Փաստ ինֆո

«Մեծ սիրով կցանկանայի տեղափոխվել Հայաստան, եթե այն ամենն ինչ անում եմ Գերմանիայում, հնարավորություն ունենայի իրականացնել հայրենիքում: Հայաստանի հետ կապված ծրագրեր շատ ունեմ»,- լրագրողների հետ այսօրվա հանդիպման ժամանակ հայտարարեց Հայաստանում գտնվող պրոֆեսիոնալ բռնցքամարտի WBA կազմակերպության գերթեթեւ քաշային կարգի չեմպիոնուհի Սյուզի Կենտիկյանը:

Անդրադառնալով Հայաստան գալու նպատակներին մարզուհին, մասնավորապես, նշեց, որ ցանկանում է հանգստանալ հայրենի հողում եւ առնել հարազատների կարոտը: «Վերջին անգամ Հայաստանում եղել էի չորս տարի առաջ: Կարոտել էի Երեւանը»,- ասաց նա:

Միաժամանակ, Կենտիկյանը խոստովանեց, որ դեռ չի հասցրել հանգստանալ, քանզի հագեցած ժամանակացույցով է անցկացնում վերջին օրերը: Նրան ընդունել են ՀԱՕԿ-ի նախագահ Գագիկ Ծառուկյանը, սպորտի եւ երիտասարդության հարցերի նախարար Գաբրիել Ղազարյանը եւ սփյուռքի նախարար Հրանուշ Հակոբյանը: Ընդ որում, ինչպես նշեց մարզուհին, Գ. Ծառուկյանն իրեն նվիրել է 130 տարվա հնության կոնյակ, որը Ս. Կենտիկյանը մտադիր է համտեսել ամուսնության օրը: Ճիշտ է, բանախոսը չմանրամասնեց, թե երբ տեղի կունենա այդ իրադարձությունը:

Հայտնի դարձավ նաեւ, որ օլիմպիական կոմիտեի ղեկավարն ու սփյուռքի նախարարը խոստացել են հնարավորության դեպքում ներկա լինել Ս. Կենտիկյանի՝ նոյեմբերին նախատեսված հաջորդ մենամարտին: «Շատ ուրախ կլինեմ, քանի որ դա ինձ համար շատ կարեւոր հանդիպում է լինելու՝
պաշտպանելու եմ չեմպիոնի տիտղոսը: Հաջողության դեպքում հաղթանակը նվիրելու եմ Հայոց ցեղասպանության 100-ամյակին»,- հայտարարեց բռնցքամարտիկը:

Խոսելով առաջիկա ծրագրերից նա ասաց. «Գերմանիա վերադառնալուց հետո անմիջապես անցնելու եմ քրտնաջան մարզումների: Ի դեպ, գերմանական ինտերնետային առաջատար կայքերից մեկը ձեռնամուխ է եղել իմ մասին ֆիլմի ստեղծմանը: Այն պատմելու է իմ հայաստանյան առօրյայի եւ այստեղ իմ նկատմամբ եղած վերաբերմունքի մասին: Կինոնկարը մոտ 20 օրից հասանելի կլինի համացանցում: Ինձ համար մեծ պատիվ է, որ ամբողջ Գերմանիան նորից լսելու է հայկական արմատներիս մասին»:

Ս. Կենտիկյանը նաեւ հավաստիացրեց, որ Հայաստանն իր ծրագրերի կիզակետում է. «Անշուշտ, մեծ սիրով կտեղափոխվեի այստեղ, եթե կարողանայի իրականություն դարձնել այն ամենն, ինչ անում եմ Գերմանիայում: Այնտեղ ունեմ աշխատանք, պայմանագրեր, անձնական պրոմոութեր: Այնուհանդերձ, շատ եմ ուզում Հայաստանում անցկացնել մենամարտերիցս մեկը: Սակայն, դա փոքր-ինչ բարդ խնդիր է: Ամենից առաջ, հայկական կողմը նման առաջարկություն չի կատարել:

Եթե նախաձեռնող լինի, ապա գերմանացիները պատրաստ են կազմակերպել հեռարձակումը: Դա կապված է մեծ ֆինանսների հետ՝ հովանավորների ի հայտ գալու դեպքում իրագործելի ծրագիր է»: Մարզուհին հայտնեց, որ, ցավոք, դեռ չի կարող ներկայացնել Հայաստանը, քանի որ պայմանագիր ունի գերմանական պրոմոութերական ընկներության հետ: Ի դեպ, նրա առաջիկա ծրագրերից է հաջորդ տարի մեր երկրում կանանց բռնցքամարտի մարզադպրոց հիմնելը: «Հնարավոր է, մի օր ինքս էլ մարզչական աշխատանքի անցնեմ Հայաստանում՝ իմ մարզադպրոցում: Գերմանիայում երբեմն մարզում եմ աղջիկների, սակայն դա պարբերական բնույթ չի կրում՝ ծանրաբեռնվածությունս չի ներում:

Տարվա ընթացքում մինչեւ երեք մենամարտ եմ անցկացնում եւ ուժերս վերականգնելու կարիք եմ ունենում: Արդեն հաջորդ շաբաթ վերսկսելու եմ պարապմունքներս»,- հայտնեց Ս. Կենտիկյանը:

Նա համոզված է, որ հաղթանակների ուղին անցնում է պարտությունների բացատով. «Ծանր եմ տանում անհաջողությունները, բայց մարզիկի կյանքը դժվար է պատկերացնել առանց դրանց: Առաջին պարտությունից հետո մեծ ցնցում ապրեցի, բայց վերականգնվելու ուժ գտա իմ մեջ: Ուրախ եմ, որ պահպանում եմ չեմպիոնի տիտղոսը, ու ամեն ինչ կանեմ այն մինչեւ վերջ պահելու համար: Մտադիր եմ հաղթանակած ավարտել ելույթներս պրոֆեսիոնալ ռինգում: Պարտված հեռանալն իմ ոճը չէ»: