Փաստ ինֆո

Երևանի ընդհանուր իրավասության քրեական դատարանում՝ դատավոր Տաթևիկ Գրիգորյանի նախագահությամբ, այսօր շարունակվել է ՍԴ նախկին նախագահ, ՍԴ դատավոր Հրայր Թովմասյանի գործով դատավարությունը։ Պաշտպան Արամ Օրբելյանն այսօր ավարտեց պաշտպանական ճառը՝ միջնորդելով արդարացնել Հրայր Թովմասյանին։ Օրբելյանը, ներկայացնելով փաստարկները, հիշեցրեց, որ Հրայր Թովմասյանի անձեռնմխելիությունը չի հաղթահարվել։ Նա նկատեց՝ Թովմասյանի անձեռնմխելիության՝ ինչպես 2005, այնպես էլ 2015 թվականի Սահմանադրություններով հաղթահարված չլինելու հանգամանքներում, քրեական գործը ոչ իրավաչափ հարուցված լինելու հանգամանքում, ինչպես նաև՝ Հրայր Թովմասյանի կողմից ինչ-որ արարքը կատարելու հանգամանքը հաստատված չլինելու, հանցակցությունը հստակ սահմանված չէ և մեղադրանքը չի համապատասխանում պայմաններին, նոր մեղադրանք չլինելու պայմաններում, պետք է կայացվի արդարացման դատավճիռ։ Ինչ վերաբերում է դատավորին ինքնաբացարկի միջնորդությանը, որը Օրբելյանը ցանկանում էր ներկայացնել ավելի վաղ, սակայն դատարանը թույլ չէր տալիս, ապա միջնորդությունը Օրբելյանը չներկայացրեց։

Հաջորդիվ՝ պաշտպանական ճառով հանդես եկավ պաշտպան Միհրան Պողոսյանը՝ նշելով, որ սույն գործով «քրեական գործ» եզրույթն օգտագործում է վերապահումով։ Միհրան Պողոսյանը հիշեցրեց քրեական գործով հարուցման և քննության ընթացքում Փաշինյանի և ՔՊ-ականների հրապարակային ելույթները, որով նրանք հայտարարել էին, թե իբրև Թովմասյանը հանցանքներ է կատարել, ընդ որում, մինչ այս քրեական գործով որոշ դրվագների հանրայնացումը, ինչով Փաշինյանը չարաշահել է պաշտոնեական դիրքը, դուրս գալիս իր լիազորությունների շրջանակներից և միջամտել իրավապահների սահմանադրական լիազորությունների իրականացմանը։ Ըստ Պողոսյանի՝ նման վարքագծով Փաշինյանը փորձել է ազդեցություն ունենալ նաև այս գործով դատավորների վրա։

«Նիկոլ Փաշինյանի հայտարարությունների ուղղվածությունը և գործողությունների բնույթը թույլ են տալիս եզրակացնելու, որ ՀՀ ՍԴ նախագահ Հրայր Թովմասյանի դեմ ապօրինի գործընթացներ հրահրելով, ուղղորդելով՝ բացահայտ փորձ է արվում Սահմանադրությամբ չնախատեսված եղանակով տիրանալ ՍԴ լիազորություններին և վերացնել պետական իշխանությունը»,- ասաց Պողոսյանը՝ հիշեցնելով, որ քրեորեն պատժելի է սահմանադրական կարգի տապալումը և իշխանության զավթման կոչերը, որոնք բազմիցս են եղել։

Դատական այսօրվա նիստում Հրայր Թովմասյանը ճառով հանդես չեկավ։ Դատական հաջորդ նիստը նշանակվել է սեպտեմբերի 9-ին ժամը 13։00-ին։ Նիստի ավարտից հետո լրագրողների հետ զրույցում Հրայր Թովմասյանը նշեց, որ շարունակում է իրականացնել իր պաշտպանությունը։

«Ցանկացած մարդու պայքարն ու ակնկալիքը արդարության հասնելու համար է, կլինի իմ, թե ուրիշի գործով։ Իմ կյանքի վերջին 10-15 տարին եղել է հրապարակյին, չասեմ պայքար, այն եղել է աշխատանք արդարության համար»,-ասաց Հրայր Թովմասյանը՝ նշելով, որ իր գործով էլ չի կարող այլ բան ակնկալել՝ անկախ դատավորի ցուցաբերած վարքագծից ու որոշումներից․ «Թե ինչ որոշում կընդունվի, դրանից աշխարհը շուտ չի գա։ ամեն ինչ ունի իր երկորրդ խաղակեսը։ Եվ երկրորդ խաղակեսում շատ ու շատ բաներ կարող են փոխվել»։

Հիշեցնենք, որ ՍԴ նախկին նախագահ, ՍԴ դատավոր Հրայր Թովմասյանի վերաբերյալ քրեական գործը Երևանի ընդհանուր իրավասության դատարանի դատավոր Տաթևիկ Գրիգորյանի վարույթում է 2020թ․ մարտ ամսից։ Թովմասյանը մեղադրվում է ՀՀ քրեական օրենսգրքի (2003թ․) 308-րդ հոդվածի հատկանիշներով՝ պաշտոնեական լիազորությունները չարաշահելու մեջ։

Նույն քրեական գործով մեղադրյալի կարգավիճակում է նաև Թովմասյանի սանիկը՝ Նորայր Փանոսյանը, որը մեղադրվում է ՀՀ ՔՕ-ի (2003թ․) 308-րդ հոդվածի 2-րդ մասով, այն է՝ պաշտոնեական լիազորությունները չարաշահելը, որն անզգուշությամբ առաջացրել է ծանր հետեւանքներ։ Փանոսյանի վերաբերյալ դրվագը դատարանը բոլորովին վերջերս առանձնացրել է՝ նշելով, թե նրա առողջական խնդիրների պատճառով դատական նիստերը պարբերաբար հետաձգվում են։

Հեղինակ՝ Իզաբել Սահակյան

Աղբյուր` Փաստինֆո