Փաստ ինֆո

ՀՀ վերաքննիչ քաղաքացիական դատարանում այսօր կքննվի Հայաստանի «Առիթմոլոգիական սրտաբանական կենտրոն» ՍՊԸ-ն ընդդեմ «News.am» լրատվական վերլուծական գործակալության` պատվի, արժանապատվության, գործարար համբավի պաշտպանության պահանջի մասին հայցադիմումի գործով վերաքննիչ բողոքը:

Գործը դատարանում քննվում է «Առիթմոլոգիական սրտաբանական կենտրոն»-ի բողոքի հիման վրա, կողմը բողոքում է Երևան քաղաքի Աջափնյակ և Դավիթաշեն վարչական շրջանների ընդհանուր իրավասության դատարանի՝ դատավոր Մարգարիտա Հարթենյանի նախագահությամբ, կայացրած վճռի դեմ, որով մերժվել է հայցվոր կողմի հայցադիմումը:

Ըստ հայցվորի՝ 23.11.2010 թվականին «Մեդիա Կոնսալտ» ՍՊԸ-ն «News.am» կայքում հրապարակել է «Սրտի արատով հիվանդին առիթմոլոգիական սրտաբանական կենտրոնում ֆռռացրել են ու այլ սարք տեղադրել» վերտառությամբ հոդված, որում «պատասխանողը ողջամտության սահմաններում միջոցներ չի ձեռնարկել` պարզելու դրանց ճշմարտությունը և հիմնավորվածությունը, ինչպես նաև` հավասարակշռված և բարեխղճորեն չի ներկայացրել այդ տվյալները»: Ուստի, ըստ կողմի, վերոհիշյալ հոդվածը զրպարտություն է՝ այն իր մեջ պարունակում է փաստացի տվյալներ, որոնք չեն համապատասխանում իրականությանը և արատավորում են Հայաստանի «Առիթմոլոգիական սրտաբանական կենտրոն» ՍՊԸ-ի գործարար համբավը:

Հոդվածում, մասնավորապես, նշվում է, որ «Հովհաննես Կաթրջյանին Հայաստանի «Առիթմոլոգիական սրտաբանական կենտրոն» ՍՊԸ-ն ստորաբար խաբել է և 10 տարի շահագործման ժամկետով էլեկտրոկարդիոխթանիչի փոխարեն վիրահատության ընթացքում տեղադրել է նույն ընկերության, սակայն 6-7 տարի ծառայության ժամկետով մեկ այլ սարք»: Ըստ հոդվածի՝ «խաբեությունը բացահայտելուց» հետո հիվանդը գնացել է հիվանդանոց, ուր նրան ասել են՝ «լավ ենք արել, ում ուզում ես բողոքի, ինչ ուզում ես` արա»:

Հայցվոր կողմը կարծում է, որ հոդվածում չի ապահովվել բազմակողմանիությունը, բոլոր հնարավորությունները չեն ձեռնարկել` տեղեկատվությունն առնվազն երկու աղբյուրից ճշտելու համար: Եվ դատարանին խնդրել է պարտավորեցնել պատասխանողին վճիռն օրինական ուժի մեջ մտնելուց հետո եռօրյա ժամկետում հրապարակայնորեն հերքել զրպարտություն համարվող փաստացի տվյալները և հրապարակել դրանց վերաբերյալ հայցվորի պատասխանը, ինչպես նաև` պատասխանողից բռնագանձել նվազագույն աշխատավարձի 2000-ապատիկի չափով փոխհատուցում, նաև 300000 ՀՀ դրամ` որպես փաստաբանի ողջամիտ վարձատրության գումար:

«Մեդիա Կոնսալտ» ՍՊԸ-ի ներկայացուցիչներ Արամազդ Կիվիրյանը և Դիանա Գրիգորյանը 25.05.2011 թվականին առարկություն են ներկայացրել դատարան, որով հայտնել են, որ Հովհաննես Կաթրջյանի կողմից հայտնած տեղեկության վերաբերյալ պարզաբանումներ ստանալու համար «Մեդիա Կոնսալտ» ՍՊԸ-ն հարցադրումներ է ուղղել «Առիթմոլոգիական սրտաբանական կենտրոն» ՍՊԸ-ի տնօրեն Սմբատ Ջամալյանին, սակայն վերջինս հրաժարվել է պատասխանել կոնկրետ հարցերին: Պատասխանողը նշել է նաև, որ հիշյալ հրապարակման մեջ ներկայացվել է նաև Սմբատ Ջամալյանի կողմից արտահայտված դիրքորոշումը, որով վերջինս հերքել է իրենց նախկին հիվանդի` Հովհաննես Կաթրջյանի ներկայացրած փաստարկները` դրանք որակելով որպես զրպարտանք: ԶԼՄ-ի ներկայացուցիչները գտել են, որ հայցվորի կողմից ներկայացված հայցադիմումն ակնհայտ անհիմն է ու անօրինական, ուստի և ենթակա է մերժման:

Դատարանում ցուցմունք է տվել վկա Հովհաննես Կաթրջյանը, ով հաստատել է լրատվական գործակալությանը հայտնած տեղեկությունները: Նա դատարանին հայտնել է նաև, որ բողոք-նամակներով դիմել է պատգամավորների, ամեն հինգշաբթի գնացել է ՀՀ կառավարության շենք և այդ մասին հրապարակային հայտարարություններ արել: Այցերից մեկի ժամանակ մոտեցել է պատասխանող լրատվական միջոցի թղթակցին, ապա` գնացել գործակալություն և խնդրել է հրապարակել իր հետ կատարվածը, որպեսզի այլ անձինք ևս չտուժեն: Հոդվածն ամբողջությամբ, ներառյալ վերնագիրը, բովանդակում են իր խոսքերը: Նշել է նաև, որ դիմել է նաև այլ լրատվական միջոցների:

Դատարանը գտել է, որ պատասխանող «Մեդիա Կոնսալտ» ՍՊԸ-ն «News.am» կայքում հիշյալ հոդվածի հրապարակման համար ազատվում է պատասխանատվությունից, քանի որ հոդվածում հղում է կատարված տեղեկատվության աղբյուրին, միաժամանակ` հոդվածը բովանդակում է տեղեկատվության բառացի վերարտադրումը:

Նման պարագայում դատարանը փաստում է, որ միաժամանակ առկա են ՀՀ քաղաքացիական օրենսգրքի 1087.1-րդ հոդվածի 6-րդ և 9-րդ կետերով անձի պատասխանատվությունից ազատելու հիմքերը, որպիսի պայմաններում հայցն ամբողջությամբ անհիմն է:

14-12-2012թ. կայացված վճռով առաջին ատյանի դատարանը մերժել էր բուժհիմնարկի ներկայացուցչի հայցադիմումը: Վճռով Հայաստանի «Առիթմոլոգիական սրտաբանական կենտրոն» սահմանափակ պատասխանատվությամբ ընկերությունից հօգուտ Հայաստանի Հանրապետության պետք է բռնագանձվի 44000 ՀՀ դրամ` որպես չվճարված պետական տուրքի գումար: Հայցվորից հօգուտ «Մեդիա Կոնսալտ» սահմանափակ պատասխանատվությամբ ընկերության պետք է բռնագանձվի նաև 200 000 ՀՀ դրամ` որպես փաuտաբանի վարձատրության գումար: