Փաստ ինֆո

«Հայաստան» խմբակցության պատգամավոր Աննա Գրիգորյանը Հայաստանի՝ ԵՄ-ին անդամակցության օրակարգը սնանկ է համարում, քանի որ ներկայացված նախագիծը,  ըստ հեղինակների՝ Հայսատանի անվտանգության մասին է, բայց թե ինչպես է ապահովվելու այդ անվտանգությունը՝ որևէ հիմնավորում ներկայացված չէ։

«Դրանք պետք է ծրագրեր լինեն, հողի վրա գործողություններ։ ԵՄ-ն ինքնին անվտանգության սպառող է, անվտանգության ստեղծող չէ։ Ճանապարհային քարտեզ կարո՞ղ եք ներկայացնել, թե մենք ինչպես ենք անվտանգ դառնում»,-ասաց նա՝ ընդգծելով, որ նախաձեռնության համահեղինակները բազմաթիվ հարցերի պատասխաններ չունեն։

«Հարցնում ենք՝ ասում ենք ԵԱՏՄ-ն ու ԵՄ անհամատեղելի են՝ մեզ ասում են ԵԱՏՄ-ից դուրս չենք գալիս։ Ընկերներ, բա ի՞նչ եք անում՝ ԵՄ եք գնում՝ ԵԱՏՄ լինելով։ Ասում եք՝ չէ-չէ, հլը ոչ մի բանի մասին մի խոսեք, անդամակցության մասին մի խոսեք, դեռ մեկնարկ է, բանալի բառը մեկնարկն է։

Այս անտրամաբանական մտքերի պատճառը մեկն է. Նիկոլ Փաշինյանի իշխանությունը գալիք ընտրություններից առաջ ուզում էր ստանալ մի փաստաթուղթ Ադրբեջանից, որի վրա գրած կլինի «Խաղաղության պայմանագիր», բայց որի մեջ հողի վրա խաղաղություն ապահովելու համար որևէ դրույթ գրված չէր լինի, բայց ամեն դեպքում՝ փաստաթուղթը կլիներ ու դրանով կասեր՝ խոստացել եմ խաղաղություն՝ հեսա պայմանագիրը։ Բայց իրականությունը դասավորվեց այնպես որ այդ դատարկ թուղթը անգամ չեն կարողանում ստանալ, հետևաբար, պետք էր նման ֆարս մոգոնել ու Փաշինյանը իր արբանյակների հետ մոգոնել է մի օրակարգ, որը մենք հիմա ստիպված ենք քննարկել»,-ասաց նա՝ ընդգծելով, որ սա մեծ փուչիկ է, ֆարս է և բացառապես ներքին օրակարգի հարց է, փոխարենը կան իրական օրակարգեր, որոնցով պետք է առաջ գնալ։

Անդրադառնալով Մեղրիի մասին հիշատակումներին՝ նա ընդգծեց, որ եղել է Ալիևի կողմից առաջարկ, փոխանակման ծրագիր։ «Բանակցությունների արդյունքում ձևավորվել է փաստաթուղթ Մինսկի խմբի համանախագահող երկրների կողմից, որը բանակցությունների արդյունքում դարձել է Քի վեստի փաստաթուղթ, որի արդյունքով պետք է Լեռնային Ղարաբաղը Լաչինով դառնար Հայաստանի մաս, և Նախիջևանը կապ էր ստանում Ադրբեջանի հետ, բայց որևէ տեղ Մեղրի տեղանուն նշված չէ։ Եկեք մեր ժողովրդին չմոլորեցնենք, չխաբենք։ Հիմա Լեռնային Ղարաբաղը՝ Լաչինի միջանցքով ամբողջությամբ օկուպացված է Ադրբեջանի կողմից, իսկ դուք խոսում եք նորից Ադրբեջան –Նախիջևան կապ տրամադրման մասին, երեկ էլ նշվեց, որ դուք պատրաստվում եք տալ անխոչընդոտ, անկանգառ կապ։

Էդքան, որ խոսում եք հանձնելոց, պարզ բան ասեմ՝ Մեղրիում եղե՞լ եք, Մեղրին իր տեղում է, չէ՞, չի կորել։ Եկեք ես Ձեզ տանեմ Քոչարյանի հանձնած Մեղրին, Դուք ինձ տարեք ձեր պահած Լեռնային Ղարաբաղ»,- ասաց պատգամավորը դիմելով քպականին։

Աղբյուր` Փաստինֆո