Փաստ ինֆո

Հայաստանի ամենախոշոր արտահանող «Սպայկա» ընկերությունից հրաժարվում են մեկնաբանել, թե ինչո՞ւ են դարձել Երեւանի փոխքաղաքապետ Արմեն Փամբուխչյանի 71-ամյա թոշակառու հորը միլիարդավոր դրամների վարկի երաշխավորը:

«Փաստինֆո»-ի հարցմանն ի պատասխան ընկերության իրավաբանական վարչության պետ Մհեր Ղազարյանը նախ չցանկացավ մեկնաբանել, իսկ հետո ուղղակի նշեց, թե «սովորական բիզնես։ Այլ մեկնաբանություն չեմ կարող ասել»:

Մեր հարցին, եթե «սովորական բիզնես» է, ապա բացի Երևանի փոխքաղաքապետ Արմեն Փամբուխչյանի հորից, քանի՞ թոշակառու այլ ՀՀ քաղաքացիների համար է «Սպայկա» ընկերությունը երաշխավորություն տվել հայաստանյան կամ արտերկրի բանկերում՝ սեփական բիզնես սկսելու նպատակով միլիադների գումար ստանալու համար, Ղազարյանը կրկնեց, որ թեման չեն մեկնաբանում:

Հիշեցնենք, որ շաբաթներ առաջ «Սիվիլնեթ»-ը հրապարակել էր, որ Արմեն Փամբուխչյանի հայրը՝ Սոկրատ Փամբուխչյանը, որը մինչեւ որդու պաշտոնյա դառնալը երբեք որեւէ ընկերությունում տնօրեն կամ բաժնետեր չի եղել, անցած տարվա հուլիսին հիմնադրել է «Սանգարդեն» ընկերությունը: 71-ամյա պապիկը 40 հեկտար մակերեսով հողեր է ձեռք բերել Արմավիրի մարզի Շենիկ գյուղում, արդեն կառուցել է ջրավազան, իսկ նոյեմբերից կսկսի ծառատունկը: Բանկը նրան տրամադրել է 1,5 միլիարդ դրամի վարկ (մոտ 3.8 մլն դոլար), վարկավորման երաշխավորը «Սպայկա» ընկերությունն է:

Ըստ ամենայնի՝ հենց «Սպայկայի» երաշխավորությունն է նպաստել, որ բանկը 71-ամյա թոշակառուին միլիարդների վարկ տրամադրի։ Սովորաբար թոշակառուներին՝ նման մեծ գումարների վարկեր, առավել եւս երկարաժամկետ բանեկրը չեն տրամադրում, անգամ երիտասարդ, աշխատունակ քաղաքացիների պարագայում միլիոնների հասնող վարկի հարցում բանկերը մանրազնին քննություն են իրականացնում և մի քանի երաշխավոր պահանջում, իսկ այս դեպքում խոսքը շուրջ 3,8 միլիոն դոլարի մասին է, որի ռիսկերն իր վրա է վեցրել «Սպայկան»: Թե ինչո՞ւ են մնան «լավություն» արել Արմեն Փամբուխչյանին, ընկերությունից չեն պարզաբանում:

«Փաստինֆո»-ի հարցին՝ քպական փոխքաղաքապետի ընտանիքի հետ՝ ի դեմս նրա հոր, նման «բիզնես հարաբերության» մեջ մտել են սեփական կամքով, թե՞ ստվերային պայմանավորվածության արդյունքում, գործարքի կամ գուցե սպառնալիքի պատճառով, իսկ գուցե հիշեցրել են 17 մլն դոլարի պետությանը պատճառած վնասի մասին՝ Ղազարյանն ասաց, որ դա «սև PR» է։ «Ես դրա համար քոմենթ չեմ տալիս։ Առարկայազուրկ հրապարակումներ են»։

Նկատենք, որ Մ.Ղազարյանի կողմից «Սեւ PR» որակված հրապարակումների հիմքը ՀՀ ՊԵԿ-ի պաշտոնական հաղորդագրուններն են, որոնց համաձայն «Սպայկա» ընկերության գլխավոր տնօրենին մեղադրանք է առաջադրվել 18.04.2003թ.-ին ընդունված և մինչև 01.07.2022թ.-ին գործած՝ ՀՀ քրեական օրենսգրքի 205-րդ հոդվածի 2-րդ մասով և 38-205-րդ հոդվածի 2-րդ մասով: Նախաքննության ընթացքում «Սպայկա» ընկերության տնօրենն իրեն մեղավոր է ճանաչել և պատրաստակամություն հայտնել օժանդակել նախաքննությանը և պետական բյուջե վճարել հաշվարկված լրացուցիչ հարկային պարտավորությունները:

Նախաքննական մարմնի հետ համագործակցելու որոշումից հետո ընկերության տնօրենը կալանքից ազատ արձակվեց, իսկ վերջերս էլ մասնավոր մի խումբ բեռնափոխադրողներ տեղի ունեցած ակցիայիում «Սպայկա» ընկերությանը մեղադրեցին իշխանության հետ համագործակցաբար ոլորտում մենաշնորհ հաստատելու մեջ։

Դիտարկմանը, թե կոռուպցիոն խնդիր չի տեսնում, երբ նման բիզնես հարաբերություններ են հաստատվում պետական պաշտոնյայի հարազատի և խոշորագույն ընկերության միջև՝ նա կրկնեց սա իրենց համար սովորական բիզնես է։

«Փաստինֆոն» կփորձի իրավապահներից պարզել՝ արդյոք հարուցվե՞լ է վարույթ առերևույթ կոռուպցիոն հանցակազմ պարունակող այս դեպքով, թե ոչ:

Աղբյուր` Փաստինֆո