Փաստ ինֆո

Հունիսի 1-ին Սուրեն Խաչատրյանի առանձնատան մոտ հնչած կրակոցների շուրջ թերթի թղթակիցը զրուցել է Ավետիք Բուդաղյանի հոր` Էմիլ Բուդաղյանի հետ, ով իր խոսքում նշել է, որ մարզպետը նախանձել է իր որդուն, և դա կարող էր դառնալ թշնամանքի պատճառ:

Թերթը, հիշեցնելով հունիսի 1-ին կատարվածը, հարցադրում է անում, թե ինչի շուրջ են վիճաբանել նախկին մարզպետն ու Ավետիք Բուդաղյանը, որ այդպիսի ողբերգական ավարտ է ունեցել:

Թղթակցի այն հարցին, թե ըստ իրենց ունեցած տեղեկությունների` Բուդաղյանների և Սուրեն Խաչատրյանի միջև առաջացած վեճի պատճառը նախկին մարզպետի կողմից Բուդաղյանների սուպերմարկետի, խանութների և Գորիսի շուկայի 50 տոկոս բաժնեմասը խլելն է եղել, Էմիլ Բուդաղյանը պատասխանել է. «Իրա մեջ խայծ է առաջացել, որ Ավետիքին հարգում են, ինքը միշտ սիրում է, որ միշտ միակը լինի: Բայց այս ամենը շատ վաղուց է գալիս»:

Տեղեկությունների համաձայն, ինչպես գրում է թերթը, 70-ից ավելի ազատամարտիկներ պատրաստվում են Ավետիք Բուդաղյանի սպանության վրեժը լուծել: Այս հարցի կապակցությամբ Էմիլ Բուդաղյանը պատասխանել է, որ այդպիսի հայտարարություն իրենք չեն արել ու, ընդհանրապես, այդպիսի հայտարարություններ չեն լինելու:

Իսկ թղթակցի այն հարցին, որ քանի որ Ս.Խաչատրյանի հետ է կապվում կատարվածը, կարելի՞ է արդյոք կանխատեսել, որ արդար քննություն չի լինի և ի՞նչ քայլերի են պատրաստվում դիմել, Ավետիք Բուդաղյանի հայրը պատասխանել է. «Եթե չլինի, ես կմտածեմ այդ ուղղությամբ»:

Հոդվածն ամբողջությամբ կարդացեք «Ժողովուրդ» օրաթերթի` 12.06.2013թ. համարում: