Փաստ ինֆո

ՀՀ ՆԳ փոխնախարարը տեղյակ չէ, թե ինչու են քաղաքացիների մեքենաներն ամիսներ շարունակ պահվում ոստիկանության հատուկ պահպանվող տարածքում։

Հարցն ԱԺ-ի այսօրվա նիստում բարձրացրել է ՀՀ ԱԺ «Հայաստան» խմբակցության պատգամավոր Գառնիկ Դանիելյանը՝ «ՀՀ Ճանապարհային երթևեկության անվտանգության ապահովման օրենքում լրացումներ և փոփոխություններ կատարելու մասին» օրենքում փոփոխություններ ու լրացումներ նախատեսող օրինագծի քննարկման ժամանակ, որով նախատեսվում է կանոնակարգել ինքնագլորների ոլորտը։

Գառնիկ Դանիելյանը ՆԳՆ փոխնախարար Դավիթ Համբարյանից հետաքրքրվեց, թե ինչ հիմքով են 3 տասնյակ մեքենաներ պահվում Ոստիկանության հատուկ պահպանվող գոտում արդեն շուրջ 3, 5 ամիս։ Պատգամավորը հայտնեց, որ գրավոր հարցում եւս ուղարկել է, սակայն հոդաբաշխ պատասխան չի տրվել, իսկ բանավոր հարցմանը մի պաշտոնյա, որի անունը Գ. Դանիելյանը ձեռնպահ մնաց նշելուց, ասել է, թե այդ մեքենաները կպահվեն այնքան, որքան ինքը հարկ կհամարի։

«Իրավական պետությունում Դուք ինչպե՞ս եք պատկերացնում մեքենաները տարվեն Հատուկ պահպանվող տարածք, այդ թվում՝ այդ մեքենաներից շատերը այդ մարդկանց համար ապահովում էին իրենց հանապազօրյա հացը։Ի՞նչ խնդիր եք լուծում կամ ո՞ր իրավական հիմքով է 3,5 ամիս այդ մեքենաները այնտեղ պահվում։ Այդ պատասխանն էլ բարոյական չեմ համարում, ինչքան կուզենք էդքան կպահենքը ո՞րն է», - ասաց Դանիելյանը։

Փոխնախարարը հայտարարեց, թե տեղյակ չէ հարցին։ «Դուք նշեցիք, որ ոչ միայն բանավոր եք հարցրել, այլև գրավոր։ Գրավոր դիմել եք, գրավոր կպատասխանեն այդ հարցին», - ասաց ՆԳՆ փոխնախարար Դավիթ Համբարյանը։

Աղբյուր` Փաստինֆո