Փաստ ինֆո

ՀՀ գլխավոր դատախազությունը հայցադիմում է ներկայացրել Հակակոռուպցիոն դատարան՝ Քաջարանի համայնքապետ Մանվել Փարամազյանի գույքի բռնագանձման պահանջով։ Այս մասին «Փաստինֆո»-ի գրավոր հարցմանն ի պատասխան հայտնել են ՀՀ գլխավոր դատախազությունից։

Հիշեցնենք, որ ապօրինի ծագման գույքի բռնագանձման վարույթի շրջանակներում Մանվել Փարամազյանը և նրան փոխկապակցված անձինք հունիսի 21-ին հրավիրվել էին ՀՀ գլխավոր դատախազություն՝ ծանոթանալու և դիրքորոշում հայտնելու վարույթի առնչությամբ, ինչպես նաև՝ ներկայացնելու հայտարարագիր։

ՀՀ գլխավոր դատախազությունից «Փաստինֆո»-ի գրավոր հարցմանն ի պատասխան հայտնել են, որ Մանվել Փարամազյանին պատկանող գույքի առնչությամբ 2021թ․ հուլիսի 22-ին ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչությունում սկսված ուսումնասիրությամբ 2024թ հունիսի 13-ին կազմվել է ուսումնասիրության նախնական արդյունքների վերաբերյալ ամփոփագիր, որով որոշվել է ձեռնարկել «Ապօրինի ծագում ունեցող գույքի բռնագանձման մասին» ՀՀ օրենքով նախատեսված միջոցներ՝ապօրինի ծագում ունեցող գույքի բռնագանձման հայցի հարուցման ուղղությամբ, ինչպես նաև՝ ՀՀ հակակոռուպցիոն դատարան ներկայացնել հայցի նախնական ապահովման միջոց կիրառելու մասին դիմում։

«Օրենքի իմաստով Մանվել Փարամազյանին պատկանող գույքերի նկատմամբ արգելանքի միջոցներ կիրառելուց հետո Մանվել Փարամազանը և նրան փոխկապակցված անձինք հրավիրվել են ՀՀ գլխավոր դատախազություն՝ ուսումնասիրության նյութերին ծանոթանալու և դիրքորոշում հայտնելու նպատակով։ 2024թ․ հունիսի 20-ին Մանվել Փարամազյանի փաստաբանը ծանոթացել է ուսումնասիրության արդյունքների նախնական ամփոփմանը, ինչպես նաև՝ վերջինին տրամադրվել են ուսումնասիրության արդյունքում հավաքված նյութերը։ 2024թ հուլիսի 19-ին կազմվել է ուսումնասիրության արդյունքների վերջնական ամփոփման վերաբերյալ եզրակացություն, և նույն ամսի 22-ին ՀՀ հակակոռուպցիոն դատարան է ներկայացվել Մանվել Փարամազյանին պատկանող ապօրինի ծագում ունեցող գույքի բռնագանձման հայց»,- հայտնել են դատախազությունից՝ նշելով, որ ներկայացված հայցադիմումի համաձայն՝ պահանջվում է Փարամազյաններից հօգուտ ՀՀ բռնագանձել Երևանում գտնվող 3 բնակարան, Քաջարանում գտնվող 2 բնակարան և 1 գազալցակայան, 2 տրանսպորտային միջոց; Բացի այդ, ըստ դատախազության, բռնագանձման են ենթակա 2 իրավաբանական անձանց բաժնեմասեր, ինչպես նաև՝ ներդրված 3 ավանդներ՝ ընդհանուր շուրջ 5,5 մլն ՀՀ դրամի չափով։ Բռնագանձման է ենթակա նաև 1 միլիարդից ավելի ՀՀ դրամ՝ որպես ապօրինի եկամտի մնացորդի և օրինական եկամուտներով չհիմնավորվող բարեխիղճ երրորդ անձանց փոխանցված դրամի հանրագումար։

«2024թ օգոստոսի 1-ին ՀՀ գլխավոր դատախազություն է ստացվել ՀՀ հակակոռուպցիոն դատարչանի դատավոր Ա․ Ղարսլյանի կողմից թիվ ՀԿԴ/0083/02/24 քաղաքացիական գործով 2024թ հուլիսի 30-ին կայացված «Հայցադիմումը վարույթ ընդունելու մասին» որոշումը»,-նշել են դատախազությունից։

Հեղինակ՝ Իզաբել Սահակյան

Աղբյուր` Փաստինֆո