Փաստ ինֆո

ՀՀ վարչապետ Նիկոլ Փաշինայնը միշտ տեղյակ է եղել, թե Արցախի Հանրապետությունում ինչ է կատարվում, իրենն է եղել նաև 2023 թվականի սեպտեմբերի 19-ին չօգնելու որոշումը, երբ Ադրբեջանը սանձազերծեց ագրեսիա, Արցախի դեմ սկսեց պատերազմ և վերջին ցեղասպանական գործողությունները։ «Փաստինֆո»-ին ասել է Արցախի Հանրապետության ԱԺ պատգամավոր Մետաքսե Հակոբյանը:

Նրա հավաստմամբ՝ Արցախի Հանրապետության նախկին նախագահ Արայիկ Հարությունյանը երբևէ Նիկոլ Փաշինյանից գաղտնիք չի պահել, նա հաճախ ասել է, որ ցանկացած հարց, գործողություն, գործընթաց՝ Արցախի հետ կապված, քննարկվում է ՀՀ վարչապետի հետ:

Տիկին Հակոբյանի փոխանցմամբ՝ ինքը եւս բազմիցս հորդորել է Արայիկ Հարությունյանին, այդ թվում ԱԺ շենքում, չհեռարձակվող նիստերի ժամանակ, որպեսզի նա որոշումներ կայացնի ինքնուրույն, սակայն Ա. Հարությունյանը մշտապես նշել է, ինչպես իր խոսքերը մեջբերեց Մ. Հակոբյանը, որ որոշումները կայացվում են համատեղ:
«Մի փոքր նրա խոսույթը փոխվեց վերջին ժամանակներում, ճիշտ կլինի, եթե ասեմ, որ երբ ՀՀ ԱԺ բարձրադիր ամբիոնից Նիկոլ Փաշինյանը հայտարարեց, որ հարկավոր է Արցախի նշաձողը իջեցնել, դրանից հետո արդեն Արայիկ Հարությունյանը փոխեց իր խոսույթը: Որքան օղակը սեղմվում էր Արցախի շուրջ, այնքան նա իր խոսույթը փոխում էր»,- ասաց Մետաքսե Հակոբյանը:

«Ա.Հարությունյանն ասում էր, թե իր խոսակցություններն արդեն Նիկոլ Փաշինայնի հետ լավ ավարտ չէին ունենում, ասում էր, թե Հայաստանի իշխանություններն՝ ի դեմս ՀՀ վարչապետի, ասում են հեռու մնացեք մեզնից, մեզ հետ գործ չունեք, Ձեր հարցերն ինքներդ լուծեք:Մենք այլևս չկանք այդ ամենի մեջ:Սա ես ասում եմ բառացի, ինչը ինքը իր հեռախոսազրույցներից կամ հանդիպումներից հետո մեզ հետ կիսվում էր ԱԺ դահլիճում: Անգամ, երբ այլեւս Արայիկ Հարությունյանը չէր նախագահը, այլ Սամվել Շահրամանյանը, միեւնույն է, Նիկոլ Փաշինյանն տեղյակ էր Արցախում տեղի ունեցած վերջին իրադարձություններից։ Նաև 2023-ի սեպտեմբերի 19-ին Ադրբեջանի սանձազերծած պատերազմի ու ցեղասպանական քայլերի մասին էր տեղյակ ու օգնությունը մերժելու որոշումը ևս իրենն է եղել»,- ասաց արցախցի պատգամավորը։

Աղբյուր` Փաստինֆո