Փաստ ինֆո

Առաջին անգամ չէ, որ Ազգային ժողովի նախագահի պաշտոնը զբաղեցնող անձն իր պաշտոնին անհարիր վարքագիծ է դրսևորում լրատվամիջոցի ներկայացուցիչների նկատմամբ։ Երբեմն նաեւ կամայական որոշումներ կայացնում՝ նրանց մուտքն ու ելքը սահմանափակելով, սա առաջին դեպքը չէ, մենք բազմաթիվ անուններ կարող ենք նշել։ «Փաստինֆո»-ի հետ զրույցում ասաց «Մեդիահաբի» գլխավոր խմբագիր Լիա Խոջոյանն անդրադառնալով լրագրող Վահե Մակարյանին ԱԺ-ում հավատարմագրունից զրկելու որոշմանը, որով լրագրողը փաստացի զրկվում է իր մասնագիտական գործունեությունն իրականացնելու հնարավորությունից։

«Հիմա հերթը հասել է Վահե Մակարյանին և, բնականաբար, ես սա նորմալ պրակտիկա չեմ կարող որակել, քանի որ ԱԺ նախագահի մոտ նաև որոշակի անձնական մոտեցումներ կան Վահե Մակարյանի նկատմամբ, բայց նա պետք է հիշի, որ Վահեն Մակարյանը ներկայացնում է կոնկրետ լրատվամիջոց, և կոնկրետ լրատվամիջոցը պատրաստվում է դատական կարգով այդ հարցի լուծումը տալ։ Իմ գնահատմամբ՝ որևէ հիմք չկա նրան հավատարմագրումից զրկելու և մենք այդ հարցը իրավական ճանապարհով փորձելու ենք կարգավորել»,- նշեց գլխավոր խմբագիրը։

Նրա դիտարկմամբ՝ լրագրողին հավատարմագրումից զրկելու համար ներկայացված հիմնավորումները չափազանց անհեթեթ են։ «Վստահ եմ, եթե անաչառ դատավոր լինի՝ մենք շատ հանգիստ կշահենք դատարանում, քանի որ բերված փաստարկները ուղղակի անհեթեթության ժանրից են»։

Խոջոյանը նաև պատմեց, որ Ալեն Սիմոնյանի ու լրագորղի միջեւ արձանագրված միջադեպի հաջորդ օրը վերջինս չի կարողացել մուտք գործել ԱԺ։ «Իր դիմաց «-» նշան է դրած եղել։ Վահեն կապ է հաստատել ԱԺ նախագահի խոսնակի հետ, նա ասել է, որ թյուրիմացություն է եղել և թույլ են տվել մտնել ԱԺ։ Հաջորդ օրը մեզ տեղեկացրել են, որ նրան զրկել են հավատարմագրումից»,- նշեց Լ. Խոջոյանն՝ ավելացնելով, որ ներքին կարգով տեղեկացել են, որ գործընթաց է գնում որպեսզի կանխեն նաև հունվարից՝ գարմանային նստաշրջանում Վահե Մակարյանի հավատարմագրումը մերժելու համար։

«Թե ինչ հիմնավորմամբ են դա անելու՝ չգիտենք։ Ամեն դեպքում մենք սպասում ենք՝ տեսնենք, թե ինչ հիմնավորմամբ են լրատվամիջոցի ներկայացուցչին զրկելու հավատարմագրման իրավունքից՝ արդեն հաջորդ նստաշրջանի համար»,-ասաց Խոջոյանը։

Աղբյուր` Փաստինֆո