Փաստ ինֆո

 

Ոստիկանության համակարգում «ֆինանսական բուրգի» գործով այսօրվա նիստում դատարանը  որոշեց հարցում հղել «Նուբարաշեն» քրեակատարողական հիմնարկ ամբաստանյալ Արթուր Անդրեասյանի առողջական վիճակի և դատական քննությանը մասնակցելու հնարավորության մասին: 

 

Գործը քննող Երևանի Կենտրոն և Նորք-Մարաշ վարչական շրջանների դատարանը՝ դատավոր Գագիկ Պողոսյանի  նախագահությամբ, արձանագրեց, որ պաշտպան Համազասպուհի Գրիգորյանն   իր պաշտպանյալի ընկալունակության հարցում «թերևս չափազանցնում է»:

 

Դատարանի գնահատմամբ՝ լսելու պարագայում  ամբաստանյալը «շատ լավ հասկանում է՝  ինչ է կատարվում:     

 

Դատարանը  ՔԿՀ-ին հարցում հղելու և դատական նիստը հետաձգելու  որոշումը կայացրեց՝ հաշվի առնելով մեղադրող Արթուր Երիցյանի կարծիքն առ այն, որ «մենք մասնագետ չենք՝ որոշելու համար ամբաստանյալի վիճակը ծա՞նր է, թե՞ ամբաստանյալը  պարզապես այդպես է ցույց  տալիս»: Ուստի՝ ճիշտ համարեց  հարցման միջոցով պարզել՝ ինչո՞վ է տառապում ամբաստանյալը և ինչպիսի՞ն է նրա առողջական վիճակը:  

 

Այսօրվա դատական նիստում ամբաստանյալը հայտարարեց, որ ինքն իրեն թույլ է զգում և չի կարող մասնակցել դատական նիստին, նրա պաշտպանը հավելեց, որ ամբաստանյալը «մեծ դժվարությամբ է քայլում, տառապում է արյան ճնշման տատանումներից, հիշողության խանգարումներից, դժվարությամբ է ընկալում իրեն ուղղված խոսքը»: 

 

Մինչ այդ դատարանը մերժեց պաշտպանական կողմի միջնորդությունը ամբաստանյալի խափանման միջոց կալանավորումը վերանայելու մասին՝ ըստ պաշտպանի, իր պաշտպանյալը տառապում է գլխուղեղի անոթային հիվանդությամբ, սակայն քրեակատարողական հիմնարկը որևէ քայլ չի ձեռնարկում՝ ամբաստանյալի առողջությանը և ի վերջո կյանքի պահպանմանն ուղղված, դաժան ու անմարդկային վերաբերմունքի դրսևորում է այն, որ նրան առողջական այդպիսի վիճակով պարտադրում են ներկայանալ դատական նիստին: Քրեակատարողական հիմնարկում ամբաստանյալն, ըստ պաշտպանի, զրկված է բուժում ստանալու, ինչպես նաև՝ տարրական խնամք ստանալու հնարավորությունից:   

 

Հիշեցնենք, որ ըստ քաղաքացի Արթուր Անդրեասյանին առաջադրված մեղադրանքի՝ նա 2010 թվականի հունիսից մինչև 2013 թվականի մայիսի 3-ը խաբեության և վստահությունը չարաշահելու եղանակով թվով 7 քաղաքացուց հափշտակել է խոշոր և առանձնապես խոշոր չափերի գումար, ձեռք է բերել գույքի նկատմամբ իրավունք:

 

Քրեական գործը հարուցվել էր՝ քաղաքացի Արթուր Անդրեասյանի, ՀՀ ոստիկանության նախկին և գործող մի շարք պաշտոնատար անձանց, ինչպես նաև այլ քաղաքացիների կողմից ուրիշի առանձնապես խոշոր չափերով գույքը խարդախությամբ հափշտակելու, կազմակերպված խմբի կողմից բռնություն գործադրելու սպառնալիքով շորթում կատարելու, վաշխառությամբ զբաղվելու դեպքերի վերաբերյալ:

 

Ըստ մեղադրական եզրակացության՝ Արթուր Անդրեասյանը, բուքմեյքերական գործունեությամբ և արտարժույթի առքուվաճառքով զբաղվելու հետևանքով հայտնվելով փաստացի անվճարունակ վիճակում, 2010թ. հունիսին որոշել է ՀՀ ԿԱ ոստիկանությունում ղեկավար պաշտոններ զբաղեցնող գնդապետ Կարեն Բաբակեխյանի, գեներալ-մայոր Ներսես Նազարյանի, վերջինիս որդու՝ Երևան քաղաքում գործող «Մոսկվիչկա» խանութների ցանցի սեփականատեր Արմեն Նազարյանի, ինչպես նաև նրանց ընտանիքների անդամների հետ ունեցած մտերմության ու դրանով պայմանավորված իր անձի նկատմամբ շրջապատում ձևավորված վստահության շահարկմամբ, խաբեության և վստահությունը չարաշահելու եղանակով, ձեռնարկատիրական գործունեության մեջ ներդնելու և դրա դիմաց շահույթներ ստանալու պատրվակով, հափշտակել տարբեր քաղաքացիների՝ առանձնապես խոշոր չափերով գումարները և ձեռք բերել իրավունք՝ նրանց անշարժ գույքի նկատմամբ։