Փաստ ինֆո

Երևանի Ավան և Նոր Նորք վարչական շրջանների դատարանը՝ դատավոր Աիդա Դավթյանի նախագահությամբ, այսօր չճանաչեց ընդդեմ նախկին պատգամավոր, ՀՖՖ նախագահ Ռուբեն Հայրապետյանի հայցադիմումի գործով հայցվոր, «Վահե Ավետյան» նախաձեռնող խմբի անդամ Գարեգին Չուգասզյանի ներկայացուցիչ Մհեր Արշակյանի լիազորությունները:

Այսպիսով դատարանը բավարարեց պատասխանողի ներկայացուցիչ Կարեն Պետրոսյանի միջնորդությունն, ըստ որի փաստաբան չհանդիսացող Մ.Արշակյանը չի կարող իրականացնել պարբերաբար կամ վճարովի ծառայություններ՝ ըստ «Փաստաբանության մասին» օրենքի, նման ծառայություններ կարող է իրականացնել միայն փաստաբանը: Մ.Արշակյանն ընդգծեց, որ ընդդեմ Ռ. Հայրապետյանի «Վահե Ավետյան» նախաձեռնող խմբի անդամներ Հրանուշ Խառատյանի, Դավիթ Սանասարյանի և Գարեգին Չուգասզյանի հայցադիմումների առարկան նույնն է, և դատարանը կարող էր դրանք քննել նույն վարույթի շրջանակներում: Նա նաև ընդգծեց, որ Դավիթ Սանասարյանի հայցադիմումի գործով դատարանը չի ճանաչել իր լիազորությունները, իսկ Հրանուշ Խառատյանի հայցադիմումի գործով որպես հայցվորի ներկայացուցիչ հանդես գալուց Մ. Արշակյանն ինքն է հրաժարվել: Այդուհանդերձ, պատասխանողը գտավ, որ մեկ գործով ներկայացուցիչ հանդես գալն էլ պարբերաբար իրականացվող կամ վճարովի ծառայություն է:

Հայցվորի ներկայացուցչի փաստացի բացակայության պայմաններում (հայցվոր Գ. Չուգասզյանը բացակայում է հանրապետությունից) դատարանը անհնարին գտավ նախնական դատական նիստի անցկացումը և այն հետաձգեց մինչև դեկտեմբերի 19-ը:

Հիշեցնենք, որ հայցվորը պահանջում է հատուցել իր բարի համբավին, պատվին, արժանապատվությանը և գործարար համբավին պատճառված վնասը: Հայցի առարկան «Նուվել դը Արմենի» ամսագրում սեպտեմբերի 7-ին հրապարակված Ռ. Հայրապետյանի հարցազրույցն է, որն, ըստ հայցվորի, պարունակում է իր բարի համբավը, պատիվն, արժանապատվությունը և գործարար համբավը վիրավորող և իրականությանը չհամապատասխանող զրպարտչական արտահայտություններ: Ուստի հայցվորը պահանջում է ներողություն խնդրել վիրավորական արտահայտությունների համար և հերքել իրականությանը չհամապատասխանող զրպարտչական արտահայտությունները: