Փաստ ինֆո

«Գոյ» թատրոնի աշխատակիցներն հայտարարել էին, որ երկար պայքարից ու պարապուրդից հետո՝ այսօր վերսկսում են աշխատանքները, այս առնչությամբ նրանք ասուլիս էին հրավիրել, սակայն թատրոնի մուտքը փակ էր նրանց և լրագրողների համար։

Գ. Սունդուկյանի անվան ազգային ակադեմիական թատրոնի տնօրեն Վարդան Մկրտչյանը թույլ չտվեց նրանց և լրագրողներին անցնել դեպի «Գոյ» թատրոն, փոխարենը նրանց հրավիրեց զրույցի արդեն «Սունդուկյանի» ներսում և հայտարարեց, որ ի սկզբանե իրենք հայտարարել են և ասել, որ եթե որևէ դատարան կորոշի, որ կառավարության որոշումը և դրանից բխող գործողությունները սխալ են՝ որևէ խնդիր չեն ունենա «նախկին «Գոյ» թատրոնի աշխատակիցների հետ, որևէ դուռ չի փակվելու», բայց դա պետք է հիմնավորի դատարանը։

«Տևական ժամանակ, մոտ 1 տարի ԿԳՄՍՆ հովանու ներքո տեղի են ունենում բանակցություններ, որոնց հիմնականում ներկա են լինում Աշոտ Տեր-Մաթևոսյանը, Սարգիս Արզումանյանը»։

«Գոյ» թատրոնի ներկայացուցիչները նրան ընդհատեցին, Սարգիս Արզումանյանը նշեց, որ ցանկանում են իրենք ներկայացնել, թե ինչ են անելու, սակայն Մկրտչյանը թույլ չտվեց շարունակել. «Ներողություն, մի ընդհատեք, դուք այստեղ չեք պարտադրում։ Ես ասելիք ունեմ, ես այս մարդկանց ներս եմ հրավիրել»։

Սարգիս Արզումանյանն էլ նշեց, որ իրենք են հրավիրել լրագրողներին։ «Դուք հիմա այստեղ այլ բաներ եք խոսում։ Եկեք խոսենք այն մասին, ինչի համար հավաքվել ենք»,-ասաց Արզումանյանը, Աշոտ Տեր-Մաթևոսյանն էլ ասաց, որ վստահ է, որ Մկրտչյանը կարող է ցանկացած պահի հանդիպել լրագրողների հետ, սակայն Մկրտչյանը նրանց թույլ չտվեց շարունակել։
«Գոյ» թատրոնի ներկայացուցիչները լքեցին հանդիպումը։

Մկրտչյանն էլ ասաց, որ անցած ժամանակահատվածում մի շարք առաջարկներ են դրվել սեղանին։ «Առաջին առաջարկը եղել է, այն որ աշխատակիցները դառնում են Սունդուկյանի անվան թատրոնի «Գոյ» փորձարարական կոնտրոնի աշխատակիցներ, պահում են իրենց գեղարվեստական ազատությունը։ Աշոտն այդ առաջարկը բոլորի անունից կտրականապես մերժել է։ Որից հետո բանակցային գործընթացն իրենց վրա են վերցրել ՔՊ-ական պատգամավոր Նարեկ Բաբայանը և ավագանու անդամ Տաթևիկ Հովակիմյանը։ Ես բանակցային գործընթացքոււմ միացել եմ վերջնամասում։ Երկրորդ առաջարկը եղել է այն, որ «Գոյ» թատրոնը պետք է ստանար կառավարության պիլոտային ծրագրի դրամաշնոր և ունենար անկախ կարգավիճակ։

Այդ հանդիպման ընթացքում Աշոտ Տեր Մաթևոսյանն ասաց, որ իրենք կառավարության 701 Ն որոշման դեմ ոչ մի բողոք չունեն և ոչ մի խնդիր չունեն։ Այդ հանդիպմանը ես եմ եղել, նախարարը և փոխնախարարը։
Հաջորդիվ ես արել եմ ասել եմ, որ տարվա ընթացքում թատրոնը խաղացել է 80-85 ներկայացում։ Ես հարցրել եմ, եթե իրենք շարունակելու են գործել որպես անկախ թատրոն, ապա որոնք են իրենց համար ներկայացում խաղալու լավագույն օրերը, ասել են՝ ուրբաթ, շաբաթ, կիրակի։ Ասել եմ տարվա բոլոր այդ օրերը տրամադրում ենք ձեզ, դա լինում է 122 օր։ Իմ այս առաջարկը նույնպես մերժվել է»,-ասաց Մկրտչյանն՝ ընդգծելով, որ հարցը գտնվում է իրավապահների տիրույթում։

Աղբյուր` Փաստինֆո