Փաստ ինֆո

ԲԴԽ-ն առաջնորդվում է ընթացակարգերով, որոնք ուղղակի օրենքով նախատեսված չեն: Այյս մասին «Փաստինֆո»-ի հետ զրույցում ասաց Երևանի ընդհանուր իրավասության քրեական դատարանի` լիազորությունները դադարեցված դատավոր Դավիթ Հարությունյանը:

Ինչպես արդեն տեղեկացրել ենք` ԲԴԽ-ն երեկ քննել է դատավոր Դավիթ Հարությունյանի գործի վերանայման դիմումը` դռնփակ ռեժիմում` գրավոր ընթացակարգով: Հնարավորություն չի տրվել նաև դատավորին` մասնակցելու, դիրքորոշում, միջնորդություններ հայտնելու: Ընդ որում, ՍԴ-ն արձանագրել էր դատավորի` լսված լինելու իրավունքի խախտումը: Դավիթ Հարությունյանը, սակայն, նշում է` նախկինում կար օրենքով սահմանված ընթացակարգեր, որոնք ԲԴԽ-ն պարբերաբար շրջանցում էր, մինչդեռ, այժմ ԲԴԽ-ն առաջնորդվում է ընթացակարգերով, որոնք ուղղակի օրենքով նախատեսված չեն: Դեռևս չգործող նորմատիվ ակտի հիման վրա են ենթադրաբար իրականացնում այդ գործընթացները, որը որևէ մեկին հասանելի չեն, կանախատեսել չեն` թե իր համար, թե' իրենց համար, ինչը կամայականությունների ռիսկեր է պարունակում:

«Գործընթացի պարզությունն այն է, որ արդեն պարզ է, թե ինչ որոշումներ են կայացվելու, արդյոք պատրաստվում են ՍԴ արձանագրած խախտումները վերացնել, թե` ոչ»,- ասաց Հարությունյանը` նշելով, որ դա առերևույթ բխում է նաև ԲԴԽ-ին ներկայացված դատավորի միջնորդության վերաբերյալ արդարադատության նախարարի պատասխանից, թե այլևս ՍԴ` գործի քննության հրապարակայնությունն ապահովելու անհրաժեշտությունն առարկայազուրկ է:
«Մի կողմից ԲԴԽ նախագահ Կարեն Անդրեասյանը ԱԺ-ում հունիսի 13-ին հայտարարում է, որ ինքն ուրախ է, որ ՍԴ-ն նման որոշում է կայացրել, դա ևս մեկ հնարավորություն է իրենց համար` գործի վերանայման, բայց ստացվում է, որ, երբ գործն արդեն իսկ պետք է Դատական օրենսգրքի 157-րդ հոդվածի, Վարչական դատավարության օրենսգրքի համապատասխան օրենքի կանոններով վերանայվեր, կիրառվում են այնպիսի նորմեր, որոնք հնարավորություն չեն տալիս իրականացնել դռնբաց հրապարակային բանավոր դատավարություն, ինչով ուղղակիորեն ցույց են տալիս իրենց դիրքորոշումը` ՍԴ որոշման պահանջներն իրագործելու ցանկության բացակայության մասին»,- նշեց Դավիթ Հարությունյանը:

Իսկ թե ինչ խնդիր են լուծում` փակ դռների հետևում որոշումներ կայացնելով, ինչու են խուսափում հրապարակայնությունից` Հարությունյանը նշեց, որ նրանց մոտիվացիաները գնահատվելու որևէ հնարավորություն չունի, այն կանխավարկածները, որոնցով իրենք են առաջնորդվում` իրեն հասանելի չեն:

Բացի այդ, ԲԴԽ անդամների մի մասը նախկինում արդեն իսկ մասնակցել է Դավիթ Հարությունյանի գործով քննությանը, ինչի առնչությամբ ՍԴ-ն արդեն իսկ արձանագրել է իրավունքների խախտումը, ինչը բացարկի հիմք է:

«ԲԴԽ-ն վերջին 1-2 տարում դադարեցրեց մի շարք դատավորների լիազորություններ` այն պատճառաբանությամբ, թե վերջիններս խախտել են անձանց սահմանադրական իրավունքներ` ՄԻԵԴ վճիռների հիման վրա: Ստացվում է իրավիճակ, որ նույն դատավորները, գիտնական անդամները, որոնք հանդես են գալիս իբրև դատավորներ, կատարել են գործողություններ, ինչի արդյունքում խախտվել է անձի` սահմանադրական իրավունքները, ինչն արձանագրվել է ՍԴ որոշմամբ: Եթե գնահատելու լինենք, ապա արդյոք բացարկի հարց չպետք է քննարկվի: Մեր ձեռքի տակ կան փաստեր, որ ԲԴԽ անդամներից մեկը առանց ծանոթանալու է որոշումը ստորագրել, տեղյակ չի եղել, թե ինչ է գրված, կան տեղեկություններ, որ ԲԴԽ գործող անդամներից մեկը իմ հասցեին կատարել է իրականությանը չհամապատասխանող տեղեկություններ: Նաև այս հարցերը պարզելուց և վերջիններիս դիրքորոշումները լսելուց հետո է հնարավոր լիարժեք ներկայացնել ինքնաբացարկի միջնորդությունները: Ոչ պակաս կարևոր է պարզել ԲԴԽ այն անդամի ինքնությունը, ով Կարեն Անդրեասյանի հետ արգելում էր փաստաբաններին մուտք գործել նիստերի դահլիճ, այսինքն` հաստատապես տեղյակ էր և հանդիսանում էր Կարեն Անդրեասյանի զրուցակիցը»,- նշեց Հարությունյանը:

Անդրադառնալով դատական համակարգում վերջին զարգացումներին, մասնավորապես` «չաթի արտահոսքի» հետևանքով համակարգը լքած դատավորներին, որոնք համարվում էին լավագույններից, իսկ, ըստ չհերքված լուրերի, չաթի մասնակից դատավորներից մեկը առաջխաղացում է ունեցել` Հարությունյանը նշեց. «Անշուշտ այն դատավորները, որոնց մասին խոսում եք, լավագույն դատավորներից էին.

ՀՀ լավագույ ն իրավաբաններից էին, իսկ այն անձը, ում մասին նշեցիք` առաջխաղացում է ունեցել, ցավոք նույնը չեմ կարող ասել»:

Հեղինակ՝ Իզաբել Սահակյան

Աղբյուր` Փաստինֆո