Փաստ ինֆո

Առհասարակ թե՛ Գյումրիում, թ՛ե այլ քաղաքներում առաջանում է այդ ժամանակավոր պաշտոնակատարի նշանակման հետ կապված խնդիրը։ Բոլորիս համար էլ գաղտնիք չի, որ այդ նշանակումները թե ձեր իշխանության տարիներին, թե մնացած այլ ժամանակահատվածներում, որ եղել են՝ ոչ հավասար ստարտային պայմաններ են ստեղծում մնացածի համար։

Այս մասին Աժ արտահերթ նիստի ընթացքում ասաց «Հայաստան» խմբակցության պատգամավոր Գառնիկ Դանիելյանը՝ անդրադառնալով ԱԺ-ն արտահերթ նիստի ընթացքում վարչապետին Գյումրու քաղաքապետի ժամանակավոր պաշտոնակատար նշանակելու հնարավորություն տալու նպատակով իրականացվող օրենսդրական փոփոխությունների ընթացքում:

«Մեր երկիրը փոքր է, բերեք մեկս մյուսին չխաբենք, և ԺՊ նշանակված մարդունն է և վարչական լծակները, և ռեսուրսները: Այդ ամբողջը դրվում է իր տակ և ամիսներ շարունակ գնում է այդ մարդու նախապատրաստական փուլը, ու երբ իրենց հարմար լինի՝ այդ ժամանակ էլ ընտրությունները կնշանակվի, դա կլինի 1 տարի, 2, թե 3 տարի անց՝ էական չի:
Այստեղ խնդիրը գիտե՞ք ինչում է, որ վաղը, մյուս օրը մենք չէ, ուրիշը լինի իշխանության, ենթադրենք, դուք լինեք ընդդիմություն, այդ ամեն ինչն, ինչ որ արվում է՝ ձեզ դո՞ւր է գալու, թե՞ չէ»,- ասաց պատգամավորը:

Նա ընդգծեց, որ խնդիրը նաև այն է, որ այն առաջարկությունները, որ հանձնաժողովների նիստերի ժամանակ արվում են՝ դրանք չեն վերլուծվում ու քննարկվում։ «Հապշտապ բերել եք, ասում եք՝ 24 ժամվա ռեժիմով շուտ անենք, անցկացնենք, մի հատ էլ, որ մեկը խոսում է, թարս նայում են, ասում են՝ այս ի՞նչ է խոսում, շուտ քվեարկենք, գնանք տներով։ Այդպես չի, չէ՞:

Մի բան ընդունում ենք, մեր երկրի պետությունը կամ դրանից հզորանալու է, կամ՝ հակառակը։ Եթե մի բան շըփ-թըփ անենք, գնանք, ոչ մի բան էլ չենք ունենալու։ Հենց այդ ՏԻՄ-ն էլ շատ կարևոր տեղ է ու շատ լուրջ ու շատ հետևողական պիտի լինենք այս ամեն ինչին»,- ասաց նա

Աղբյուր` Փաստինֆո