Փաստ ինֆո

Հալեպում հայությունն անհանգիստ է, գաղութը նյութական օժանդակության կարիք կունենա։ Այս մասին «Փաստինֆո»-ի հետ զրույցում նշեց «Գանձասար» պարբերականի խմբագիր Զարմիկ Պողիկյանը։
Այս օրերին, ինչ զինյալների կողմից Հալեպը գրավվել է, պարբերականը լույս չի ընծայվում, քանի որ տպարանը չի աշխատում ու փորձում են լրատվությունն ապահովել Ֆեյսբուք սոցիալական ցանցի միջոցով։ Դա էլ ոչ միշտ է հաջողում, քանի, որ ինտերնետի հետ կապված խնդիրներ են առաջանում։

Նախօրեին պայթյուն է տեղի ունեցել պարբերականի խմբագրի տան մոտ՝ 50 մ. հեռավորության վրա։

«Հզոր պայթյուն եղավ, ապակիները փշրվեցին, բայց այս գիշեր խաղաղ անցավ, կարողացել ենք քնել»,- նշեց մեր գործընկերը։

Նրա փոխանցմամբ՝ կրոնական առումով որեւէ սպառնալիք հայության համար չկա այս պահին, այսօր էլ Սուրբ Աստվածածին եկեղեցում արարողություն է տեղի ունեցել։ Ընդ որում, եկեղեցին ոչ միայն հոգեւոր ծառայություն է մատուցում, այլեւ համայնքին օգնելու կազմակերպչական շատ հարցեր է հանձն առել։

«Առայժմ մթերքի տագնապ չկա, բայց առաջիկայում դա էլ կարող է լինել», - ասաց Զարմիկ Պողիկյանը՝ ավելացնելով, որ տեղեկություններ են ստացել, որ սիրիական բանակը պատրաստվում է հակահարձակման , բայց իրենք Հալեպի ներսում են, բոլոր ճանապարհները փակ են, ոչ կարող են դուրս գալ, ոչ որևէ ձևով դրսից կարող են իրենց մոտ գալ, անորոշության մեջ են ու չգիտեն, թե ինչ կլինի։

Զինյալներն այս պահին համայնքի նկատմամբ բարի կամք են դրսերում, հաց էին բերել, որը մեր հայրենակիցները կարող էին ստանալ «Արամ Մանուկյան» ակումբից, ինչի մասին հայտարարությունը տարածվել էր ֆեյսբուքի միջոցով, սակայն, ինչպես նշեց մեր զրուցակիցը, համայնքն ամեն դեպքում զգույշ է։

«Այսօր արդեն սննդի խանութները բաց են, հացի փռերը նույնպես, բայց մի քանի ժամ հերթ պետք է կանգնել՝ հաց ձեռք բերելու համար, նպարեղենը սահմանափակ քանակությամբ է հիմա, եթե վերջանա չգիտենք ինչ ենք անելու, տնտեսական տագնապ էլ կսկսվի, մարդկանց աշխատանաքային վայրերը փակ են, առայժմ եղածն են ծախսում շուտով դժվարություն կլինի, գաղութը նյութական օժանդակության կարիք կունենա», - ասաց Պողիկյանը։

Նրա փոխանցմամբ՝ համայնքի ազգային կազմակերպությունները՝ եկեղեղցին, «Արամ Մանուկյան» կենտրոնը, արտակարգ ռեժիմի են անցել, «Հայ Օգնության Խաչ« բարեսիրական կանանց կազմակերպությունն իր բժշկակական կենտրոնը բաց է պահում, որպեսզի համայնքում դեղորայքի ու բժշկի կարիք ունեցողները իրենց դիմեն։ Արարատ ակումբը եւս զբաղում է համայնքի ապահովության հարցերով, փորձում են ապահովել երիտասարդների ու երեխաների զբաղմունքը, քանի դեռ դպրոցները չեն գործում։ Ընդ որում՝ դպրոցները չեն գործում նաեւ հեռավար ձեւով։

Ինչպես հայտնի է՝ նախօրեին մեկ հայ է մահացել, որը, նախնական տվյալներով, փորձել է ինքնուրույն Հալեպից հեռանալ։

Աղբյուր` Փաստինֆո