Փաստ ինֆո

ՔՊ-ում որևէ գաղափարախոսություն չկա, ավելին՝ հենց իրենք են ժամանակին ասել, որ իրենք «իզմեր» չունեն։ Այն, ինչ տեղի է ունենում այսօր ԱԺ-ում՝ ընդամենը ներթիմային կարգուկանոն հաստատելու կամ պտուտակները ձգելու գործընթաց։ Նիկոլ Փաշինյանը պարզապես ասում է, որ ինքն է միակ ասողը։ Այս մասին «Փաստինֆոյի» հետ զրույցում ասաց քաղաքական վերլուծաբան Արմեն Բաղդասարյանն՝ անդրադառնալով դիտարկմանը, թե արդյոք Հովիկ Աղազարյանը այս օրերին իր շուրջ ծավալվող գործընթացներով չբացահայտեց, թե ինչպես է Նիկոլ Փաշինյանին հաջողում պահել իր թիմիակիցներին։

Այսինքն՝ հենց նման շանտաժներով են եւ քպականներն ամենեւին էլ չեն կիսում են բոլոր այն գաղափարները, որոնք Նիկոլ Փաշինյանը արտահայտում է։

Հիշեցնենք, որ 44-օրյա պատերազմից հետո որոշ պագմավորներ մանդատները դնելու մասին հայտարարություններ էին անում հրապարակավ, բայց հետո մոռացան այդ մասին ու դարձան Փաշինյանին պաշտպանողներ։

«Փաշինյանը փորձում է ցույց տալ, որ իր խոսքը անառարկելի է ու ցանկացած մեկը, որը չի ենթարկվի իր ցանկացած քմահաճույքի՝ անխուսափելիորեն կպատժվի։

Սրա խորքային պատճառն այն է, որ թեև մենք խորհրդարանական երկիր ենք, բայց Ազգային ժողովը բացի օրենքներ դակելուց, որևէ այլ գործառույթ չունի։ Ի վերջո, հենց իրենք են ձևակերպել, որ այնտեղ հավաքված են ուսապարկեր, այսինքն՝ այդ խմբակցությունը խորհրդարանում է հայտնվել բացառապես Նիկոլ Փաշինյանի հեղինակության ու վարկանիշի շնորհիվ, Փաշինյանն էլ դա հասկանալով՝ թիմից պահանջում է անվերապահ հնազանդություն։ Սա է ամբողջը, թե չէ՝ Հովիկ Աղազարյանը մանդատը վայր կդնի, թե նրա փոխարեն մեկ ուրիշը կհայտնվի Աժ-ում՝ դրանից որևէ բան չի փոխվի ոչ ներհայաստանյան կյանքում, ոչ էլ խորհրդարանում»։

Դիտարկմանը, թե այսօր Ալեն Սիմոնյանը այսօր հայտնել է, որ արտահոսքերի հետ կապված էլի մարդիկ կան թիմում, որոնց կասկածում են, արդյոք սա մահակը թիմակիցների գլխին պահելո՞ւ փորձ է՝ նա պատասխանեց, որ սա կարող է նշանակել, որ թիմում ցանկացած անհնազանդության փորձ կարող է պատժվել, ու բոլորը թիրախում են, որևէ մեկը ապահովագրված չէ Հովիկ Աղազարյանի ճակատագրից։ «Մնացածը՝ բարոյական նորմերի մասին խոսակցությունները պատրվակ է, ինչ մնում է պետական գաղտնիք հրապարակելուն, ապա դա քրեական պատասխանատվություն է ենթադրում»,-ասաց նա։

Հարցին, թե Փաշինյանը չի՞ փորձում փրկել սեփական հեղինակությունը, թիմում, պնդելով, որ ցանկացած միջոցներով հանսելու են նրան, որ ժողովրդի տված մանդատից զրկեն Աղազարյանին, որրովհետև հետագայում ցանկացած մեկը կարող է հետևել նրա օրինակին ու անհնազանդություն հայտնել՝ Բաղդասարյանն ասաց, որ իրականում նույն ճակատագրին կարող է արժանանալ ցանկացած պատգամավոր։

«Խնդիրն այն է, որ եթե ժողովուրդն է մանդատ տվել Հովիկ Աղազարյանին, ապա ժողովուրդն էլ պետք է իրավունք ունենա նրան այդ մանդատից զրկել, դա չի կարող հորդորով կամ խնդրանքով տեղի ունենալ։ Հորդորը կամ խնդրանքը քաղաքական կատեգորիա չէ, ընդ որում, եթե հորդորին հաջորդում են բացահայտ սպառնալիքներ, այդ թվում՝ քրեական պատասխանատվության, ապա դա քաղաքական գործընթաց չէ, այլ թիմի ներսում բացարձակ միահեծան իշխանության հասնելու հերթական դրսևորումն է, որը երկրում ավտորիտար ռեժիմ հաստատելու կարևոր քայլերից մեկն է։

Մենք տեսնում ենք, որ Նիկոլ Փաշինյանը այդ ուղղությամբ է շարժվում։ Առայժմ սկսել է իր թիմից, դրա համար նա կարող է իր պատճառներն ունենալ, օրինակ, եթե երկրում ֆորս-մաժորներ լինեն՝ թիմը կարող է ճաքեր տալ։ Նա հիմա ամրապնդում է իր թիկունքը։ Ֆորս –մաժոր ասելով ես նկատի ունեմ արտաքին քաղաքական սպառնալիքները։ Նույն ԱԺ նիստում, օրինակ, շատ ավելի կարևոր հայտարարություններ արվեցին, օրինակ, այն մասին, որ Հայաստանը դուրս է գալիս ՀԱՊԿ-ից։ Իսկ դա անխուսափելիորեն ունենալու է հետևանքներ ու սպառնալիքներ, որը կարող է երկրում ներքաղաքական ցնցումներ առաջացնել։ Այդպիսի ֆորս-մաժորներից առաջ ցանկացած երկրի ղեկավար խնդիր է ունենում թիմն ամրապնդել, որպեսի այդ թիմը ճաքեր չտա, որովհետև Հայաստանում որպես կանոն, իշխանափոխությունները տեղի են ունենում ներքաղաքական պառակտումների միջոցով, ինչպես եղավ 1998 թ-ին, ինչպես դա եղավ 2018 թ-ին, երբ Սերժ Սարգսյանի թիմը ճաքեր տվեց ներսից։ Նիկոլ Փաշինյանը դա հասկանում է ու նախապես իրեն ապահովագրում է սրանից, իսկ դա ժողովրդավարության հետ որևէ աղերս չունի»։

Աղբյուր` Փաստինֆո