Փաստ ինֆո

ՄԻԵԴ-ի կողմից Ադրբեջանի նկատմամբ որոշակի ժամկետ կա դրված՝ մինչև հունվարի ավարատ Բավքում ապօրինի պահվող բոլոր հայերի մասին տեղեկություն տրամադրել։ Այս մասին լրագրողների հետ զրույցում ասաց Միջազգային իրավական հարցերով ՀՀ ներկայացուցիչ Եղիշե Կիրակոսյանը՝ նշելով, որ ակնկալում են մանրամասն տեղեկատվություն բոլորի վերաբերյալ՝ նրանց առողջական վիճակի, իրավունքների, պահպանման պայմանների մասին։

«Բնականաբար նաև այս տեղեկատվությունը, երբ մենք ստանում ենք, նաև փոխանցում ենք նրանց հարազատներին: Ադրբեջանի դեմ ներկայացված թիվ երկրորդ գանգատը վերաբերվում է այնտեղ պահվող անձանց նկատմամբ ապօրինի դատական պրոցեսների և ապօրինի ազատությունից զրկելու հարցին»,-ասաց նա:

Դիտարկմանը, որ եթե քաղաքական որոշում կայացվի՝ հետ կանչել բոլոր հայցերը, բոլոր այս պրոցեսները կմնան փաստորեն օդում կախված, Կիրակոսյանն արձաանքեց՝ նշելով, որ չի կարող այդպիսի բան ասել, ամեն դեպքում այս պահին շարունակվում են բոլոր պրոցեսները, թե՛ Արդարադատության միջազգային դատարանում, թե՛ Եվրոպական դատարանում, նաև կա երկու ապրիտաժային գործընթաց ընդդեմ Հայաստանի, Ադրբեջանի կողմից բերված․ «Ես հիմա չեմ կարող խոսել հայցերը հետ կանչելու մասին, ես կարող եմ խոսել դատական պրոցեսների առկայության և շարունակականության, հետագա քայլերը ձեռնարկելու մասին»:

Նա համոզմունք հայտնեց, որ իր ընկալմամբ՝ դատական վեճերի և խաղաղության միջև հակադրություն դնելն արհեստական է․
«Հետևաբար ես դրա մեջ անկեղծություն չեմ կարող տեսնել։ Միջազգային դատարաններում վեճերի քննությունը՝ վեճերի լուծման քաղաքակիրթ մեթոդ է՝ ժամանակակից աշխարհում ընդունված: Այն պատմությունը, որ մենք ունեցել ենք տասնամյակների, հարյուրամյակի ընթացքում, դժվար կլինի պատկերացնել, որ չունենանք վեճ, իսկ վեճի լուծումը որոշակի առումով լիցքաթափման հնարավորություն է երկու երկրների համար էլ»:

Աղբյուր` Փաստինֆո