Փաստ ինֆո

Երևանի Հ. Օրբելու անվան դպրոցի, հանրությանն առավել հայտնի «փոսի» դպրոցի աշակերտների ծնողներն ահազանգում են, որ դպրոցի աշակերտներն արդեն երկրորդ օրն է դասի չեն գնում։ Պատճառը իրենց բնորոշմամբ՝ դպրոցի մոտակայքում ընթացող «ֆանտաստիկ, դարակազմիկ» շինարարությունն է, որը վտանգավոր է համարվում դպրոցի շենքի համար։

Ֆեյսբուքյան օգտատեր Նարի Սյունին մասնավորապես գրում է. «Դասի ժամանակ լսվող աղմուկի մասին չեմ խոսում, զավեշտն էն է, որ աշակերտների մի զգալի մասն ապրում է մոտակայքում ու, միևնույն է, վայելելու է թե ձայները, թե դղրդոցները, ուղղակի արդեն թե օֆլայն, թե օնլայն։

Ընդ որում, առաջին օրը դաս չանելու պատճառն էլ չեն ասել, երեկոյան հայտնել են, որ՝ այսպես և այսպես, դասերը մի շաբաթ օնլայն կլինեն։ Ամենահավես պահը․ էս շինարարությունը մի շաբաթից չի ավարտվելու, անգամ մի տարուց չի ավարտվելու»։

Կարեն Վրթանեսյանը գրառման ներքո նշել էր, շինարարությունն իրականացվում է առանց շինթույլտվության։ Ալեքսեյ Չալաբյանն էլ նշում է, որ «առանց թույլտվության սկսել են 5 հատ 35 հարկանի երկնաքեր սարքել 2 դպրոցի ու 3 մանկապարտեզների արանքը»։

Քաղաքապետարանի լրատվության վարչությունից «Փաստինֆո»-ին հայտնեցին, որ Երևանում քաղաքապետարանի ենթակայությամբ գործող միակ դպրոցը, որ անցել է հեռավար ուսուցման 172 դպրոցն է։ «Օրեր առաջ դպրոցի տնօրենը դպրոցում ինչ-որ ցնցում, շարժ է զգացել կոնստրուկցիաների։ Ինքը օրենքով սահմանված կարգով տեղյակ է պահել համապատասխան կառույցների, այդ թվում՝ փրկարար ծառայությանը։ Վերջիններիս կողմից ուսումնասիրություն է արվել ու որոշվել է անվտանգության նկատառումներով բոլոր դեպքերում պետք է ժամանակավորապես դադարեցնել ֆիզիկապես դասապրոցեսների անցկացումը և անցնել հեռավար դասավանդման։

Դպրոցը 1997 թ-ից 3-րդ աստիճանի վթարայնություն ունի, քանի որ հիմա դասապրոցեսը հեռավար է անցկացվում դպրոցում մենք պետք է երկրաբանական և այլ տեսակի ուսումնասիրություն անենք, որպեսզի փորձենք հասկանալ՝ կոնստրուկցիաների շարժը, որ զգացել է տնօրենը՝ իրականում ինչով է պայմանավորված։ Սա պայմանավորված է 3-րդ աստիճանի վթարայնությամբ, թե մեկ այլ գործոնով։ Մենք շահագրգիռ ենք, որ այդ ուսումնասիրությունները արագ ավարտվեն»։

Հարցին, թե արդյոք սա կարող է պայմանավորված լինել հարևանությամբ ընթացող շինարարությամբ՝մեզ պատասխանեցին, որ մասնագիտական ուսումնասիրությունը կտա բոլոր հարցերի պատասխանը։ «Ենթադրություններով այս դաշտում հետևություններ անել չի կարելի»

Մեր հարցին, թե արդյոք երկնաքերերի կառուցման շինթույլտվությունը քաղաքապետարանը տվե՞լ է. մեզ պատասխանեցին, թե ի՞նչ կապ ունի շինարարությունը դպրոցում առաջացած խնդրի հետ։ «Ես չեմ կարող այս պահին պատասխանել հարցին, թե շինարարությունները թույլտվություն ունեն, թե ոչ, բայց ինչ կապ ունի շինարարությունը դպրոցի վիճակի հետ։ Կարծում եմ, պետք է սպասել՝ հասկանալու համար շինարարությունը կապ ունի՞, թե՞ ոչ»։

Աղբյուր` Փաստինֆո