Փաստ ինֆո

Ոստիկանության Նոր Նորքի բաժին նռնակով ներխուժելու գործով մեղադրյալները կշարունակեն մնալ կալանավորված։ «Փաստինֆո»-ի հաղորդմամբ՝ Երևանի ընդհանուր իրավասության քրեական դատարանը՝ դատավոր Մասիս Մելքոնյանի նախագահությամբ, նախնական դատալսումների փուլում, քննության առնելով մեղադրյալներ Վարդգես Գևորգյանի, Արթուր Մովսիսյանի, Ստեփան Հովակիմյանի խափանման միջոցների հարցը՝ որոշել է ևս երեք ամսով երկարացնելու նրանց կալանքի ժամկետը։

Հատկանշական է, որ խափանման միջոցի քննարկման ժամանակ Արթուր Մովսիսյանի և Վարդգես Գևորգյանի պաշտպանները պնդել են, որ իրենց պաշտպանյալների արարքում ընդհանրապես բացակայում է հանցակազմը․ քանի որ նրանք իրականացրել են հեղափոխություն և փորձել են փրկել հայրենիքը թշնամուն հանձնելուց: Միևնույն ժամանակ՝ միջնորդել այլընտրանքային խափանման միջոց կիրառել, ինչը մերժվել է։

Հիշեցնենք, որ մարտի 24-ին նռնակով զինված երեք տղամարդ, որոնք, ինչպես պարզվել է հետագայում, «ԱԺԲ» աջակիցներ են, փորձել են ներխուժել Ոստիկանության Նոր Նորքի բաժին։ Ոստիկանության շենքի մոտ նռնակ են պայթեցրել, ինչի հետևանքով նռնակով զինված անձանցից երկուսը բեկորային վիրավորվում են ստացել՝ իրենց իսկ նռնակներից եւ տեղափոխվել են հիվանդանոց։ Երրորդ տղամարդուն վնասազերծել է ԱԱԾ հատուկ նշանակության «Ալֆա» ջոկատը։ Դեպքի առթիվ ախաձեռնվել է քրեական վարույթ ՝ ՀՀ քրեական օրենսգրքի 308-րդ հոդվածի 1-ին մասի (ահաբեկչություն) հատկանիշներով։ Նրանց մեղադրանք է ներկայացվել ՀՀ քրեական օրենսգրքի 308-րդ հոդվածի 1-ին մասով (ահաբեկչությունը) և 335-րդ հոդվածի 2-րդ մասով (խմբի կազմում հրազենի, դրա հիմնական բաղկացուցիչ մասերի, ռազմամթերքի և այլ նյութերի, սարքերի, առարկաների ապօրինի շրջանառությունը) նախատեսված հանցավոր արարքներ կատարելու համար։

Հեղինակ՝ Իզաբել Սահակյան

Աղբյուր` Փաստինֆո