Փաստ ինֆո

 

Այսօր առավոտյան 9:30-ին Հիվանդանոցում գտնվող Վարդան Պետրոսյանին է այցելել քննիչ Հայկ Հակոբյանը: «Վարդան Պետրոսյանը հրաժարվել է Հայկ Հակոբյանի ղեկավարած քննչական խմբի որևէ գործողության մասնակցել, քանի որ քննիչի նպատակը միայն իրեն վարկաբեկելն է»: «Փաստինֆո»-ի հետ զրույցում հայտնեց դերասանի փաստաբան Նիկոլայ Բաղդասարյանը:

 

Փաստաբանը հիշեցրեց, որ խնդիրը ծագել էր այն բանից հետո, երբ Վարդան Պետրոսյանը, հիվանդանոցում գտնվելով, հրաժարվել էր ցուցմունք տա` ասելով, թե իր առողջական վիճակը թույլ չի տալիս, իսկ քննիչը հիվանդանոցից դուրս էր եկել և հայտարարել, թե` «Դեռասանը մեյմունություն է անում»: 

 

«Դրանից հետո քննիչը մամուլում հնչեցրել է, թե դատարանում Վարդան Պետրոսյանն իրենից ներողություն է խնդրել: Վարդան Պետրոսյանը հայտնել է, որ նման բան տեղի չի ունեցել, հակառակը դատարանում քննիչն ինքն է մոտեցել դերասանին, հայտնել, թե կալանքի մեջ ինքը մեղք չունի, մեղավորը  մամուլն է, որ այսպիսի աղմուկ է հանել: Իսկ երբ Վարդան Պետրոսյանը նրան ասել է, թե` «դուք իմ անձն եք վիրավորում», ասել է. «Մեր ազգի մեջ մեծանուն դերասաններ կան, որ մեր ազգի պարծանքն են», թվարկել է մի քանի անուններ ու հարցրել, թե` «ի՞նչն է ձեր շահը,  որ դուք իմ անձն եք վիրավորում»: Քննիչն ի պատասխան հայտնել է. «Իմ համար բոլորդ էլ դեռասաններ եք»,- մեզ հետ զրույցում, մեկնաբանելով քննչական գործողություններին մասնակցելուց հրաժարվելու Վարդան Պետրոսյանի որոշումը, դրա նախապատմությունը հիշեցրեց Նիկոլայ Բաղդասարյանը: 

 

«Վարդան Պետրոսյանի գործով ստեղծվել է քննչական խումբ, որի ղեկավար նշանակել են նույն քննիչին` Հայկ Հակոբյանին, որը, որպես քննիչ, քրեական գործի քննության ժամանակ խախտել էր ՀՀ քրեական դատավարության օրենսգրքի բոլոր այն նորմերը, որոնք տեսականորեն այդ գործը քննող քննիչը կարող էր խախտել»,- «Փաստինֆո»-ի հետ զրույցում ասաց Վարդան Պետրոսյանի փաստաբանը: «Եթե օրենք խախտող քննիչին մեզ մոտ քննչական խմբի ղեկավար են նշանակում, ապա օրենքը չխախտող քննիչին ի՞նչ են անում»,-  հավելեց փաստաբանը:

 

Ի դեպ, հիշեցնենք, մեկ շաբաթ առաջ` նոյեմբերի 12-ին, Նիկոլայ Բաղդասարյանը գրավոր դիմել էր ՀՀ ոստիկանապետ Վլադիմիր Գասպարյանին՝ քննիչ Հայկ Հակոբյանին կարգապահական պատասխանատվության ենթարկելու` ոստիկանության ծառայողի էթիկայի կանոնները խախտելու համար: Բացի այդ, փաստաբանը նաև քննիչի դեմ բացարկի դիմում էր ներկայացրել Կոտայքի մարզի դատախազ Վազգեն Ռշտունուն:

 

«Ես իմ պաշտոնական դիմումներից և ոչ մեկին պատասխան չեմ ստացել, փոխարենն այսօր ինձ փոխանցում են որոշումը, որով քննիչ Հայկ Հակոբյանը նշանակվել է քննչական խմբի ղեկավար»,- ասաց Նիկոլայ Բաղդասարյանը, հավելելով. «Սա ոչ թե Վարդան Պետրոսյանի դեմ է, այլ` արդեն պետության ողջ իրավական համակարգի»: