Փաստ ինֆո

Հայաստանն արել է ամեն ինչ, որ COP 29-ը կայանա Բաքվում։ Երկրորդական նշանակություն ունի՝ ՀՀ իշխանությունները կմասնակցեն, թե՝ ոչ։ Կարծում եմ՝ կմասնակցեն, վերջին պահին կհայտնեն՝ մասնակցության մասին։ Այս մասին «Փաստինֆո»-ի հետ զրույցում ասաց ՀՀ առաջին ՄԻՊ Լարիսա Ալավերդյանը։

Հիշեցնենք, որ նոյեմբերի 11-22-ը Բաքվում կկայանա ՄԱԿ-ի Կլիմայի փոփոխության 29-րդ՝ COP29 համաժողովը։ Հայկական կողմը դեռևս պաշտոնապես չի մեկնաբանում ` կմասնակցի արդյոք, թե՝ ոչ։

Ինչ վերաբերում է իշխանությունների պնդումներին, որ COP29-ը՝ Ադրբեջանում անցկացնելու դիմաց 33 գերիներ են վերադարձվել, Ալավերդյանը նշեց, որ գերիների, պատանդների հարցը քաղաքական առևտրի առարկա է դարձվել, այդ կեղտոտ առևտուրը տեղի չէր ունենա, եթե չլիներ ՀՀ օրվա իշխանությունների՝ ավելի քան կրավորական քաղաքականությունը։ Հարցին՝ արդյոք COP29-ը հնարավորություն չէ՞՝ միջազգային հանրության մոտ բարձրաձայնելու գերիների, Ադրբեջանի ցեղասպան քաղաքականության խնդիրները՝ Ալավերդյանը պատասխանեց՝ նշելով․ «Երկրորդն առհասարակ չկա իշխանությունների բառապաշարում։ Ինչ վերաբերում է գերիներին, եթե դա հիշեցվի էլ, ապա դա կլինի քաղաքական առևտրի շրջանակներում։ Ես այն մարդը չեմ, որ չուրախանամ որևէ զինգերու կամ պատանդի վերադառնալով, բայց այս ամենն այնքան պղտոր ջրերի մեջ է, որ Ադրբեջանի այս քաղաքականությունը և այս թողտվությունը՝ ՀՀ օրվա իշխանության կողմից՝ դատապարտելի է »։ ՀՀ-ն, ըստ Ալավեդյանի, այս ընթացքում բավականին հնարավորություններ է ունեցել հնչեցնելու հարցերը, ինչը չի արվել։ Մեր զրուցակիցը նաև հիշեցրեց, որ Ադրբեջանի նախագահը «ձեռք առնելով» էր ասում՝ ինչու չեն պահանջում Ռուբեն Վարդանյանին, մինչդեռ, աշխարհը վրդովված է այն ոչ տեղին և վարչապետի պաշտոնը զբաղեցնող անձին ոչ հարիր արտահայտություններից, որոնք թույլ են տրվել Ռուբեն Վարդանյանի հարցերին։ Հարցին՝ ինչու տեսանելի քայլեր չեն իրականացվում՝ գերիների վերադարձի համար, արդյոք այս իշխանությունները չեն ցանկանում Արցախի ռազմական-քաղաքական ղեկավարությանը տեսնել ՀՀ-ում՝ Ալավերդյանը պատասխանեց՝ ունի հիմնավոր կասկածներ, որ ընդհանրապես գերիների մեծ մասը գերության մեջ են հայտնվել մեր իշխանությունների այնպիսի գործողությունների շրջանակներում, որոնց առնչությամբ պետք է քննություն իրականացվի, պարզվի՝ ինչու։ Ալավերդյանը հիշեցրեց, որ Արցախի նախագահների հետապնդումը սկսել է ՀՀ-ում՝ 2018թ․-ից հետո, Ադրբեջանը ճնշման ներքո է հայտնվել, պետք է շարունակի։

«Ոչ մի իշխանություն հավերժ չէ, անպայման կգա պահը, որ ամենամութ էջերն անպայման կբացահայտվեն։ Ես ունեմ հիմնավոր կասկած, վարկածներ, որ այս օրվա իշխանությունը ՀՀ-ում՝ ունի իր պատասխանատվության բաժինն այն իրավիճակի համար, որում հայտնվել են մեր հայորդիներն՝ Ադրբեջանում»,- ասաց Ալավերդյանը։

Հեղինակ՝ Իզաբել Սահակյան

Մանրամասները՝ տեսանյութում

Աղբյուր` Փաստինֆո