Փաստ ինֆո

«ՔՊ»-ից հեռացված պատգամավոր Հովիկ Աղազարյանի շուրջ օղակը շարունակում է սեղմվել։ Մանդատը դնելու Փաշինյանի խնդրանքը մերժելուց հետո գործող իշխանությունները լծվել են Հովիկ Աղազարյանին ուղղված մեղադրանքներ հնչեցնելով՝ ընդհուպ մինչեւ պետական գաղտնիքի արտահոսք կատարելու վերաբերյա։ Բայց հենց այս գործադրված ջանասիրության ընթացքում պարզվեց, որ խախտվել է պատգամավորի սահմանադրական իրավունքը՝ նամակագրության, հեռախոսային խոսակցությունների և հաղորդակցության այլ ձևերի ազատության և գաղտնիության։

Հիշեցնենք, որ Հովիկ Աղազարյանը դեկտեմբերի 2-ին հայտարարել է, թե մերժում է Նիկոլ Փաշինյանի խնդրանքը և վայր չի դնի պատգամավորական մանդատը, ինչից հետո՝ դեկտեմբերի 3-ին, ՔՊ վարչության որոշմամբ՝ Հովիկ Աղազարյանին հեռացրել են կուսակցությունից։ Որպես Աղազարյանի հեռացման պատճառ նշվում է պետական և կուսակցական նշանակության կոնֆիդենցիալ տեղեկատվության արտահոսքերի, ինչպես նաև հանրության բարոյական նորմերի կոպիտ խախտումները։ Ընդ որում, այդ «արտահոսքերի» մասին իշխանություններն իմացել են այն բանից հետո, երբ ՀԿԿ-ում քննվող՝ ԱԺ-ում Արգիշտի Քյարամյանի և Աղազարյանի միջադեպի վերաբերյալ քրեական վարույթի շրջանակներում առգրավվել է Հովիկ Աղազարյանի հեռախոսը։ Աղազարյանի փաստաբանը հայտարարել էր, որ պատրաստվում է հանցագործության մասին հաղորդում ներկայացնել։

ՀՀ Սահմանադրության 33-րդ հոդվածն ամրագրում է ՀՀ յուրաքանչյուր քաղաքացու նամակագրության, հեռախոսային խոսակցությունների և հաղորդակցության այլ ձևերի ազատության և գաղտնիության իրավունքը: Նույն հոդվածը նախատեսում է, որ գաղտնիության իրավունքը կարող է սահմանափակվել միայն դատարանի որոշմամբ: Արդյոք պատգամավորի հաղորդակցվելու գաղտնիությունը սահմանափակելու դատարանի որոշում է եղել՝ այն վերցնելիս, եթե այո, ապա ինչպես է պատգամավորի նկատմամբ վարույթ հարուցվել՝ առանց նրա անձմեռնմխելիության հարցը լուծելու։

Բացի այդ՝ Ալեն Սիմոնյանն այսօր հայտարարել էր, թե ՔՊ-ում կան մարդիկ, որոնք ևս կասկածվում են արտահոսք կազմակերպելու համար՝ ծածկանուններով, կեղծանուններով պետական գաղտնիքի արտահոսք են տալիս։ Սիմոնյանի նկարագրած արարքներն առերեւույթ պարունակում են ՀՀ քրեական օրենսգրքի 428-րդ, 429-րդ, 430-րդ հոդվածներով նախատեսված հանցանքներ, որի համար ոչ թե անձը պետք է կուսակցությունից հեռացվի, այլ ենթարկվի քրեական պատասխանատվության։ Հակառակ պարագայում ստացվում է, որ գործ ունենք պետական իշխանության դեմ ուղղված հանցագործությունների քաղաքական հովանավորչության հետ։

ՀՀ դատախազությունը, սակայն, լռում է՝ արդյո՞ք քննության առել են այս հանգամանքները։ Մասնավորապես, «Փաստինֆո»-ն փորձել է դատախազությունից պարզել, թե արդյո՞ք վարույթ նախաձեռնվել է՝ պետական գաղտնիքի արտահոսքերի վերաբերյալ՝ նկատի ունենալով Ալեն Սիմոնյանի հայտարարությունը, արդյո՞ք առանձին վարույթ կա՝ Հովիկ Աղազարյանի կողմից պետական գաղտնիքի արտահոսք կատարելու դեպքով։ Միևնույն ժամանակ, հետաքրքրվել էինք, թե արդյո՞ք քրեական վարույթ նախաձեռնվել է՝ Հովիկ Աղազարյանի հեռախոսից՝ խիստ մասնավոր անձնական կյանքին առնչվող տեղեկության՝ իշխանություններին փոխանցելու առնչությամբ։ Բացի այդ, հետաքրքրվել էինք, թե արդյո՞ք դատախազության օրակարգում կա Աղազարյանին անձեռնմխելիությունից զրկելու միջնորդագիր ներկայացնելու հարցը, թե՝ ոչ։

Փաշինյանի նախկին օգնականի կողմից ղեկավարվող դատախազությունն աս հարցերի պատասխանը չուներ՝ պահանջելով գրավոր հարցում ուղարկել։ Նկատենք, որ գործող օրենսդրությունը ոչ միայն գրավոր, այլ նաեւ բանավոր հարցման ինստիտուտ է նախատեսել՝ հատկապես նման դեպքերի համար, երբ րոպե առաջ անհրաժեշտություն է տեղեկատվության տրամադրումը։ Ավելին, դատախազությունը չպետք է սպասեր անգամ բանավոր հարցումներին, այլ, հաշվի առնելով հանրային մեծ հնչեղությունը եւ իրավունքի կոպտագույն խախտումների դրսեւորումները, իր նախաձեռնությամբ հանդես գար հայտարարությամբ։

Ինչեւէ, «Փաստինֆո»-ն գրավոր հարցում կուղարկի եւ հուսանք 30 օր ժամանակ չեն ուզի՝ ուսումնասիրության պատճառաբանությամբ։

Աղբյուր` Փաստինֆո