Փաստ ինֆո

«Բանդայի» գործով այսօրվա դատական նիստին «Դատապարտյալների հիվանդանոց» քրեակատարողական հիմնարկից չէր ներկայացվել ամբաստանյալ Քյարամ Ամոյանը:

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանը՝ նախագահությամբ Մեսրոպ Մակյանի, ներկաներին տեղեկացրեց, որ «Դատապարտյալների հիվանդանոց» ՔԿՀ-ից գրություն է ստացվել, համաձայն որի՝ Քյարամ Ամոյանը չի կարող մասնակցել դատական նիստին՝  առողջական վիճակի վատացման պատճառով:

Ամբաստանյալի պաշտպան Սամվել Հովհաննիսյանը դատարանին տեղեկացրեց, որ իր պաշտպանյալի հետ հանդիպման ժամանակ  պարզել է, որ  նա, ներկա  գտնվելով դատական նիստերին, ոչինչ չի ընկալում, այդ իսկ պատճառով  խնդրել է որ նրան զննի հոգեբույժը: Վերջինս այցելել է ամբաստանյալին «Դատապարտյալների հիվանդանոց» ՔԿՀ-ում, որի արդյունքների մասին դատարանին ներկայացված  տեղեկանքը եւս հրապարկվեց այսօրվա դատական նիստում։, Ըստ հոգեբույժի տեղեկանքի, Ք.Ամոյանի առողջական վիճակը թույլ չի տալիս, որ նա  ներկա գտնվի նիստերին և խորհուրդ է տվել, որպեսզի նա գտնվի նյարդահոգեբույժի հսկողության տակ: Պարզվեց նաեւ, որ փաստաբանը  միջնորդություն է ներկայացրել դատարանին՝ ամբուլատոր դատահոգեբուժական փորձաքննություն նշանակելու մասին:

Նկատի ունենալով, որ ամբաստանյալի բացակայությամբ  գործի քննությունը հնարավոր չէր շարունակել և միջնորդությունը քննարկել, դատարանը որոշեց ևս մեկ անգամ նիստը հետաձգել: Մյուս ամբաստանյալների պաշտպաններն էլ նշեցին, որ ամբաստանյալի բացակայության պատճառով գործի քննությունը ձգձգվում է:

Ամբաստանյալ Արտուշ Հակոբյանն էլ առաջարկեց Քյարամ Ամոյանի մասով գործն անջատել, որպեսզի նա բուժվի, այլապես նիստերն անընդհատ հետաձգվում են՝ նրա բացակայության պատճառով:

Եվ եթե հաջորդին նիստին ևս «Դատապարտյալների հիվանդանոց» ՔԿՀ-ի ղեկավարությունը նույնանման գրություն ուղարկի, որ ամբաստանյալը  չի կարող նիստին մասնացել, ապա դատարանը կկայացնի համապատասխան որոշումներ։