Փաստ ինֆո

 

«Ժառանգություն» կուսակցությունը մշտապես եղել է քաղաքական եւ քաղաքացիական ուժերի համախմբման  ջատագովը՝ հստակ գիտակցելով, որ միայն այդ ճանապարհով է հնարավոր փոխել երկրում ստեղծված ծանր իրավիճակը: Այդ նպատակով «Ժառանգություն»-ը դարձավ խորհրդարանական չորս ուժերի համագործակցության նախաձեռնողներից մեկը: 

 

Այս մասին, մասնավորապես, ասված է ՀՀ ԱԺ «Ժառանգություն» խմբակցության լրատվական ծառայության տարածած հայտարարության մեջ:

 

 

Ըստ «Ժառանգության»՝ թեեւ  իրենք մշտապես հայտարարել են եւ այժմ էլ գտնում են, որ երկրում անհրաժեշտ է համակարգային եւ ամբողջական իշխանափոխություն, սակայն տվյալ քաղաքական իրավիճակում չորս քաղաքական ուժերի կողմից միասնական համաձայնեցված քաղաքական օրակարգ դարձավ, որպես փուլային եւ մարտավարական քայլ, կառավարության հրաժարականի պահանջը:

 

«Վարչապետի՝ իշխանությունների կողմից ակնհայտորեն մինչ այդ չպլանավորված հրաժարականը, արդյունք էր հենց այս միասնության եւ քաղաքացիական կառույցների համատեղ արդյունավետ գործողությունների, որն իր մեջ պարունակում է երկրում վերջապես վիճակ փոխելու իրական ներուժ:

 

Եւ այժմ օրախնդիր է դարձել ընդդիմադիր ներխորհրդարանական համագործակցության ձեւաչափը վերափոխելու միջկուսակցական միասնական ճակատի, որը կարող է առավել վստահություն ներշնչել չորս քաղաքական ուժերի հետագա համագործակցությանը, ինչպես նաեւ՝ դառնալ համաժողովրդական ընդվզման հերթական շրջափուլ՝ քաղաքական եւ քաղաքացիական ուժերի առավել լայն ընդգրկմամբ»,-հայտարարում է «Ժառանգություն»-ը՝ հավելելով, որ այդ իսկ պատճառով իրենք գտնում են, որ այժմ առաջնային է դարձել չորս քաղաքական ուժերի օրակարգում մինչ օրս տեղ գտած, սակայն ինչ-ինչ պատճառներով չիրականացված կուսակցությունների ղեկավարների հանդիպումը, որի ընթացքում առաջին դեմքերի մակարդակով պայմանավորվածություն ձեռք կբերվի հետագա քայլերի մարտավարության եւ համատեղ պայքարի ռազմավարության վերաբերյալ: 

 

«Այդ հանդիպումը մենք դիտում ենք  խորհրդարանական չորս խմբակցությունների մաս կազմող ուժերի հետագա  համագործակցության անհրաժեշտ պայման»,-ընդգծում է «Ժառանգություն»-ը: