Փաստ ինֆո

Այն բովանդակությունը, որ մենք առաջարկել ենք՝ հասարակության համար պարզ, հասկանալի և բացահայտված են։ Այս մասին ԱԺ-ում կառավարության հետ հարցուպատասխանի ընթացքում ասաց ՀՀ վարչապետ Նիկոլ Փաշինյանն՝ անդրադառնալով «Հայաստան» խմբակցության պատգամավոր Արթուր Խաչատրյանի դիտարկմանը, թե երբ այս կառավարությունը նոր էր ձևավորվում՝ Փաշինյանը խոստանում էր որևէ հարց ժողովրդի թիկունքում չլուծել և ցանկացած հարց քննարկել ժողովրդի հետ։

Պատգամավորն ընդգծեց, որ հիմա Հայաստանն ու Ադրբեջանը մի գործընթաց են սկսել, որն իշխանությունները կոչում են խաղաղության գործընթաց, կոչ են անում Ադրբեջանին շրջանառվող փաստաթղթից, որը գաղտնի է պահվում հասարակությունից, ծաղկաքաղ անել և այդ փաստաթուղթը ստորագրել։ «Ճիշտ չէ՞ր լինի այդ 13 համաձայնեցված հոդվածները ներկայացնել հասարակությանը, պարզել՝ արդյո՞ք հասարակությունը համաձայն է այդ պայմաններով թղթի ստորագրմանը, հետո նոր Ադրբեջանի հետ այդ թուղթը ստորագրել»,-ասաց Խաչատրյանը՝ խնդրելով ներկայացնել համաձայնեցված 13 կետերի բովանդակությունը։

Փաշինյանն ասաց, որ այդ կետերին ինքն անդրադարձել է ասուլիսներում, հարցուպատասխաներում։ «Եթե գաղտնիքի մասին եք խոսում, ապա գաղտնիքի խնդրի չկա, զուտ դիվանագիտական կոռեկտության խնդիր կա, որ ես չեմ կարող հիմա պահել այդ թուղթը ու ասել՝ առաջին կետում սա է գրած, 2-րդում՝ սա է գրած, 3-րդում՝ սա է գրած։ Գաղտնիքի հարց չէ, դիվանագիտական կոտեկտության հարց է, որ աշխատանքային փաստաթուղթ է ու միակողմանի նման բան անելը կոռեկտ չի»,-ասաց նա՝ ընդգծելով, որ վերջին ասուլիսում, ՄԱԿ-ի ամբիոնից ու նաև ԱԺ-ից ամեն բան հրապարակված է։

«Խոսք է գնում դիվանագիտական հարաբերությունների հաստատման մասին, խաղաղության պայմանագրի ընթացքը մոնիթորինգի հսկող երկկողմ հանձնաժողովի մասին է խոսք գնում, միմյանց տարածքային ամբողջականությունը ճանաչելու և տարածքային պահանջների մասին է խոսք գնում։ Այսինքն, պայմանագրի նախագծում միջազգային դիվանագիտական պրակտիկայից անհայտ որևէ բան չկա։ Կարող եմ ասել, որ ամբողջ բովանդակությունն առնվազն հայեցակարգային մակարդակով, որը ճշգրիտ արտահայտում է տեքստային մակարդակը՝ ժողովրդի համար բացահայտված է»,-ասաց նա՝ հավելելով, որ ժողովրդի հետ պարբերաբար հանդիպումներ ու քննարկումներ այդ հարցերի շուրջ ունենում է։

Խաչատրյանը անդրադառնալով կոռեկտությանը, որի մասին խոսում էր Փաշինյանը՝ ասաց, որ սատանան մանրուքներում է և հավանաբար այդ «մանրուքներն են», որ բերում են խոչընդոտի։ Նա նաև նշեց, որ իր կարծիքով պետք է հստակ հրապարակել այդ 13 կետերը, ապա նաև, եթե պետք է՝ այն հանրաքվեի դնել։

Փաշինյանն ասաց, որ հոդվածների հրապարակումը այն կողմին ով չի ուզում ստորագրել խաղաղության պայմանագիր, առիթ կտա ասելու, որ խախտված են դիվանագիտական էթիկայի բոլոր նորմերը։ «Որ ասում եք մեր նկատմամբ ոչ կոտեկտ են՝ կարծում եմ դա նպատակ ունի, մեզ հավասարակշռությունից հանել և մեզ դնել իրենց նպատակադրումների ռելսերի վրա։ Այստեղ անձնական հարց չի, այլ պետական, անվտանգային հարց է, իսկ բովանդակաությունը ամբողջապես հրապարակված է»։

Աղբյուր` Փաստինֆո