Փաստ ինֆո

Ոսկու շուկայի առևտրականները այսօրվա օրենսդրությամբ էլ կարող են աշխատել, ուղղակի պետք է խաբեն պետությանը։ Այսինքն՝ եթե մարդն ունի 100 հատ զարդ, ինքը պետք այդ 100 զարդը բերի իր ընկերների, դասարանցիների, բարեկամների անունով ձևակերպի, ասի՝ ես այս մարդկանցից եմ ձեռք բերել այս զարդը ու այդ դեպքում ինքը կհարկվի 1%-ով։ Այս մասին ԱԺ-ում լրագրողների հետ զրույցում նշեց վարչապետի նախկին օգնական Նաիրի Սարգսյանը, ով ԱԺ ՔՊ-ական պատգամավոր Հայկ Սարգսյանի եղբայրն է:

«Ոսկու շուկայի առևտրականը, եթե իր սեղանի վրա պայմանականորեն 200 հազար դոլարի ապրանք ունի, բոլորը պետք է  ձևակերպի ումից է առել, հստակ նշի անուն, ազգանունները, սոցքարտի համարը, անձնագրի տվյալները, իր հարկը կդառնա 1%։ Իմ առաջարկը հետևյալն է՝ եկեք չստիպենք այս մարդկանց գնան, սկսեն խաբել մեզ։ Մենք պայմանավորվել ենք, որ մի քանի ամիս ոսկու շուկայի առևտրականները կաշխատեն 1 տոկոսով, պայմանով որ ոչ մեկ ստվերում չի աշխատի ու այս դեպքում ավելի շատ հարկ կհավաքվի, հակառակ դեպքում՝ շատերը ստիպված կլինեն ստվերում աշխատել»,-ասաց նա:

 Նիկոլ Փաշինյանի նախկին օգնական Նաիրի Սարգսյանը հիմա էլ ժամանակ առ ժամանակ վարչապետին ներկայացնում է իր մտահոգությունները այս կամ այն հարցի վերաբերյալ, և վարչապետն արձագանքում է:

«Փաստինֆոյի» հարցին, թե երբ դուք վարչապետի խորհրդական էիք, էլի տնտեսությունում առկա բացերի մասին խոսո՞ւմ էիք, և արդյոք Փաշինյանը լսում էր, արձագանքում էր, պատասխանեց. «Այո, իհարկե»:

Հարցին, թե արդյոք հիմա ունի հարաբերություններ Նիկոլ Փաշինյանի հետ, Նաիրի Սարգսյանն արձագանքեց. «Այո, ես բաներ կան, որոնք գրում եմ, իմ հետաքրքրություններն ասում եմ, արձագանքում է»:

Աղբյուր` Փաստինֆո