Փաստ ինֆո

«Սև Հովազ» ՌՀՀԿ-ի նախագահ, արցախյան պատերազմների մասնակից Սերոբ Գասպարյանն օրերս առերես հարցաքննվել է գործով անցնող մեղադրյալներից մեկի, ինչպես նաեւ մեկ վկայի հետ, թեև դրա անհրաժեշտությունը և օրենսդրական հիմք չի եղել, քանի որ նրանց ցուցմունքներում նշված տեղեկությունները չէին հակասում Գասպարյանի ցուցմունքներին։ Այնուամենայնիվ, առերես հարցաքննությամբ էլ ավելի ամրապնդվեց, որ այստեղ նույնիսկ հիմնավոր կասկածի նվազագույն շեմը չկա՝ վերագրվող արարքի հետ Գասպարյանի հնարավոր առնչություն վերաբերյալ։ Այս մասին «Փաստինֆո»-ի հետ զրույցում ասաց փաստաբան Էրիկ Ալեքսանյանը։

«Այստեղ ամբողջ խնդիրն այն է, որ առերեսումներ պետք է կատարվեն երկու այն վկաների հետ, որոնք կարծիք են հայտնել ենթադրության մակարդակում, որ Սերոբ Գասպարյանը հնարավոր է, որ կապ ունենա դեպքի հետ առհասարակ, ընդ որում, ոչ թե՝ տեղեկություն, այլ՝ պարզապես կարծիք։ Պաշտպանության կողմը մեկ անգամ չէ, որ միջնորդել է առերեսում իրականացնել այդ երկու անձի հետ, բայց վարույթն իրականացնող մարմինը մինչ օրս համառորեն հրաժարվում է դա իրականացնել»,- ասաց Ալեքսանյանը՝ նախաքննության գաղտնիությամբ պայմանավորված փակագծեր չբացելով։
Ինչ վերաբերում է կառավարության շենքի մոտ բողոքի ակցիա իրականացրած անձին՝ վկա Արմեն Մնացականյանին, ապա խոսքը նրա հետ առերեսման պահանջի մասին չէ, ավելին, թեև այդ անձի տվյալները քրեական վարույթի շրջանակներում կա, բայց նրա հարցաքննության տվյալները քննիչը չի տվել պաշտպանության կողմին՝ կալանքի միջնորդության շրջանակներում, սակայն Ալեքսանյանը նշում է՝ դատելով այդ անձի՝ մամուլից տեսանելի վարքից, նրա հայտնած տեղեկությունը լրջության նշույլներ առհասարակ չի կարող պարունակել։

«Ըստ նյութերի՝ հասու են տեղեկություններ, որ կան գործով անցնող վկաներ, բայց մենք նրանց չենք տեսել, չենք կարող ասել ովքեր են, միայն անունները գիտենք։ Դրա համար ենք ասում՝ առերեսեք բոլորի հետ, ով մեր դեմ ցուցմունք է տալիս, չնայած, այդպիսիք միայն երկուսն են, ընդ որում, դա էլ չի կարելի բնորոշել որպես դեմ ցուցմունք, ուղղակի՝ ցնդաբանություն է՝ կարծիքի դաշտում, բայց վարույթն իրականացնող մարմինը հրաժարվում է։ Մեզ համար բոլոր մասնակիցները ապրիորի գաղտնիության դաշտում են գտնվում, մեր ձեռքերը կապված են, աչքերը՝ փակված։ Հիմա կռիվ ենք տալիս մի բանի դեմ, որը փակ է։ Մենք չունենք մրցակցային դատավարություն, իրականում չունենք։ Վարույթն իրականացնող մարմինն ունի բոլոր զենքերը, մենք՝ ոչ, փորձում ենք հնարավորինս առկա փաստական տվյալներով պայքարել նրա դեմ, ինչը վարույթն իրականացնող մարմինն առաջադրում է Սերոբ Գասպարյանին»,- նշեց Ալեքսանյանը։

Հարցին՝ վարույթն իրականացնող մարմինը խուսափում է առերեսել՝ մտավախություն ունենալով, որ կփլվի մեղադրանքը՝ փաստաբանը նկատեց՝ կարող է այդպես դատողություն անել, քանի որ այն, ինչ հայտնել են երկու վկաները, լրջության մակարդակ չունեն, շատ լավ հասկանում են, որ խաչաձև հարցաքննության շնորհիվ այդ ենթադրությունը, կարծիքն այլևս կարող է գոյություն չունենալ․

«Մեղադրանքը կառուցված կլինի ոչնչի հիման վրա։ Եթե մինչ այս մեղադրանքը կառուցված էր երկու վկայի ենթադրության հիման վրա, ապա առերեսումից հետո այն կարող է կառուցված լինել ոչնչի վրա»։
Ինչ վերաբերում է խափանման միջոցին, ապա դեկտեմբերի 12-ին Վերաքննիչ դատարանը կհրապարակի կալանավորման ժամկետը մեկ ամսով երկարացնելու որոշման դեմ բողոքի վերաբերյալ որոշումը։ Փաստաբանը հիշեցրեց, որ դատարանը ոչ միայն մեկ ամսով էր երկարացրել ժամկետը, այլև՝ արձանագրել էր, որ հիմնավոր կասկածի շեմը ցածր է և նոր փաստական տվյալները, որոնք ներկայացվել են, ոչ թե ամրապնդել, այլ՝ ցածրացրել են հիմնավոր կասկածի շեմը և հետագայում կալանքի ժամկետը կարող է չերկարացնել։

Անդրադառնալով ՌԴ պաշտոնատար անձանց ուղղված հարցումներին՝ փաստաբանը հայտնեց, որ դրանց պատասխանը դեռևս չի ստացվել, բայց արձանագրեց՝ի գիտություն են ընդունում ՌԴ ԱԳ ներկայացուցիչ Մ․ Զախարովայի հայտարարությունը, որով ցնդաբանություն էր գնահատվել ՔԿ տարածած հաղորդագրությունը։

Հիշեցնենք, որ ՔԿ-ն սեպտեմբերի 18-ին հայտարարել է՝ իշխանության յուրացման նախապատրաստման ենթադրյալ դեպքի մասին։ Ըստ ՔԿ-ի՝ շուրջ երեք տասնյակ խուզարկությունների, հարցաքննությունների արդյունքում՝ բավարար փաստական տվյալներ են ստացվել, որ ՀՀ քաղաքացիներ Ս.Գ.-ն, Ա.Ե.-ն, Ա.Հ-ն, Ե.Ս.-ն, Ա.Ս-ն, ինչպես նաև ԼՂ նախկին բնակիչներ Ա.Մ.-ն Ա.Ս.-ն, ինքնությունները դեռևս չպարզաբանված այլ անձանց հետ նախնական համաձայնությամբ, խմբի կազմում, կատարել են իշխանությունը յուրացնելու նախապատրաստություն, այն է՝ դիտավորությամբ ստեղծել են ՀՀ իշխանությունը զավթելու՝ բռնություն գործադրելու և բռնություն գործադրելու սպառնալիքի միջոցով ՀՀ կառավարության լիազորություններին տիրանալու համար պայմաններ, ինչի համար նշված անձինք, նախնական համաձայնությամբ, ՀՀ իշխանությունը զավթելու նպատակով, վարձատրության՝ յուրաքանչյուրին ամսական շուրջ 220.000 ՌԴ ռուբլի վճարի դիմաց, ՌԴ-ում եռամսյա հավաքներ անցնելու և դրա ընթացքում նոր ծանր զինատեսակներին ծանոթանալու, դրանց կիրառման հմտություններ ուսանելու, ապա ՀՀ վերադառնալուց հետո մարտական հերթապահություն իրականացնելու, ինչպես նաև գիտելիքները այլ անձանց փոխանցելու պատրվակով, 2024 թվականի ընթացքում հավաքագրել են ՀՀ մի շարք քաղաքացիների և Լեռնային Ղարաբաղի մի շարք նախկին բնակիչների: Քրեական վարույթի շրջանակներում երեք անձ կալանավորվել է, յոթ անձի նկատմամբ քրեական հետապնդում է իրականացվում։ Կալանավորված անձանց թվում Սերոբ Գասպարյանն է, արցախցի Արմեն Մնացականյանը, որը Ռոստովից ՀՀ էր ժամանել՝ եղբորորդու զոհվելու տարելիցին մասնակցելու նպատակով։

Հեղինակ՝ Իզաբել Սահակյան

Աղբյուր` Փաստինֆո