Փաստ ինֆո

Այսօր՝ դեկտեմբերի 4-ին, ավտովթար է տեղի ունեցել Երևանում: Ժամը 01:00-ի սահմաններում Մյասնիկյան պողոտայի թիվ 55 հասցեի դիմացի հատվածում բախվել են Երևանի բնակիչ 52-ամյա Ադիկ Դ.-ի վարած «KamAZ» մակնիշի աղբատար բեռնատարն ու Արարատի մարզի բնակիչ 28-ամյա Տիգրան Հ.-ի վարած «Mercedes» մակնիշի ավտոմեքենաները:

Ինչպես հայտնում է ֆոտոլրագրող Գագիկ Շամշյանը, վթարի հետևանքով «Mercedes»-ի վարորդ Տիգրան Հ.-ն մարմնական վնասվածքներով տեղափոխվել է Հերացու անվան թիվ 1 համալսարանական հիվանդանոց:

Վիրավորին առաջինը օգնության են հասել քաղաքացիները, և ըստ քաղաքացիների հայտնածի՝ օպերատիվորեն ժամանած Երևանի 1-03 շտապօգնության բժիշկների հերթապահ խումբը:

Դեպքի վայր են ժամանել ՀՀ Ներքին գործերի նախարարության ոստիկանության պարեկային ծառայության Երևան քաղաքի գնդի 4-րդ գումարտակի 2-րդ վաշտի պարեկները՝ գումարտակի հրամանատար Արմեն Գասպարյանի, գումարտակի հրամանատարի տեղակալ Արմեն Ավետիսյանի գլխավորությամբ:

Տարածքը սահմանազատել են նույն վաշտի պարեկ Հրաչ Գևորգյանն ու կրտսեր պարեկ Հովհաննես Հովհաննիսյանը:

Վթարի մասին ՊԾ Երևան քաղաքի գնդից տեղեկությունը փոխանցել են ՀՀ քննչական կոմիտեի Երևան քաղաքի քննչական վարչության Ճանապարհատրանսպորտային հանցագործությունների քննության բաժին, որտեղից ժամանել է քննչական խումբը՝ բաժնի պետ Գոռ Ալոյանի, բաժնի պետի տեղակալ Արթուր Հովհաննիսյանի և քննիչ Արամազդ Հարությունյանի գլխավորությամբ:

Վթարի փաստով քննչական բաժնում նախաձեռնվել է քրեական վարույթ:

Գ. Շամշյանի տեղեկություններով՝ «KamAZ»-ը հաշվառված է Երևանի քաղաքապետարանի «Աղբահանություն և սանիտարական մաքրում» ընկերությունում, իսկ «Mercedes»-ի հիվանդանոց տեղափոխված վարորդ Տիգրան Հ.-ն «ԱՁ» տնօրեն է:

Աղբյուր` Փաստինֆո