Փաստ ինֆո

Հայ-ադրբեջանական սահմանազատման և սահմանագծման հանձնաժողովների կանոնակարգի 5-րդ հոդվածը հստակ սահմանում է, որ բոլոր նկարագրություններն ու արձանագրությունները դառնալու են մեկ նկարագրություն ու արձանագրություն և դառնալու են պետական սահմանի մասին կնքվելիք պայմանագրի անբաժանելի մաս։

Այս մասին կառավարության հետ հարցուպատասխանի ընթացքում ասաց ՀՀ փոխվարչապետ Մհեր Գրիգորյանը՝ անդրադառնալով «Հայաստան» խմբակցության պատգամավոր Արթուր Խաչատրյանի հարցին, թե մայիսի 15-ին, երբ հայտարարվեց, որ Տավուշի 4 գյուղերի մինչև սահմանազծի սահմանազատված հատվածների համատեղ կազմած արձանագրության նկարագրությունը վերջացրել են՝ 5 օր անց՝ մայիսի 20-ին Արդարադատության նախարարությունը հայտարարեց, որ հանձնաժողովների հանդիպման արդյունքում տարածված հաղորդագրությամբ նշված 4 գյուղերի հատվածում սահմանազատումը նախնական է, մինչև սահմանազատման գործընթացի ամբողջական ավարտը։
Խաչատրյանը խնդրեց հստակեցնել, թե նախնականի և վերջնականի միջև որքան ժամանակ են նախատեսում, եթե նախնական է՝ ի՞նչ իմաստ ուներ այնտեղ ոչ միայն սյուներ տեղադրել, այլև մի մասը բետոնի, մի մասը ժեշտից պատ կառուցել։

Գրիգորյանի պարզաբանումից հետո Խաչատրյանն ասաց, որ եթե հետ չեք վերադառնալու այդ 4 գյուղերի հատվածին՝ դա չի նշանակում, որ սահմանազատումը նախնական է, դա նշանակում է, որ վերջնական է։ «Եթե դա փոփոխման ենթակա է՝ ինչո՞ւ եք այնտեղ բետոնից պատ դրե՞լ»։

Գրիգորյանը պատասխանեց, որ դա տեխնիկայի հարց է, եթե մարդիկ ավելի լավ կզգան, եթե այնտեղ լինի բետոնից պատ, ապա եթե անգամ դա նախնական է՝ այնտեղ պիտի լինի բետոնից պատ։
«Եթե ուզում եք հարցի իրավական բաղադրիչի մասին խոսել, ապա հարցը ՍԴ-ում է, գնահատականը բոլորիս հասանելի կլինի»

Աղբյուր` Փաստինֆո