Փաստ ինֆո

Հայաստանի կառավարությանն առընթեր պետական եկամուտների կոմիտեի նախագահ Վարդան Հարությունյանը մենաշնորհների և ստվերի դեմ պայքարի արդյունքներով դրական միտումներ է նկատում:

Ազգային ժողովում լրագրողների հետ զրույցում, անդրադառնալով հարցին, թե հաջողվո՞ւմ է խոշոր տնտեսավարողներին ստվերից դուրս բերել, պայքարել օլիգարխների դեմ, որպեսզի երկրում մենաշնորհներ չլինեն, հավաստիացրեց, որ ստվերի և մենաշնորհների դեմ իրենք ամեն օր պայքարում են:

«Ես կարող եմ ձեզ հավատացնել, որ մենաշնորհների ու ստվերի դեմ ամեն օր մենք պայքարում ենք: Ունե՞նք արդյունքներ, թե՝ ոչ, ինձ թվում է, որ բյուջեի կատարողականի հինգ ամսվա թվերը փաստում են, որ դրական միտումներ կան»,- «Արմենպրես»-ի փոխանցմամբ՝ ընդգծեց Հարությունյանը:

Հարցին՝ «Քեթրին Գրուպ»-ում տեղի ունեցած ստուգումնե՞րն էլ է այդ համատեքստում դիտարկում, Վարդան Հարությունյանը պատասխանեց. «Քեթրին Գրուպ»-ը տնտեսավարող սուբյեկտ է, որտեղ կարող է առաջանալ ցանկացած խնդիր, ինչպես և բոլոր տնտեսավարողների մոտ: Եթե մենք ունենք որևէ ռիսկ որևէ ընկերությունում, բնական է, որ պետք է ստուգվեն»:

Անդրադառնալով հարցին, թե «Ալեքս Տեքստիլ» ընկերությունում ստուգումներ անելո՞ւ են, Վարդան Հարությունյանը պատասխանեց, որ եթե անհրաժեշտություն լինի, կանեն:

Աղբյուր` Փաստինֆո