Փաստ ինֆո

Վերահսկիչ պալատը վերջին տարիներին շինարարական աշխատանքների վերահսկողության ընթացքում արձանագրել է բազմաբնույթ խախտումներ և թերություններ: Բացառություն չեն նաև 2011թ.-ին կատարված ուսումնասիրությունների արդյունքները, համաձայն որոնց առավել հատկանշական են ծավալային հավելագրումները, անորակ աշխատանքները, գների արհեստական թանկացումները: Քիչ չեն նաև այն դեպքերը, երբ նախագծային ընկերությունների կողմից կազմվում են անորակ նախագծեր, շինարարական նորմերի և կանոնների խախտումով կազմված նախագծին տրվում է փորձագիտական դրական եզրակացություն, բացակայում են օգտագործված շինարարական նյութերի որակի հավաստագրերը, նախագծանախահաշվային փաստաթղթերը չեն համա¬ձայնեցվում համայնքի ղեկավարի հետ, բացակայում են ավարտված շինարարության շահագործումն ընդունող հանձնաժողովի ակտերը, թերի է իրականացվում տեխնիկական և հեղինակային հսկողությունը:

Ազգային ժողովի լիագումար նիստում, օրերս ներկայացնելով ՀՀ Վերահսկիչ պալատի 2011 թ. տարեկան հաշվետվությունը, ՎՊ նախագահ Իշխան Զաքարյանը շինարարության ոլորտից բերեց մի քանի օրինակներ:

Այսպես` Կրթական օբյեկտների հիմնանորոգման և շինարարության համար պետական բյուջեից 2009-2010թ.թ.-ին ՀՀ քաղաքաշինության նախարարությանը հատկացված միջոցների օգտագործման նկատմամբ ՎՊ-ի կողմից ընտրանքային կարգով ստուգված 10 կրթա¬կան օբյեկտներում` 707 մլն 851 հազար իրականացված վերահսկողության արդյունքում հայտնաբերվել են անորակ և վերականգնման ենթակա շուրջ 52 մլն 198 հազ. դրամ գումարի չափով խախտում:

Հայաստանի սոցիալական ներդրումների հիմնադրամում ընտրանքային կար¬գով 16 օբյեկտներում իրականացրած 510 մլն 200 հազ. դրամի հիմնանորոգ¬ման-շի¬նարարական աշխատանքների ստուգման արդյունքում արձանագրվել է 32 մլն 932 հազ. դրամի անորակ և վերականգնման ենթակա գումարի չափով խախտում:

«Գյուղական տարածքների տնտեսական զարգացման ծրագրի վերահսկման և կառավարման գրասենյակ» պետական հիմնարկում ընտրված 20 օբյեկտներում իրականացված 971 մլն 70 հազար դրամի շինարարական աշխատանքներում հայտնաբերվել է 104 մլն 915 հազ. դրամի անորակ և վերականգնման ենթակա գումարի չափով խախտում:

ՎՊ նախագահը նշեց նաև, որ կոռուպցիոն ռիսկերից և ուռճացված գներից խուսափելու նպատակով ՎՊ-ն ՀՀ կառավարությանն առաջարկել է վերա¬նայել շինարարական նախագծերի նախահաշիվներում կիրառվող տոկոսադրույքների չափերը:

Նշենք, որ 2011-ի տարեվերջին` ՀՀ քաղաքաշինության նախարարության կրթական օբյեկտների հիմնանորոգման և շինարարության, ինչպես նաև նախագծային աշխատանքների համար պետական բյուջեից հատկացված միջոցների օգտագործման նկատմամբ իրականացված վերահսկողության արդյունքների վերաբերյալ ՎՊ հաշվետվության հաստատմանը հաջորդած ասուլիսում ՀՀ քաղաքաշինության այն ժամանակվա նախարար Վարդան Վարդանյանը հայտնել էր, որ խախտումներ թույլ տված 8 շինարարական կազմակերպություններ տվյալ տարում զրկվել են լիցենզիայից և 7 կազմակերպություններ հայտնվել են Ֆինանսների նախարարության «սև» ցուցակում: Այսինքն` այդ կազմակերպություններն իրավունք չունեն մասնակցել պետական բյուջեից ֆինանսավորվող ծրագրերի մրցույթներին:

Վ. Վարդանյանը հայտնել էր նաև, որ ՎՊ-ի կողմից արված բոլոր դիտողությունները և ստուգմամբ արձանագրված փաստերը քննարկվել են, կան մարդիկ, ովքեր ստացել են համապատասխան պատիժներ, և գրեթե 90-95 տոկոսով վերականգնվել են ՎՊ-ի կողմից արձանագրված խախտումները:

Ըստ այս ընթացիկ հաշվետվության, որից ՎՊ նախագահը օրինակ էր բերել ԱԺ նիստում 2011թ. տարեկան հաշվետվության քննարկման ժամանակ, ընտրանքային կարգով ստուգված 10 կրթա¬կան օբյեկտներում վերահսկողության արդյունքում հայտնաբերվել են անորակ և վերականգնման ենթակա շուրջ 52 մլն 198 հազ. դրամի գումարի չափով խախտում: Մասնավորապես` Արարատի մարզի Դալար գյուղի մասնաշենքի տանիքի հիմնանորոգման աշխատանքները իրականացվել են թերի կատարված նախագծային փաստաթղթերի հիման վրա, ադյունքում` կապալառուի կողմից թույլ են տրվել բազմաթիվ կոնստրուկտիվ բնույթի թերացումներ, որոնք կարող են վտանգ հանդիսանալ մարդկանց և շրջակա միջավայրի համար: Արագածոտնի մարզի Ծաղկահովիտի դպրոցի հիմնանորոգման նախագծային փաստաթղթերում, տանիքի փայտե կոնստրուկցիաների մասնակի փոփոխման գծագրերում նշված չեն եղել հետազոտության արդյունքում հայտնաբերված փոփոխման ենթակա տարրերը` մանրակրկիտ տեղանշմամբ, համապատասխան չափերով և քանակով: Արդյունքում` փայտե տարրերի մասնակի փոփոխումը կատարվել է տարերայնորեն: Լոռու մարզի Լեռնապար գյուղի դպրոցի շինարարական աշխատանքների ընթացքում օգտագործվել էր նախագծայինից ցածր մակնիշի բետոն, տանիքի փայտամածի և կավարամածի հրապաշտպանությունը կատարվել էր թերի:

Ստուգված օբյեկտների գերակշիռ մասում, այլ աշխատանքների թվում անորակ էին կատարվել նաև հարդարման աշխատանքները` սվաղի, մանրահատակի, պրեսգրանիտե, խեցեսալե հատակների, ներկարարական և այլն:

Շինարարական ծրագրերում դեռևս չընդգրկված օբյեկտների թվով 4 նախագծերից ստուգումներ էին կատարվել 3-ում և հայտնաբերվել մի շարք բնութագրական խախտումներ: Տեղում կատարված ուսումնասիրությամբ պարզվել էր, որ նախագծով նախատեսված մի շարք շինարարական աշխատանքների ծավալներ տրված են եղել օբյեկտի նախնական զննման ու չափագրման թերի տվյալների հիման վրա, որի հետևանքով ներքոնշյալ օբյեկտներում նախահաշվային արժեքները չհիմնավորված ուռճացվել են. Երևանի Քանաքեռ-Զեյթուն համայնքի մշակույթի կենտրոնի հիմնանորոգում` շուրջ 5 մլն 740 հազար դրամի, Էջմիածնի թիվ 7 միջնակարգ դպրոցի հիմնանորոգում` 29 մլն 490 հազար դրամի, չափով, Երևանի գեղարվեստի ինստիտուտի հիմնանորոգում` շուրջ 1 մլն 508 հազար դրամի չափով: