Փաստ ինֆո

Դատավորներ Մխիթար Պապոյանի, Դավիթ Գրիգորյանի, փաստաբան Ալեքսանդր Սիրունյանի հաղորդումների հիման վրա հարուցված, ապա՝ մեկ վարույթում միացված քրեական գործով ավելի քան հինգ տարի է, ինչ նախաքննություն է իրականացվում, սակայն ո՛չ Ալեքսանդր Սիրունյանը, ոչ «Վանոյի Արտակը» պատասխանատվության չեն կանչվել՝ դատավորների զրպարտելու համար, իսկ դատախազությունը գործի քննության ողջամիտ ժամկետների խախտում չի տեսնում։ Ասել է թե՝ դատախազն էլ, քննիչն էլ համերաշխ են գործի քննության ձգձգման հետ։ Գործը պահվում է՝ առիթից առիթ հիշելու կամ հիշեցնելու, գուցե նաեւ ոմանց վերահսկելու համար։

Հիշեցնենք, որ քրեական գործը հարուցվել է ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորումը փոխելու եւ անձնական երաշխավորություն կիրառելու մասին դատավոր Դավիթ Գրիգորյանի 2019թ մայիսի 18-ի որոշումից հետո: Նախ` փաստաբան Ալեքսանդր Սիրունյանը դատավոր Դավիթ Գրիգորյանին սոցիալական ցանցում մեղադրեց կոռուպցիայի մեջ, ինչին անմիջապես արձագանքեց դատավորն ու հաղորդում ներկայացրեց, որ ստուգեն փաստաբանի հայտնած տվյալները ու կամ իրեն մեղադրանք առաջադրեն` կաշառակերության համար, կամ փաստաբանին` սուտ մատնության: Ինչպես գիտենք` դատավորին նման մեղադրանք չի առաջադրվել, այսինքն՝ այս 4 տարիների ընթացքում ԱԱԾ-ն օգտագործելով իր օպերատիվ ռեսուրսները չի գտել նման որեւէ ապացույց, բայց դատավորին վարկաբեկելու համար փաստաբանի գործողություններին գնահատական չի տրվել: Թերեւս չունեն թույլտվություն՝ փաստաբանին մեղադրանք առաջադրելու համար։

Մյուս դրվագը վերաբերում է վերաքննիչ քրեական դատարանի դատավորներ Արշակ Վարդանյանին, Մխիթար Պապոյանին ու դատարանի նախագահ Վազգեն Ռշտունուն: Ֆեյսբուքյան օգտատեր Արտակ Գալստյանը, որը հայտնի է որպես «Վանոյի Արտակ», գրառում էր կատարել, թե այդ որոշումը Դավիթ Գրիգորյանի փոխարեն գրվել է դատավորներ Մխիթար Պապոյանի, Վազգեն Ռշտունու և Արշակ Վարդանյանի կողմից:

Մխիթար Պապոյանը հաղորդում էր ներկայացրել իրեն զրպարտելու վերաբերյալ, որի հիման վրա ԱԱԾ-ում հարուցվել է քրեական գործ՝ ՀՀ ՔՕ-ի 344-րդ հոդվածի 2-րդ մասով, այն է` դատավորին զրպարտելը: 2,5 տարի ԱԱԾ-ում իրականացված քննության արդյունքում, ի վերջո, դատավորներ Դավիթ Հարությունյանը, Մխիթար Պապոյանը, Արշակ Վարդանյանը տուժող են ճանաչվել, իսկ դատավորներ Վազգեն Ռշտունին և Արման Հովհաննիեսյանը՝ հարցաքննվել։ Ընդ որում, թեև քրեական գործը հարուցված է դատավորներին զրպարտելու մասին հաղորդման հիման վրա, օրենքի խախտմամբ օպերատիվ միջոցառումներ են իրականացվել հենց դատավորների նկատմամբ։

«Փաստինֆո»-ն գրավոր հարցմամբ դիմել է թե՛ ՀՀ գլխավոր դատախազությանը, թե՛ ՔԿ-ին՝ պարզելու, թե ինչ փուլում է քրեական վարույթը, արդյո՞ք մեղադրյալներ կան գործով, թե՝ ոչ, ՔԿ վարույթում գտնվելու ընթացքում հարցաքննվել են արդյոք Ալեքսանդր Սիրունյանը, «Վանոյի Արտակը»՝ Արտակ Գալստյանը, դատավորները, արդյո՞ք վերացվել է տուժող դատավորների իրավունքների խախտումները՝ ոչնչացնելով նրանց նկատմամբ իրականացված օհմ-ների տվյալները։ Դատախազությունից նաև հետաքրքրվել ենք, թե արդյոք քրեական վարույթի ողջամիտ ժամկետների խախտման հիմքով քննիչի նկատմամբ ծառայողական քննություն իրականացնելու միջնորդություն ներկայացվել է, թե ոչ։

Երկու կառույցից ստացված պատասխանների համաձայն՝ քրեական վարույթը գտնվում է նախաքննության փուլում, սակայն հարցադրումներին պատասխանելուց երկու կառույցն էլ զերծ է մնացել՝ հղում կատարելով նախաքննական գաղտնիքին, իսկ դատախազությունից նաև հայտնել են, որ քրեական վարույթի ողջամիտ ժամկետների խախտման հիմքով քննիչի նկատմամբ ծառայողական քննություն նշանակելու միջնորդություն չի ներկայացվել։

Այսինքն՝ քրեական գործով շուրջ 5 տարի քննություն իրականացնելու հետ դատախազությունում բոլորովին համերաշխ են։ Ընդ որում, ի սկզբանե՝ քրեական գործի հարուցման պահին՝ մամուլը գրում էր, որ խնդիր էր դրված Ռ․ Քոչարյանի դատավարությունը «յուրայիններին» թողնելու համար որոշ դատավորների վարույթից այն հեռու պահելու , ինչպես նաև՝ քրեական գործը դատավորների գլխին որպես «մահակ» պահելու համար, ինչն էլ փաստացի հաստատվել է՝ դատավորներին զրպարտելու գործով հենց դատավորների նկատմամբ օհմ-ներ իրականացնելով։ Փոխարենը՝ ՔՊ կուսակցության վարչությունը որոշել է փաստաբան Ալեքսանդր Սիրունյանի թեկնածությունը՝ քննարկման ներկայացնել՝ ԲԴԽ անդամի պաշտոնում՝ նրա նկատմամբ քրեական հետապնդում հարուցելու փոխարեն։

Հեղինակ՝ Իզաբել Սահակյան

Աղբյուր` Փաստինֆո