Փաստ ինֆո

Վաղ առավոտյան գերլարված իրավիճակ էր Երևանի Գումի շուկայում, որտեղ ՍԱՏՄ ներկայացուցիչները կարմիրբերետավորների հետ առգրավում են մսավաճառների միսը:

Ոստիկանների և մսավաճառների միջև սկսած քաշքշուկի ընթացքում մսավաճառներից մեկը փորձել ինքնահրկիզվել, մեկ այլ մսավաճառի ինքնազգացողությունը վատացավ, նրա աչքերին արցունքաբեր գազ էին փչել։

Մսավաճառները նշում են, իրենցից պահանջում են սպանդանոցային մորթի մասին փաստաթուղթ, բայց իրենց բնակավայրում չկա սպանդանոց։

Մսավաճառները նաև պնդում էին, որ միսը տանում են առանց կշռելու։ «Մոտ 10 ջանդակ տարել են։ Խուլիգանավարի գողանում են, իրավունք չունեն առանց կշռելու տանեն»։

ՍԱՏՄ անասնաբուժության վարչության պետի տեղակալ Արթուր Մելիքյանն էլ հայտնել է, որ իրենք ստուգում են իրականացնում, և եթե չկա սպանդանոցային մորթի մասին փաստաթուղթը, ապա միսը պետք է առգրավեն:

Մեկ այլ մսավաճառ էլ պատմեց, որ իրենց ասել են, որ անիմաստ է դիմադրելը, քանի որ միևնույն է միսը տանելու են:

«Ասում են՝ տանելու ենք վառենք: Ես էլ ասում եմ՝ կարո՞ղ ենք տեսնել, որ վառում եք, ոչ թե տանում եք մեջ-մեջ անեք: 500-600 կգ-անոց «ջանդակը» տարել են: Ասում եմ՝ եկեք գնանք Վեդի, եթե ինձ ցույց տաք սպանդանոց, միսը տարեք, ինձ էլ տուգանեք: Եթե սպանդանոց չկա, ո՞նց եք պարտադրում, որ սպանդանոցի թուղթ ունենանք»:

Մսավաճառներից մեկն էլ նշեց, որ սպանդանոց նաև Արարատում չկա։ Ինչին ի պատասխան ՍԱՏՄ աշխատակիցը արձագանքեց, որ սպանդանոցների ցանկը հրապարակված է:

Աղբյուր` Փաստինֆո