Փաստ ինֆո

Արդեն մի քանի օր է, ինչ շարունակվում է ԶՊՄԿ-ի մի շարք աշխատակիցների գործադուլը՝ բորբոքելով նաեւ նյարդերը։ Նախօրեին նաեւ ծեծկռտուք էր տեղի ունեցել, որի մասնակիցների մոտ նաեւ հրազեն է հայտնաբերվել։ Գործադուլի մասնակիցները փորձում են պնդել, թե տեղի ունեցած միջադեպը կապ չունի գործադուլի հետ, սակայն չեն հերքում, որ մասնակիցները եղել են ԶՊՄԿ աշխատակիցներ։

Զանգեզուր պղնձամոլիբդենային կոմբինատի աշխատակից Շավարշ Մարգարյանը «Փաստինֆո»-ի հետ զրույցում նշեց, թե Քաջարանը փոքր քաղաք է, բոլորն էլ կոմբինատի աշխատակից են, բոլորը բոլորին ճանաչում են։ Ինչպես արդեն հայտնել ենք՝ դեպքը տեղի է ունեցել Քաջարանի Պոչամբարի մոտ։ «Անմիջապես միջոցառումներ են ձեռնարկվել։ Դեպքի վայր են գնացել ոստիկաններ, կանխվել են հետագա զարգացումները»,- հայտնել են ՆԳՆ-ից։ Երեկ ութ անձ էր բերման ենթարկվել։ Այսօր արդեն հայտնի դարձավ, որ երեք անձ ձերբակալվել է։ ՔԿ մամուլի քարտուղար Կիմա Ավդալյանն էլ «Փաստինֆո»-ին հայտնել էր, որ տեղի ունեցած դեպքի առթիվ ՀՀ քննչական կոմիտեի Սյունիքի մարզային քննչական վարչությունում Քրեական օրենսգրքի 297-րդ հոդվածի 3-րդ մասով (զենքի գործադրմամբ խուլիգանության) և 335-րդ հոդվածի 1-ին մասով (Ապօրինի կերպով հրազեն (բացառությամբ քաղաքացիական ողորկափող հրազենի, դրա փամփուշտների կամ դրա բաղկացուցիչ մասերի), դրա հիմնական բաղկացուցիչ մաս, ռազմամթերք, ակոսափող հրազենի փամփուշտ, պայթուցիկ նյութ կամ պայթեցման սարք ձեռք բերելը, իրացնելը, պահելը, փոխադրելը, առաքելը կամ կրելը) նախաձեռնվել է քրեական վարույթ։ 3 անձ ձերբակալվել է։

Մամուլում տեղեկություններ էին տարածվում, որ գործադուլ անողները հարձակվել են ԶՊՄԿ-ի այն աշխատակիցների վրա, որոնք դեմ են գործադուլին և, որ հարձակվողների մեջ է նաեւ Արամ Սարգսյանի «Հանրապետություն» կուսակցությունից, Քաջարանի ավագանու անդամներից մեկը` Գոռ Բաբաջանյանը։ Մասնավորապես, «Հրապարակ»-ը, հղում կատարելով բնակիչներից մեկին, գրել էր․ «Գործադուլը կուրացիա անողների շարքում են Գոռ Բաբաջանյանը, նրա եղբայրները՝ Վահան Բաբաջանյանը, Վահե Բաբաջանյանը եւ Արթուր Բաբաջանյանը, ինչպես նաեւ նրանց թայֆայից այլ անձինք։ Խուլիգանների խումբն այսօր ծեծել է ԶՊՄԿ-ի աշխատակիցներին, ովքեր մտահոգված են շարունակվող գործադուլով։

Անդրադառնալով հրապարակմանը և հարցին, թե մտավախություն չունե՞ն, որ գործադուլը դուրս է գալիս իրենց վերահսկողությունից՝ Մարգարյանը պատասխանեց, որ իրենց վերահսկողությունից դուրս չի գալիս։ Ինչ մնում է քաղաքական ուժերի կողմերից վերահսկմանը կամ ուղղորդմանը՝ նա նշեց, որ հավաքվածները բանվորներ են։ «Եթե խոսքն իմ մասին է՝ ես ոչ մի կուսակցությունից չեմ, որևէ մեկի հետ էլ կապ չունեմ, հավաքվածներն էլ բանվոր մարդիկ են, գուցե մարդիկ կան, որ կարող են օրինակ Քոչարյանի կուսակցության համակիր լինեն կամ ուրիշն էլ «Հանրապետական» կուսակցությունից, ես չգիտեմ, ով ինչ նախասիրություն ունի, բայց բանվորը չի՞ կարող կուսակցական մարդ լինի։
Բաբաջանյաններից երկուսին գիտեմ, մեր աշխատակիցներն են, չեմ կարող ասել, «Հանրապետությունից» են ուղղորդվում, թե ոչ, լուրերը, որ ծեծկռտուքը եղել է ու իրենք այնտեղ են եղել՝ լսել եմ այդ մասին։ Բայց Քաջարանում բոլորն են կոմբինատում աշխատում, հիմա եթե որևէ տեղ ասենք՝ կենցաղային պատճառով ծեծկռտուք վեճ է լինում՝ դա էլ են ուզում մեր դեմ օգտագործեն, այսինքն ամեն ինչ հիմա օգտագործվում են մեր դեմ։ Հիմա մենք ամենաչարն ու ամենավատն ենք դառել, իբրև թե գնում ենք՝ մեզ հետ չհամաձայնվողներին ծեծում ենք, այնինչ հակառակն է, երեկվանից միջին օղակները մարդկանց սկսել են ճնշել, որ գնանք գործի»։

Անդրադառնալով հնչող դիտարկումներին, թե այն ինչ արվում է՝ բաժնետերերի փոփոխության նպատակ ունի՝ Մարգարյանը նշեց, ինքը առաջին օրվանից ակցիաներին մասնակցել է ու որևէ քաղաքական նպատակ կամ բաժնետերերի փոփոխության մտադրություն չի եղել։ «Իրականում առաջին օրը որևէ ծրագիր չենք ունեցել կոմբինատը կանգնեցնելու։ Ամեն բան ինքնաբուխ է եղել, բանվորները ամսի 31-ին նախ մտան ղեկավարության հետ խոսեցին, դրանից հետո, երբ ամբոխը հավաքված էր ու մարդիկ «ոչ» պատասխանով դուրս եկան, երբ մենք լսեցինք, որ մեր պահանջներից որևէ մեկը չի կատարվում՝ իմպուլսիվ հենց տեղում բոլորի կողմից որոշում կայացվեց կոմբիինատը կանգնեցնել։ Մտածեցինք, որ եթե կանգնեցնենք, մեր խնդիրները կլուծվեն։ Իրականում 1-2 տեղամաս էր սկզբում դուրս եկել, հետո պարզվեց՝ մյուսներն էլ դժգոհություններ ունեն, եկան միացան մեզ ու ընդհանուր մի բան դարձավ։

Սա որևէ մեկի կողմից ուղղորդված չի, թեև մենք տեսնում ենք, որ այո քաղաքական ուժեր կան, որ ուզում են գալ՝ շահարկել, մեջ մտնել։

Տեսեք, որպեսզի մենք կարողանանք հետագա անելիքների հետ կապված որոշումներ կայացնենք, համակարգենք մեր ակցիաները՝ ձևավորել ենք համակարգող խորհուրդ, ես էլ դրա անդամ եմ, ու ես այդ խորհրդի բոլոր անդամների կողմից կարող եմ ասել, որ մեր մեջ չկան քաղաքական ուժերի ներկայացուցիչներ։

Ես նաև առաջարկել եմ, որ եթե երկար շարունակվի՝ դիմենք կառավարությանը, որպեսզի սանկցիաներ կիրառեն ղեկավարության նկատմամբ։ Ինձ միևնույն է՝ ով կլինի սեփականատերը, իրենք իրենց գումարները վաստակել են, իրենք լավ ապահովված են, կարող են մի ամիս էլ սպասեն, բա մե՞նք՝ սովորական բանվորներս ինչ անենք»։

Դիտարկմանը, թե Սյունիքի նկատմամբ Ադրբեջանից հնչում են բնապահպանական մեղադրանքներ ու այս թեման ևս կարող է շահարկվել՝ Մարգարյանն ասաց. «Մենք դա էլ լավ հասկանում ենք, բայց այդ լավ հասկանալու պատասխանատվությունը ինչի՞ եք թողնում միայն բանվորի վրա։ Այսինքն, բանվո՞րը պիտի մտահոգվի ամեն ինչի մասին։ Ստացվում է, երբ բանվորը հանքում աշխատում է, բայց իր իրավունքը խախտվում է, ինքը ձայն է հանում՝ ասում են լռի։ Հիմա դժվար պահ է ու իր իրավունքներն էլի խախտվա՞ծ մնան։ Հասարակությունը՝ մեդիադաշտով մեզ ուզում են սրանով պարտադրեն, որ ատամներս կրճած էլի գնանք համակերպվենք, սա՞ է բարոյականը։

Մենք էսքան տարի աշխատել ենք լուռ, բոլորի համար հարմար էր, հարկերը տալիս էինք, առաջին հարկատուն էինք, բոլորը մեզ ծափահարում էին, բայց երբ դուրս եկանք ու ասում ենք՝ պայմանները փոխենք, էսպես այլևս անհնար է՝ բոլորը տրամադրվել են մեր դեմ, ու գիտեք՝ օր-օրի մեր վրա ճնշումը մեծանում է, սա շա՞տ անարդարացի է, ու գիտեք, էստեղ մարդկանց համար հակառակ ազդեցությունն է լինում, ստացվում է մեզ շարունակաբար օգտագործել են, այն, որ մեր առողջության հաշվին է, որ մենք բոլորիս շուտ կմեռնենք՝ բոլորի համար հարմար է, հենց մի անգամ խոսեցինք՝ վերջ, դառնում ենք բոլորի աչքի փուշը ,մեր քայլը քաղաքական են դարձնում, իմ նախկինում կատարած հանցագործությունն են հրապարակ բերում, ասում են՝ հանցագործն է ղեկավարում, բայց կներեք, ես իմ պատիժը կրել եմ ու զղջացել եմ, ընդհանրապես կապ չունի, ո՞ր մարդն է անսխալական, կա՞ նման մարդ։ Ամեն բան փնտրում են բերում կապում էն էս շարժման հետ, որ պիտակավորեն։ Ուղղակի մարդկանց հարմար չի, որ բանվորը ձայն է հանում։

Հասարակության մոտ փորձում են կարծիք ձևավորեն, թե մենք սաբոտաժ ենք անում, հակապետական ինչ -որ գործողություն ենք անում, բայց ընդհարապես էդպես չի, մեր իրավունքն ենք բարձրացնում»,-ասաց Մարգարյանը։
Նշենք, որ մեր նյութը պատրաստ էր հրապարակման, երբ տարածվեց ԶՊՄԿ-ի պարզաբանումը` տիրող իրավիճակի վերաբերյալ, որում մասնավորապես ասվում էր.

«Այսօր՝ 2025 թվականի փետրվարի 6-ին Ընկերության Գլխավոր տնօրենի ղեկավարությամբ տեղի է ունեցել աշխատանքային խորհրդակցություն՝ Ընկերության բոլոր արտադրամասերի և ստորաբաժանումների ղեկավարների հետ։ Հանդիպման ընթացքում արձանագրվել է, որ աշխատողների ճնշող մեծամասնությունը մշտապես պատրաստ են եղել անցնել աշխատանքային պարտականությունների կատարմանը և վերականգնել Ընկերության արտադրական անխափան գործընթացը։ Ավելին՝ անցած օրերին Ընկերության աշխատողները երեք անգամ փորձել են վերականգնել աշխատանքները, սակայն փոքրաթիվ (մոտ 70) անձանց խմբի հաշվեհարդարի սպառնալիքների, ֆիզիկական միջամտության և տեղաշարժի սահմանափակումների ներքո չեն կարողացել վերագործարկել արտադրությունը։ Ընկերությունը վերոգրյալ փաստերի առթիվ ՀՀ իրավապահ մարմիններին արդեն իսկ ներկայացրել է հանցագործության մասին երեք հաղորդում։

Ընկերության վերագործարկմանը խոչընդոտող անձանց մի մասն առհասարակ կապ չունի Ընկերության հետ, Ընկերության աշխատակից չի համարվում և անգամ Քաջարան կամ Կապան համայնքներից չէ։ Ընկերությունը գտնում է, որ մի խումբ անձինք անօրինական միջոցների հաշվին չպետք է կարողանան շարունակաբար խաթարել ռազմավարական նշանակության կազմակերպության աշխատանքը՝ էական նյութական վնասներ հասցնելով միաժամանակ հազարավոր աշխատողներին, համայնքներին, Հայաստանի Հանրապետությանը և Ընկերությանը։ Ընկերությունը ձեռնարկելու է բոլոր օրինական միջոցները իր աշխատակիցների անվտանգության, ինչպես նաև արտադրական օբյեկտների և գույքի պաշտպանության համար։

Ընկերությունը աշխատողների հետ քննարկել է կազմակերպչական հարցեր և հանձն է առել արտադրության վերականգնումից հետո ստեղծել հատուկ հանձնաժողով, որը յուրաքանչյուր արտադրամասի հետ աշխատանքային քաղաքակիրթ մթնոլորտում կքննարկի առկա խնդիրները, ինչպես նաև մանրակրկիտ կլրամշակի աշխատավարձի ներդրվելիք փոփոխությունների ծրագիրը՝ ապահովելու համար վարձատրության առաջադեմ, թափանցիկ, արդար և համալիր լուծումներ»։

Աղբյուր` Փաստինֆո