Փաստ ինֆո

Սյունիքի մարզի ընդհանուր իրավասության դատարանում՝ դատավոր Վարսենիկ Մելքոնյանի նախագահությամբ, կայացել է Գորիսի քաղաքապետ Առուշ Առուշանյանի պատիժն ազատազրկմամբ փոխելու մասին Պրոբացիայի ծառայության միջնորդության քննությունը։

«Փաստինֆո»-ի հաղորդմամբ՝ դատախազության  ներկայացուցիչը դատարանում ներկայացրեց վերաբերյալ իր դիրքորոշումը։ Առուշ Առուշանյանի պաշտպան Սերգեյ Մարաբյանն ուշադրություն հրավիրեց այն հանգամանքին, որ նախևառաջ պետք է պարզել՝ որ օրենսգիրքն է այս դեպքում կիրառելի, քանի որ անձի կարգավիճակը վատթարացնող նորմը հետադարձ ուժ ունենալ չի կարող։ Առուշանյանը դատապարտվել է 2003թ․ օրենսգրքով՝ 2022թ․, դատավճիռը՝ օրինական ուժ ստացել 2024թ․, մինչդեռ, 2003թ․ քրեական օրենսգրքի 52-րդ հոդվածում չկա հասկացություն՝  խուսափել պատժի կրումից, նույն օրենսգրքով չկա նաև կանոն, որ եթե անձը խուսափում է որևէ պատժի կրումից, ապա այն կարող է փոխարինվել որևէ այլ պատժատեսակի, իսկ նոր քրեական օրենսգիրքը բոլորովին այլ կարգավորումներ է որդեգրել, այս դեպքում՝ անձի կարգավիճակը վատթարացնող։ 

«Ստացվում է՝  այսօր նոր օրենքով, որը անձի վիճակը վատթարացնող կանոններ է սահմանել, վերցնում և առաջնորդվում են նորմերով և նախկին օրենսգրքի գործողության ժամանակ կատարված արարքի նկատմամբ խիստ օրենքը հետադարձության կարգով կիրառելու միջնորդություն են ներկայացրել»,- ասաց Մարաբյանը՝ նշելով, որ այս առումով միջնորդությունը ենթակա է մերժման։

Բացի այդ, նա հիշատակեց նաև Վճռաբեկ դատարանի դիրքորոշումը, որ Քրեակատարողական նոր օրենսգրքի կիրառման պարագայում, միևնույն է, ելակետը մնում է հանցանքը կատարելու պահին գործող օրենքը։

«Նախկինում, եթե խուսափեր, չէր կարող քննարկվեր պատիժը փոխարինելու հարց, նոր օրենսգրքի կանոնները կիրառելի չեն։ Երկրորդը՝ ինչ պետք է անի։ Քննարկում են, ասում՝ հրաժարական ներկայացնի, բայց հրաժարական ներկայացնելու ոչ հիմքեր կան, ոչ պայմաններ կան, ինքն է որոշում, օրենսդիրը սահմանում է, որ անձն է որոշում՝ հրաժարվել, թե՝ ոչ։ Ստացվում է իրավիճակ՝ կոնկրետ իրավիճակում ընտրովի պաշտոն զբաղեցնելու իրավունքից զրկելու կառուցակարգ չկա, ինչը փորձում են մեկնաբանել հետևյալ կերպ՝ կամ հրաժարական պետք է ներկայացնի, կամ անվստահություն հայտնեն, այլընտրանքը՝ ազատազրկումն է։ Սա հակաիրավական, ժողովրդավարության սկզբունքի հետ առնչություն չունեցող, իրավունքի գերակայության սկզբունքին հակասող իրավիճակ է; Չի կարող լինել մի իրավիճակ, երբ անձի վրա փորձ է արվում դնել մի պարտականություն, որն օրենքով ամրագրված չէ»,- ընդգծեց Մարաբյանը՝ Առուշանյանը պետք է շարունակի պաշտոնավարել, քանի որ օրենքով ամրագրված չէ, որ համայնքի ղեկավարին կարելի է դատավճռով պաշտոնանկ անել, չկա նման կարգավորում, ցանկացած մեկնաբանություն իրավունքից դուրս է։ Նրա խոսքով՝ դատապարտյալի պարտականություն չկա, չկա օրենսդրական կարգավորում՝ լիազորությունների դադարեցման մասին, հետևաբար, միջնորդությունը բավարարել հնարավոր չէ տեխնիկապես։ Բացի այդ, խուսափելու դեպքում պատասխանատվության մասին է նախազգուշացվում, բայց դա չի ենթադրում պատժի տեսակի փոփոխություն։
Միջնորդության քննությունն այսօր չավարտվեց։ Դատական նիստը հետաձգվեց՝ մինչև սեպտեմբերի 10-ը՝ ժամը 11։00-ն։

Հիշեցնենք, որ Սյունիքի մարզի ընդհանուր իրավասության դատարանը՝ դատավոր Գնել Գասպարյանի նախագահությամբ, 2022թ․ մարտի 28-ին հրապարակել է Առուշ Առուշանյանի և մյուսների գործով վճիռը, որով Առուշանյանն արդարացվել է իրեն մեղսագրվող ընտրական հանցավոր ենթադրյալ արարքների դրվագով, իսկ մյուս դրվագով՝ մեղավոր ճանաչվել և դատապարտվել ազատազրկման՝ 1 տարի 6 ամիս ժամկետով, որին հաշվակցելով Առուշանյանի՝ ութ ամիս արգելանքի տակ գտնվելու ժամկետը, դատարանը որպես վերջնական պատիժ սահմանել է ազատազրկումը՝ 6 ամիս ժամկետով, որը պայմանականորեն չի կիրառվել. Դատարանն Առուշանյանի նկատմամբ փորձաշրջան է սահմանել 1.5 տարի ժամկետով, միևնույն ժամանակ, Առուշանյանի նկատմամբ որպես պատիժ է կիրառվել տուգանքը և 5 տարի ժամկետով ՏԻՄ ղեկավար պաշտոն զբաղեցնելու սահմանափակումը։ Արդարացվել են նաև Քարահունջ բնակավայրի ղեկավար Լուսինե Ավետյանը և ամբաստանյալներից ևս երկուսը՝ Սամվել Դինունցը և Հրայր Բաղդասարյանը, իսկ Էրիկ Աղաջանյանը և Հարութ Լալազարյանը՝ մեղավոր են ճանաչվել։ Դատական ակտի դեմ բողոքներ են ներկայացվել։ Վերաքննիչ հակակոռուպցիոն դատարանն անփոփոխ է թողել դատական ակտը, Վճռաբեկ դատարանը մերժել է վարույթ ընդունել բողոքը։ Ըստ այդմ, դատական ակտը մտել է օրինական ուժի մեջ։ Պրոբացիայի ծառայությունը դիմել է Գորիսի ավագանուն՝ Առուշանյանի լիազորությունները դադարեցնելու հարցով, սակայն ավագանին մերժել է միջնորդությունը՝ արձանագրելով, որ դա իրենց լիազորություններից չի բխում։

Արդյունքում՝ ԱՆ Պրոբացիայի ծառայության Սյունիքի մարզային մարմնում կազմվել է արձանագրություն Առուշանյանի կողմից պատժից խուսափելու մասին, և միջնորդություն է ներկայացվել ՀՀ Սյունիքի մարզի առաջին ատյանի ընդհանուր իրավասության դատարան՝ Առուշ Առուշանյանի նկատմամբ դատավճռով նշանակված պատիժը՝ 5 տարի պետական պաշտոն զբաղեցնելու իրավունքից զրկելը ազատազրկմամբ փոխարինելու, ինչպես նաև ազատազրկման ձևով պատիժը պայմանականորեն չկիրառելու վերաբերյալ որոշումը վերացնելու և պատիժը կրելու վերաբերյալ։ Միևնույն ժամանակ՝ բողոք էր ներկայացրել նաև Առուշ Առուշանյանը՝ Պրոբացիայի ծառայության գործողությունների դեմ, որը Սյունիքի մարզի ընդհանուր իրավասության դատարանի դատավոր Գոռ Գասպարյանի կողմից մերժվել է։

Հեղինակ՝ Իզաբել Սահակյան

Աղբյուր` Փաստինֆո