա նկատմամբ կիրառված բռնության միջոցներին /ձեռքերով, ոտքերով, քարերով կատարված հարվածներին/:

Դատարանը գտել  է, որ տուժողին վնասվածք է պատճառվել Ա.Նիկոյանի կողմից պաշտպանվելու ընթացքում դանակով հարված կատարելու հետևանքով, այսինքն՝ ամբաստանյալ Աշոտ Նիկոյանի կողմից տուժող Վիգեն Սահակյանի առողջությանը ծանր վնաս է պատճառվել անհրաժեշտ պաշտպանության սահմանազանցմամբ:

Որպես ամբաստանյալի անձը բնութագրող, պատասխանատվությունը և պատիժը մեղմացնող հանգամանքներ՝ դատարանը հաշվի է առել այն, որ նա երիտասարդ է, բնութագրվում է դրականորեն, հանդիսանում է ՀՀ կարատեի ազգային ֆեդերացիայի անդամ, ունի սև գոտի 1-ին դանի որակավորում, մեղայականով ներկայացել է նախաքննության մարմնին: