Փաստ ինֆո

Նիկոլ Փաշինյանի հերթական հայտարարությունն է, որով արցախցիները պետք է պատժվեն՝ իրենց ազգային ազատագրական պայքարում հերոսական կեցվածքի պատճառով։ Այդ հայտարարությունը հակապատմական է, հակաքաղաքական, հակաիրավական և հակաիրական է, նրա հայտարարությունները միշտ արտացոլում են թույլ պատկերացումները և գաղափարախոսությունները։ Այս մասին «Փաստինֆո»-ի հետ զրույցում ասաց ՀՀ առաջին ՄԻՊ Լարիսա Ալավերդյանը՝ անդրադառնալով Նիկոլ Փաշինյանի հայտարարությանը, թե անիրատեսական է արցախցիների վերադարձը Արցախ։

«Երբևէ նրա հայտարարություններում չի կարելի փնտրել որևէ մի օբյեկտիվություն, դրանք բոլորն արտացոլում են իր ներքին աշխարհը՝ իր համոզմունքներով, այդ բոլոր բարդույթներով ծանրաբեռնված, բայց որևէ առումով դրանք չեն արտացոլում իրականությունը կամ պատմության տրամաբանությունը, ապագայի ծրագրեր, այդտեղ պետք չէ փնտրել դա, չկա։ Դա զուտ իր ողջ առողջ պատկերացումների արգասիքն է»,- ասաց Լարիսա Ալավերդյանը։

Հարցին՝ արդյո՞ք Փաշինյանի այս հայտարարությունը չի ենթադրում, որ ՀՀ-ն ևս չի կատարում Հաագայի դատարանի որոշումը, ինչպես՝ Ադրբեջանը, Ալավերդյանը պատասխանեց՝ նշելով, որ այդ հայտարարությունն ամբողջությամբ հակասում, հակադրվում է միջազգային իրավունքի հիմնարար սկզբունքներին և նորմերին, որովհետև որևէ մեկը չի կարող մերժել՝ պատճառով, թե իրականանալի չէ։

«Եթե մենք վերցնում ենք իրավական դաշտում, ապա դա պարտավորություն է՝ ոչ միայն ՀՀ-ի, Ադրբեջանի կողմից, այլև՝ միջազգային հանրության, որովհետև միջազգային հանրությունը պատասխանատու է բռնի տեղահանված անձանց վերադարձի համար»,- ասաց Լարիսա Ալավերդյանը՝ նշելով, որ բոլոր հայտարարությունները, ծրագիրը, որով եկել է այդ անձը՝ իր թիմի հետ՝ ամբողջովին խոսում է այն մասին, որ եկել են զուտ Արցախն օր առաջ՝ ամբողջովին կամ մաս-մաս՝ Ադրբեջանին հանձնելու, հայտարարելու, որ Ադրբեջանին երբևէ չպատկանող տարածքները պատկանում են Ադրբեջանին։
«Դա ամբողջովին հակասում է բոլոր պարտավորություններին, որոնք կրում է Հայաստանը՝ որպես ԵԱՀԿ Մինսկի խմբի համանախագահների շրջանակներում իր վրա դրված պարտականությունները, այն է՝ պատասխանատվություն Արցախի անվտանգության, արցախահայության, բոլոր մարդկային իրավունքների պաշտպանության համար»,- ընդգծեց Ալավերդյանը։

Ինչ վերաբերում է միջազգային ատյաններում Ադրբեջանի դեմ ներկայացված հայցերից հրաժարվելու քննարկումներին, ապա Ալավերդյանը նշեց, որ ենթադրություններ չի ցանկանում մեկնաբանել, սակայն նկատեց՝ տեսականորեն՝ դա աննախադեպ բնույթ կկրի միջազգային պրակտիկայի համատեքստում, որը ամբողջովին համընկնում է այս թիմի գաղափարախոսության հետ։

Լարիսա Ալավերդյանը, ամփոփելով զրույցը, նշեց, որ ամոթալի կլինի, եթե հայությունը հրաժարվի արցախահայության իրավունքների պաշտպանությունից։ Ալավերդյանը հիշեցրեց Միջազգային քրեական դատարանի նախկին գլխավոր դատախազ Լուիս Մորենո Օկամպոյի հայտարարությունը, որով վերջինս արդեն որերորդ անգամ կոչ է արել հայերին՝ տեր կանգնել արցախահայության, հայերի իրավունքների համար։

«Չենք կարող ասել՝ մեղավորը այս կամ այն կողմից է, ամբողջ պատասխանատվությունը հենց կրում է հայությունը, Հայաստանը, Արցախը՝ հանձինս իր իշխանությունների և ժողովրդի։ Հորդորում եմ բոլորին՝ երբևէ չհոգնել այդ ճանապարհով գնալուց ՝ նվաճումների ակնկալիքով և նվաճումների հասնելով»,- ընդգծեց Լարիսա Ալավերդյանը։

Հեղինակ՝ Իզաբել Սահակյան

Աղբյուր` Փաստինֆո