Փաստ ինֆո

ՀՀ գործող իշխանության առաջարկած «Խաղաղության» պայմանագիրն իրականում ոչնչի մասին է։ ԱԺ-ում այսօր նման հայտարարությամբ է հանդես եկել ՀՀ ԱԺ «Հայաստան» խմբակցության պատգամավոր Աննա Գրիգորյանը։

Արձանագրելով, որ պայմանագրի նախագիծը գաղտնի է պահվում հանրությունից՝ Ա. Գրիգորյանը արձանագրել է, որ այս պահին հայտնի է, թե ինչ կետեր չկան ներառված պայմանագրում։

«Միացյալ Նահանգները, Ֆրանսիան, ՌԴ -ն, բազմաթիվ այլ երկրներ խոսում են արցախցիների իրավունքի վերադարձի մասին, իսկ  Հայաստանը Ադրբեջանի կառավարության հետ խաղաղության մասին պայմանագիր է ստորագրում և դրան որևէ անդրադարձ չի կատարում։ Հաջորդը  գերիների հարցն է։ Այսօր Բաքվի բանտերում Արցախի ռազմաքաղաքական ղեկավարությունն է և տասնյակ ՀՀ քաղաքացիներ, ովքեր ռազմաճակատ են գնացել այդ թվում Նիկոլ Փաշինյանի հորդորով, կոչով։ Նիկոլ Փաշինյանը մեր քաղաքացիներին ռազմաճակատ ուղարկել կարո՞ղ է, բայց պայմանագիր ստորգրելուց չի՞ կարողանում կետ ներառել, որ մեր հայրենակիցները վերադառնա՞ն, ինչու ներառված չէ այդ հարցը»,- հայտարարեց Աննա Գրիգորյանը։

Ավելին, ըստ նրա, ճանապարհների ապաշրջափակման հարցը դուրս է եկել պայմանագրից ու ընդամենը մի կոնտեքստում է քննակվում, թե Նախիջևան- Ադրբեջան կապի վերահսկողությունն ում է պատկանելու։

«Սա ուղղակի աբսուրդ է, այսքանով հանդերձ նույնիսկ երաշխավոր չկա այդ փաստաթղթին»,- ընդգծեց պատգամավորը՝ ավելացնելով, որ այդ փաստաթուղթը ուզում են ստորագրել միայն նրա համար, որ  վերևում գրված լինի «Խաղաղության պայմանագիր» ու Նիկոլ Փաշինյանը բերի, ասի՝ «ժողովուրդ, ձեզ ասե՞լ էի , որ խաղաղություն եմ բերում, հեսա գրված է Խաղաղություն, հետո ի՞նչ , որ մեր քաղաքացիները Բաքվի բանտերում են, հետո ի՞նչ, որ ադրբեջանական զորքը մեր երկրի տարածքում է, իսկ մեր սահմանները փակ են, գրած է խաղաղություն»։

Աղբյուր` Փաստինֆո