Փաստ ինֆո

Երևանի ընդհանուր իրավասության քաղաքացիական դատարանում՝ դատավոր Մարինա Տաշչյանի նախագահությամբ, կայացել է ԱԺ նախագահ Ալեն Սիմոնյանի հայցի քննությունը՝ ընդդեմ Վոլոդյա Հովհաննիսյանի, նիստը, սակայն, րոպեներ տևեց։

Ինչպես արդեն տեղեկացրել ենք՝ Ալեն Սիմոնյանը հայց է ներկայացրել Վոլոդյա Հովհաննիսյանի դեմ՝ «ԼայվՆյուզ» լրատվականի եթերում Վոլոդյա Հովհաննիսյանի հայտարարությունների առնչությամբ։ Մասնավորապես, Հովհաննիսյանը, Անժելա Թովմասյանի դեմ Ալեն Սիմոնյանի ներկայացրած հայցի մասին խոսելիս, ասել էր․ «Այսօր անբարոյականությունը, կոռուպցիան և ամենահեղինակազրկված քաղաքական անձը դատի է տվել ամենահեղինակավոր լրատվամիջոցներից մեկին»։ Բացի այդ, Հովհաննիսյանը հիշեցրել է նաև Ալեն Սիմոնյանի՝ ֆիլմերում նկարվելու կարիերան՝ կիրառելով «պոռնոաստղ» արտահայտությունը։ Ի դեպ, վերջին դրվագով մեկ այլ առանձին հայց ներկայացվել էր, որը կարճվել և այժմ, ներկայացված հայցով, կրկին անդրադարձ է կատարվում այդ դրվագին։

Հայցադիմումով Ալեն Սիմոնյանը պահանջում է դատարանից՝ պարտավորեցնել Սիմոնյանին՝ հրապարակավ ներողություն խնդրել, ինչպես նաև՝ փոխհատուցում՝ 2 մլն դրամի չափով։

Նախորդ դատական նիստին դատարանն արդեն բաշխել էր ապացուցման բեռը, գործով այսօր պետք է ապացույցների հետազոտում իրականացվեր, հետևաբար, պետք է դիրքորոշում ներկայացնեին հայցվոր կողմի ներկայացուցիչները, որոնք չէին ներկայացել նիստին, ըստ այդմ, դատական նիստը հետաձգվեց։ Նիստի ավարտին Վոլոդյա Հովհաննիսյանի փաստաբան Հակոբ Ճարոյանը «Փաստինֆո»-ի հետ զրույցում մանրամասներ հայտնեց գործից՝ նշելով, որ Սիմոնյանը նկարահանվել է տարբեր ֆիլմերում, սերիալներից մեկի 5-րդ սերիայում կան բաց տեսարաններ, որոնք նույնիսկ յութուբն է այդպես գնահատում, ինչի մասին բազմիցս գրվել է, նույնիսկ անձանցից մեկն ասել է «պոռնոաստղ կլոուն», սակայն Սիմոնյանը նախկինում երբեք հայց չէր ներկայացրել, այդ հիմքով էլ գործերից մեկն էլ կարճվել է։

Ինչ վերաբերում է «անբարոյականությունը, կոռուպցիան և ամենահեղինակազրկված քաղաքական անձը» արտահայտություններին, ապա փաստաբանը նշեց, որ Հովհաննիսյանը չի նշել Ալեն Սիմոնյանի անունը, արտահայտությունն անորոշ է, բացի այդ, բազմիցս Ալեն Սիմոնյանի վերաբերյալ, նաև՝ մինչև պաշտոնյա դառնալը՝ այդ արտահայտությունները կիրառվել են, սակայն՝ հայցեր չեն ներկայացվել։ Ըստ այդմ, Հովհաննիսյանն իրավունք ուներ՝ կրկնելու, քանի որ նախկինում որևէ հայց չէր ներկայացրել։ Ճարոյանն ուշադրություն հրավիրեց այն հանգամանքին, որ Ալեն Սիմոնյանն այս պահին ընդհանուր առմամբ՝ 25 հայց է ներկայացրել, վերջին երկու հայցերը լրատվականների դեմ է և փոխհատուցման չափը, գնալով, ավելի մեծ է պահանջում։ Փաստաբանը նկատում է՝ լրատվականներն ունեն ֆինանսական խնդիրներ, ի վնաս ԶԼՄ-ի, անձանց կայացված վճիռների դեպքում, հաշվի առնելով տուգանքների չափը, կդադարեն այլևս գնահատականներ հնչեցնել Սիմոնյանի վերաբերյալ։

Հեղինակ՝ Իզաբել Սահակյան

Մանրամասները՝ տեսանյութում

Աղբյուր` Փաստինֆո