Փաստ ինֆո

Երբ ասում եք, որ հերոս հանրային ծառայողները իրենց մասնավոր միլիոնանոց աշխատանքը թողել, եկել են պետական սեկտորում են աշխատում, միանգամից հիշում եմ ձեր կառավարության Տաթևիկ Ռևազյանին, ով դրանով էր հպարտանում, նա այլանդակեց ՀՀ ավիացիան, որ մինչև հիմա չեք կարողանում իր գցած փոսից հանել: Այս մասին ԱԺ-ում 2025-ի բյուջեի նախագծի քննարկման ժամանակ ասաց «Հայաստան» խմբակցության պատգամավոր Արթուր Խաչատրյանը:

«Խոսում եք արտագաղթի անիվը հետ պտտելու մասին: Ինձ կասե՞ք, թե այս տարվա առաջին 6 ամիսների ընթացքում Հայաստանից ՀՀ անձնագիր ունեցող քանի քաղաքացի է մեկնել: Սալդոյի մասին եմ խոսում:

Ասում էք՝ աշխատատեղեր են ստեղծվել, կասեք այս տարվա առաջին 6 ամիսներին ՀՀ-ում կրճատված աշխատատեղերի քանակի մասին, մասնավոր սեկտորում:

Երրորդը, ասում եք՝ ծախսերի արդյունավետություն: Ինչո՞ւ ձեր կառավարությունն այս տարվա բյուջեի մեջ հանկարծ որոշեց 3-րդ հավելվածից հանել միջոցառումների նկարագրությունը՝ դրանով ծրագրային բյուջեն դեգրադացնելով և բերելով ծախսային բյուջեի: Ինձ հետաքրքիր է, դա կառավարության գիտակցվա՞ծ քաղաքականությունն է, թե՞ ոլորտային նախարարություններն այնքան վատ նկարագրություն են բերել, որ դուք ամաչել եք դա այստեղ ներկայացնել»,-ասաց ընդդիմադիր պատգամավորը:

Ի պատասխան ֆինանսների նախարար Վահե Հովհաննիսյանը նախ ասաց, որ հիմա կդժվարանա այդ բոլոր թվերը ներկայացնել, բայց գրավոր կներկայացնեն, ապա շարունակեց. «Կարծում եմ՝ աշխատատեղեր կրճատվում են և ավելանում են: Այստեղ կարևոր է սալդոն: Այո, կարող են աշխատատեղեր կրճատվել և մարդիկ մի տեղից տեղափոխվեն մի ուրիշ տեղ:

Ինչ վերաբերում է հավելվածից նկարագրությունը հանելուն՝ մենք նպատակ ենք հետապնդում բյուջետային փաստաթուղթը հնարավորինս թեթևացնել ու մատչելի դարձնել։ Քանի որ առաջին հավելվածում այդ նկարագրություններն առկա են՝ մենք մտածել ենք կրկողություն հանել։ Բայց մենք դա կարող ենք հետ բերել»:

Արթուր Խաչատրյանն էլ հայտարարեց. «Դուք չեք ասում՝ ես ասեմ, ջհանդամ գյոռ: Ուրեմն, երկրորդ եռամսյակում նոր ստեղծված աշխատատեղեր՝ 15 700, կրճատված աշխատատեղեր՝ 16 900, մասնավոր հատվածում ստեղծվել է 12 300, 12. 700՝ կրճատվել է: Այսինքն, դուք խոսում եք, որ ստեղծվում են աշխատատեղեր, բայց մենք տեսնում ենք, որ աշխատատեղերը կրճատվում են: Դուք խոսում եք, որ հեսա-հեսա գալու ենք՝ շրջենք պատմության անիվը, բայց Հայաստանի փաստաթղթերով բացասական սալդոն կազմում է 20 366 մարդ։ Գուցե թողնեք պատմության անիվը նորմալ գնա, որքան փորձում եք շրջել, այդքան ավելի վատ է լինում»:

Ֆինանսների նախարարի խոսքով, զբաղվածության ցուցանիշները եռամսյակներով նայելը ճիշտ չէ, քանի որ կա սեզոնայնության էֆեկտը: «Ամեն տարի առաջին եռամսյակում աշխատատեղերի տեղը կրճատվում է, հետո ավելանում է»։

Աղբյուր` Փաստինֆո