Փաստ ինֆո

Ազգային ժողովի նախագահ Ալեն Սիմոնյանը լրագրողների հետ զրույցում վստահեցրեց, որ ՔՊ-ում վերջին նիստի ժամանակ քննադատություններ հնչել են բոլոր ներկաների նկատմամբ։

«Քննարկել ենք տարբեր հարցեր, մեծ կոլեկտիվ է, բնական է, որ մենք մեր մեջ ինչ-որ բաների հետ համաձայն չենք ու դրա մասին պետք է խոսել, որ դրանք հետո չվերածվեն ավելի մեծ խնդրի»,- ասաց նա։

Սիմոնյանի խոսքով՝ ՔՊ-ն այսօր ևս վարչության արտահերթ նիստ է հրավիրել։

Հարցին, թե քննարկվելո՞ւ է Անդրանիկ Քոչարյանին Պաշտպանության հանձնաժողովի նախագահից հեռացնելու հարցը՝ ԱԺ նախագահն ասաց, թե վարչությունում չի քննարկվում մեկին հեռացելու կամ ինչ-որ ձևով պաշտոնանկ անելու հարց։ «Մենք քննարկում ենք այն ինֆորմացիան, որն առկա է ու դրա հիման վրա էլ որոշում ենք կայացնում»,- նշեց նա՝ հավելելով որ այսօրվա նիստը թափուր պաշտոնների շուրջ քննարկում են ունենալու։

Դիտարկմանը՝ թե Անդրանիկ Քոչարյանի հարցը քննարկվելո՞ւ՝ նա պատասխանեց, որ վարչությունը ինֆորմացիա ունի, որի հետ կապված քննարկում է լինելու, իսկ ինքը որևէ մեկի, այդ թվում՝ Քոչարյանի հետ խնդիր չունի։
Լրագրողներն ԱԺ նախագահին հիշեցրին՝ Անդրանիկ Քոչարյանն ակնարկում էր, որ Սիմոնյանին անհանգստացնում է իր վարկանիշի աճը՝ ԱԺ նախագահը քմծիծաղեց. թե «Չէ, չի անհագստացնում»։

Անդրադառնալով լսումներին Գլխավոր դատախազ Աննա Վարդապետյանին վերևում նստեցնելուն՝ նա նշեց, որ չէր կարելի նրան նստեցնել նախագահությունում։ «Տպավորությունն էր, որ ինչ-որ Սովետական Միության դատավարություն է տեղի ունենում, ներքևում էլ ամբաստանյալներն են։ Ես չեմ կարծում, որ իրեն այնտեղ որպես կին են նստեցրել, ինքը ՀՀ գլխավոր դատախազն է, ոչ թե կին»,- նշեց Ալեն Սիմոնյանը։

Աղբյուր` Փաստինֆո