Փաստ ինֆո

Փոքր ու միջին բիզնեսի վրա դրվեց անտանելի հարկային բեռ։ «Փաստինֆո»-ին ասել է ՀՀ ԱԺ պատգամավոր Թադևոս Ավետիսյանը՝ անդրադառնալով շրջանառության հարկի կրկնակի բարձրացմանը՝ 5 տոկոսից դարձել է 10 տոկոս։

Սա իր հերթին կարող է միջինը 5 տոկոսով գնաճի հանգեցնել, իսկ իրավաբանական ծառայությունների մատուցման ոլորտում 20 %-ի։

Տնտեսագետ Ատոմ Մարգարյանի արձանագրմամբ՝ հարկային քաղաքականությունը երկսայր սուր է, դու կարող ես կացնի սկզբունքով, կարճաժամկետ առումով, բյուջեի մուտքերն ապահովել, բայց երկարաժամկետ առումով կանգնել կոտրած տաշտակի առաջ։

«Ինձ թվում է հիմա հենց դա էլ տեղի է ունենում։ Մենք շուտով կկորցնենք շատ ու շատ ոլորտներ, ու երբ խաղաբիզնեսը, որը նաև դեգրադացնում է հասարակությունը, ինչպես նաեւ ոսկու եւ թանկարժեք քարերի վերաարտահանումները դադարեն, փաստի առաջ կկանգնեք»,- նխեց Ատոմ Մարգարյանը։

Նրա կարծիքով՝ պետք է խրախուսվի մնայուն արտադրական տեղական աշխատատեղեր գեներացնող, բարձր տեխնոլոգիական և ավելացված արժեքի մեծ մասնաբաժինն ապահովող բիզնեսը և հարկային քաղաքականություն մշակողները պետք է այդ ռազմավարական մոտեցումների տեսանկյունից մոտենան հարցին, ինչը տեսանելի չէ։

«Կենցաղային լեզվով ասած՝ հարկ են քերում, քանի որ բյուջեն չի կատարվում եւ փորձում են այդպես եկամտային հոսքեր ապահովել, ինչը աբսուրդ է»,- նշել է տնտեսագետը ու ավելացրել. «այդ տենդենցն եմ տեսնում մեր հարկաբյուջետային քաղաքականության ու օրենսդրության բարելավումների հիմքում, ամեն գնով կատարել շատ դեպքերում անիրատեսական բյուջետային կանխատեսումներ»։

Նրա խոսքերով՝ շինարարությունը՝ որպես ոլորտ, ունի չափազանց մեծ ստվեր, եկամտահարկի վերադարձի սխեման դեֆորմացվել դարձել է մոնստեր, բայց այնպես չէ, որ բյուջեն տալիս է և չի ստանում, բայց որպեսզի համարժեք ստանա, պետք է ռեալ ծախսերը հաշվարկեն եւ ոչ թե շահույթները խցկեն ծախսերի տակ։

Ատամնաբուժարանների ոլորտը եւս, ինչպես նշեց տնտեսագետը, չափազանց դժվար է հաշվարկել, պարզել յուրաքանչյուր ատամի հետ արված աշխատանքը։ Այստեղ եւս կարող է ստվերը մեծ լինել, ինչը չի կարելի ասել վարսավիրանոցների մասին, որտեղ հաշվարկն ավելի տեսանելի է։ Նրա գնահատմամբ՝ մեկ այլ ոլորտում փոփոխությունները կբերեն հերթական անհավասար մրցակցային դաշտի։

Ըստ մասնագետի, եթե անգամ փաստաթղթային հիմնավորումներով նախատեսել են, որ ծասերը պակասեցնելու սկզբունքով ծառայություն մատուցողն ու առևտուր անողը կաշխատեն փաստաթղթով ու այդպես ստվերը կնվազի, ապա մյուս կողմից կարող է հակառակը տեղի ունենալ՝ շատ գործարքներ գնան ստվեր։

«Փաստաբանը կարող է հաճախորդի հետ կնքել պայմանագիր, բայց այլ գին պայմանավորվել ու գանձել»,- ասաց տնտեսագետն ու նշեց, որ հարկային այս քաղաքականության արդյունքում թանկացումներն անխուսափելի են ֆորմալ առումով։ «Բայց նաև նշենք, որ ամեն թանկացում բախվում է սահմանային եկամտի և ծախսի մակարդակին, երբ մոտենում է կարմիր գծի այդ հավասարակշռության կետը,ապա սկսում է ստվերը մեծանալ։ Այդ թաքնված գնաճը կբերի թաքնված գանձումների ու ֆինանսական թաքնված հոսքերի։ Արտաքուստ կարող է սակագների բարձրացում տեղի չունենալ, որ ավելի չհարկվի»,- կարծիք հայտնեց Ատոմ Մարգարյանը։

Տնտեսագետի խոսքերով, ամբողջ խնդիրն այն է որ բյուջետային եկամուտներն ապահովելու խնդիրները լուծելիս պետք է ուսումնասիրել միջազգային փորձը, ինչպիսին է իրավիճակը համադրելի երկրներում։

«Շնչի հաշվով եկամտի բարեկեցության, կյանքի որակի, բազմաթիվ ինդեքսների պրիզմայով նայել այս ամենին և փորձել հասկանալ վարվող քաղաքականության ողջամտության ատիճանը»,- եզրափակեց Մարգարյանը։

Աղբյուր` Փաստինֆո