Փաստ ինֆո

ՀՀ նախագահի նախկին թեկնածու Վարդան Սեդրակյանը շինարարական աշխատանքների դիմաց իր տանը աշխատող սալիկագործ Սամվել Հարությունյանին քիչ էր գումար տալիս, այդ պատճառով նա որոշեց աղմկահարույց ինչ-որ բան անել և Վ.Սեդրակյանից գումար շորթել: Ըստ ամբաստանյալ Ս.Հարությունյանի դատաքննական ցուցմունքի, ինքը Պ.Հայրիկյանի սպանության փորձի պատվերը տալու մեջ մեղադրվող Վ. Սեդրակյանից այդ միջոցով պետք է պահանջեր չվճարած գումարները և նաև փող աշխատել՝ սպառնալով, որ հիշյալ գործողությունը «դու ես արել»:

Երևանի Կենտրոն և Նորք-Մարաշ վարչական շրջանների դատարանում՝ դատավոր Գագիկ Պողոսյանի նախագահությամբ, այսօրվա դատական նիստում այսպիսի բովանդակությամբ ցուցմունք տվեց ՀՀ նախագահի նախկին թեկնածու Պարույր Հայրիկյանի սպանության փորձ կատարելու մեջ մեղադրվող Սամվել Հարությունյանը: Նա պարզաբանեց, որ Վ.Սեդրակյանը աշխատանքի դիմաց գումարները քիչ տալու հետևանքով ինքը պարտք էր մնացել ամբաստանյալ Խաչատուր Պողոսյանին ու շինարարական աշխատանքներում ներգրավված արհեստավորներին, վերջիններիս մեքենայով Վ.Սեդրակյանի տուն հասցնում էր Խ.Պողոսյանը, ինչի համար գումար էր ստանում:

Ըստ Ս.Հարությունյանի, աղմուկ բարձրացնելու համար իր կողմից գործողության օբյեկտ է ընտրվել Պարույր Հայրիկյանը: Սկզբնապես նպատակ ունեին «պուգաչով»՝ գազային ատրճանակի գործադրմամբ կատարել գործողությունը, սակայն չկարողացան ճարել այն, այդ պատճառով գործադրվել է Խ.Պողոսյանի ատրճանակը: Ըստ ամբաստանյալի, Պ.Հայրիկյանին հրազենային վնասվածքները «միամիտ» են հասցվել:

Ամբաստանյալը հրաժարվեց դատավարության մասնակիցների հարցերին պատասխանելուց, սակայն, մասնավորապես, դատարանի որոշ հարցերի պատասխանեց: «Որքա՞ն էր պարտք իրեն Վ.Սեդրակյանը» հարցին ի պատասխան ամբաստանյալը նախ ասաց, որ չի հաշվել, սակայն ի վերջո ասաց՝ 5000 դոլար:

Դատաքննական ցուցմունքով ամբաստանյալը հերքեց իր նախաքննական ցուցմունքները, մասնավորապես, Վ.Սեդրակյանին առնչվող մասով: Դատաքննական ցուցմունքի հետ առկա էական հակասությունների պատճառով հրապարակված նախաքննական ցուցմունքներում Ս.Հարությունյանը հայտնել էր, որ Վ.Սեդրակյանն իրեն ասել է՝ «մի մարդ կա, պետք է վախեցնել», ապա ավելի ուշ մատնացույց է արել այդ մարդուն՝ Պարույր Հայրիկյանին՝ թերթի լուսանկարի միջոցով: Ըստ նախաքննական ցուցմունքների, Վ.Սեդրակյանը 1000 դոլար է տվել՝ զենք ձեռք բերելու համար: Խ.Պողոսյանն, ըստ Ս.Հարությունյանի նախաքննական ցուցմունքի, սպանելու նպատակ չի ունեցել, կրակոցը և դրա հետևանքով վնասվածքը պատահաբար է հասցվել:

Նախաքննության ընթացքում Ս.Հարությունյանը հայտնել էր նաև, որ Վ.Սեդրակյանը բարձրաձայնել էր գործող նախագահ Սերժ Սարգսյանի փեսային ու եղբորը ու ինչ-որ լրագրողի ահաբեկելու իր ցանկության մասին, սակայն այդ ուղղութմաբ որևէ քայլ չի արվել:

Տուժող Պ.Հայրիկյանը նորից բարձրաձայնեց հանցագործության «ռուսական հետքի» մասին՝ Վ.Սեդրակյանից հարցնելով, թե ինքը 2012թ. Սանկտ Պետերբուրգում եղե՞լ է՝ Վ.Սեդրակյանը բացասական պատասխան տվեց՝ նշելով, որ դա շատ հեշտ կլինի ստուգել սահմանային ծառայությունների միջոցով: Լրագրողների հետ զրույցում Պ.Հայրիկյանը նույնպես պնդեց «ռուսական հետքի» առկայությունը, դա «ռուսական իմպերիալիզմն» է: Ըստ նրա տեղեկությունների, ոմն ՌԴ քաղաքացի մինչ սպանության փորձը 100 հազար դոլար է փոխանցել Վ. Սեդրակյանին: Տուժողը միջնորդեց Էդուարդ ու Ալեքսանդր Աբրահամյաններին՝ գումար փոխանցողին ու միջնորդին հրավիրել ու հարքաքննել դատարանում, ակայան դատարանը մերժեց միջնորդությունը՝ մեղադրանքի սահմաններից դուրս լինելու հիմքով: