Փաստ ինֆո

Բյուջեի քննարկման ընթացքում կանխատեսելի հարց բարձրացավ, թե մեզանում ով է հերոսը ևբ ինչպես է այն բնորոշում, վերը նշվածի շրջանակում ընդդիմադիր գործիչները հերոսությունը կապեցին սահմանը պահող կամավորի և կամավորության հետ։ Սկզբունքորեն այս ընկալման մեջ ոչ մի սխալ բան չկա, այն տարբերությամբ, որ սահմանի պահպանությունը կամ անվտանգությունը կամավորության հետ կապելը, իսկ հարկ վճարելը «ընդամենրը» օրենքով սահմանված գործունեություն դիտարկելը կամ դրան հակադրելը ինքնին ապապետական մտածողության հետևանք է։ Այս մասին Ազգային ժողովում 2025 թ-ի բյուջեի քննարկման ամփոփիչ ելույթի ընթացքում ասաց վարչապետ Նիկոլ Փաշինյանը։

«Եթե խոսքը «կեցցե մեր հայ կամավորը», «Գինի լից» երգի կամավորի մասին է, ապա այդ կամավորը գոյությունը գոյություն ունի պետության չգոյության պայմաններում և այդ կամավորը գոյություն ունի միայն այն պատճառով, որ պետություն գոյություն չունի։ Այսինքն, այդ երգում նկարագրված կամավորը պետության չգոյության սիմվոլն է։
Հանուն արդարության, պետք է ասել, որ այսօր էլ կամավորներ կան, բայց նրանց գոյությունն ու անհրաժեշտությունը նույնպես պայմանավորված է պետական ինստիտուների ոչ լիարժեքության հետ, բացի այդ՝ այսօրվա կամավորը «Ընկեր ջան, գինի լից» երգի կամավորից տարբերվում է նրանով որ շոշափելի վարձատրություն է ստանում հենց կամավորության համար ՀՀ պետական բյուջեից»-ասաց նա։

44-օրյա պատերազմի ընթացքում կամավորական ջոկատներ կազմելու և մարտի դաշտ մեկնելու կոչեր կատարած Փաշինյանը կամավորությունը համարում է պետության չգոյության սիմվոլ։ Հերթն այս անգամ հասավ «Գինի լից» երգին։
««Գինի լից» երգի կամավորը պետության չգոյության սիմվոլն է»,- կարծում է Փաշինյանը։
Նա ընդգծեց, որ սահման պահող կամավորներին էլ ապահովելու համար պետական միջոցներ են պետք, որն ապահովում են աշխատող, արդյունք ստեղծող օրինապահ քաղաքացին։ «Առանց այդ քաղաքացու, ոչ պետություն կարող է լինել, ոչ էլ հերոսություն»,-ասաց նա ընդգծելով, որ պետության թիվ մեկ հերոսը աշխատող, արդյունք ստեղծող, հարկերը վճարող քաղաքացին է։

«Բանակը, Պաշտպանության նախարարությունը մեր երկրի ամենամեծ հարկատուներից է, ՊՆ-ն առաջին 10 հարկատուների ցանկի մեջ է մտնում»,- ասաց նա։

Փաշինյանի խոսքով, այն, որ ՊՆ-ն 10 խոշորագույն հարկատուներից է, նշանակում է, որ մեր սոցիալ-հոգեբանության մեջ որոշակի խնդիր կա։

«Ընդհանրապես, որպես մի մարդ, որ բանակի սրբագործման հայեցակարգի կրող է եղել ու հետո դառնաղի իրականությանն է բախվել, խորհուրդ եմ տալիս դադարեցնել բանակի սրբագործման մոտեցումը, որովհետև սա 3-րդ Հանրապետության ընթացքում բոլորիս գործած մեծագույն սխալն է։ Բանակին պետք է վերաբերվել հարգանքով, պատկառանքով, հոգատարությամբ, բայց բանակը սրբագործման առարկա չպետք է լինի, որովհետև սա մեզ կուրացնում է ու մենք չենք տեսնում մեր պրոբլեմը, մեր անկումը ու բանակի անկումը, այն անկումը, որ ունեցել ենք երկար տարիներ»,- ասաց նա ընդգծելով, որ մենք նաև մեր բոլոր չարած գործերն ենք լցնում ենք բանակի գլխին։

«Ասում ենք՝ բանակը կգործի, մեր զինվորը, իրա ցավը տանեմ, կուչ եկած, սառած՝ կանի ինքը, բոլորի դեմ կկռվի, ինքը գիտե՞ք՝ ում սերունդնա՝ Տիգրան Մեծի, հեսա ստեղից տալու ա, դուրս գա Մադագասկար կղզի։ Չմտածեք որ բանակը սիրում ենք, դրա համար ենք անում, անում ենք, որ գցենք իր վրա, էդ խեղճուկրակ զինվորի վրա»,- հայտարարեց Նիկոլ Փաշինյանը։

Աղբյուր` Փաստինֆո