Փաստ ինֆո

Երևանում անվերջանալի թվացող անզուսպ կառուցապատման հետևանքով առաջացած խնդիրների մասին «Փաստինֆոն» զրուցել է Երևանի քաղաքապետարանի Քաղաքաշինական հատուկ ծրագրերի վարչության պետի պաշտոնակատար Ալիկ Վարդազարյանի հետ։

- Պարոն Վարդազարյան, ՀԷՑ –ից մեզ հետ զրույցում օրերս հայտնել են Երևան քաղաքում այս պահին մի Գյումրի, մի Վանաձոր, մի Աբովյան քաղաք է կառուցվում՝ թողունակության առումով, և սա չի կարող չազդել արդեն գործող բաժանորդների սպասարկման որակ վրա։ Արդյո՞ք շինթույլտվությունները տալիս ենթակառուցվածքները սպասարկող ընկերությունների հետ քննարկվում է, թե ինչ ժամկետներում և, առհասարակ, կարո՞ղ են ընկերությունները ապահովել այդ շենքերի, թաղամասերի սպասարկումը։

- Իհարկե քննարկվում են, ընդ որում՝ քննարկվում են ոչ թե շինթույլտվության տրամադրման փուլում, այլ երբ ներկայացվում է էսքիզային նախագիծ և ճարտարապետահատակագծային նախագիծ՝ դրանք տրամադրելու համար, դեռ քաղաքաշինական ծրագիրը չքննարկված՝ մենք փորձում ենք  հասկանալ՝ տեխնիկապես հնարավոր է դա իրականացնել, թե ոչ։ Համապատասխան մատակարար կազմակերպություններին թողունակության հնարավոր ծախսի վերաբերյալ հարցում ենք կատարում ՀԷՑ, «Գազպրոմ Արմենիա» և «Վեոլիա ջուր», եթե պատասխանը որևէ մատակարար կազմակերպության կողմից լինում է բացասական՝ հարցը չի քննարկվում։ Քննարկվում է միայն, երբ մատակարար կազմակերպությունները դրական պատասխան են տալիս, որից հետո էլ տրամադրվում է նախագծման թույլտվություն։

- ՀԷՑ-ից ասում են, որ լինում են դեպքեր, երբ իրենք ասում են, որ, օրինակ, միայն 2 տարի անց կարող են ապահովել միացումները, սակայն դա քաղաքապետարանի կողմից հաշվի չի առնվում։

- Նման դժգոհություն կամ պատասխան մեզ չի տրամադրվել, մեզ կամ տրամադրվում է դրական պատասխան, կամ՝ բացասական։  

- Գազի դեպքում էլ կան շենքեր, որ թեև նորակառույցներն արդեն շահագործվում են, սակայն շենքերում գազամատակարարում չունեն։ Եթե դրական պատասխան են տվել, ապա ինչու չեն կարողանում սպասարկում իրականացնել։

- Գազը՝ ի տարբերություն ջրի և հոսանքի, պարտադիր պայման չի, դիմումատուն կարող է ներկայացնի հաշվարկային հզորություն, որ առհասարակ հրաժարվում է գազից և իր ջեռուցումը կատարելու է բացառապես հոսանքի միջոցով կամ այլընտրանքային  տարբերակով։ 

-  Քանի որ նոր թաղամասերի, շենքերի կառուցումը անվերջանալի է թվում, թեև քաղաքն արդեն գերծանրաբեռնված է, հետևաբար, ուզում եմ հարցնել, կա՞ սահման, որից հետո քաղաքում նոր թաղամասերի կառուցումը դադարեցնել։ Խոսքը մաշված բնակֆոնդի վերակառուցման մասին չէ։ 

-  Քաղաքի թողունակության հետ կապված քննարկումներ անընդհատ լինում են քաղաքապետարանի ներկայացուցիչների և մատակարար կազմակերպությունների միջև, ու քաղաքի զարգացման համար փորձում են հնարավորություները, սահմանափակումները մեծացնել, հետևաբար, հնարավոր չէ ասել, թե դեռ որքան կարելի է կառուցել ու երբ կարող է դա ավարտվել։ Զարգացմանը զուգահեռ թողունակությունը պետք է բարձրացնել։

-  Պարոն Վադազարյան, շինթույլտվություններ տրվում են անգամ շատ փոքր ազատ տարածքների առկայության դեպքում, որտեղ կարելի էր շինարարության փոխարեն, օրինակ, կանաչապատում անել, կամ բակ սարքել։ Օրինակ Լենինգրադյան 23/11 շենքի հարևանությամբ նոր շենք է կառուցվում, որը փոքր տարածքի վրա, ընդ որում՝ շենքը զավթել է անգամ ճանապարհի երթևեկելի հատվածը ու հետիոտնի անցնելու հատվածը, ավելին այն, հարևան շենքերի տրամաբանությունից դուրս է։ Այսինքն, շինթույլտվությունները տալիս տարածքի շենքերի ճարտարապետական  ոճը հաշվի առնվո՞ւմ է, թե տեղ կա՝ կարելի է թույլ տալ։

-  Քննարկման վերջնական արդյունքը, թե ինչ ծավալի ու հարկայնության շինություն կարող է կառուցվել, դա համար պայմաններից մեկը տեղադիրքն է, փաստացի իրավիճակը, հողամասի մակերեսն է, նպատակային գործառնական նշանակությունը, այսինքն, մի շարք ֆակտորներ կան, որ հաշվի են առնվում։

 -  Այս դեպքում անգամ հետիոտնի անցման տեղ չկա, մարդիկ փողոցով են քայլում, ընդ որում՝ շինարարության ավարտից հետո էլ այն հնարավոր չի լինելու ունենալ, քանի որ շինությունը հասել է երթևեկելի գոտուն։

-  Այդ տարածքում առաջին անգամ կառուցապատման թույլտվությունը տրվել է 2006 թ-ին, այնուհետև, ևս մեկ անգամ 2019-ին նախագծման թույլտվություն է տրվել, խոսքը մեկ նկուղային, 5 վերգետնյա և 1 մանսարդային հարկերի մասին է։

-  Այս պահին արդեն 6 հարկ կառուցվել է ու շինարարությունը չի դադարում, ավելին, շինարարությունը պետք է ավարտվեր 2022-ին ու մինչև հիմա չի ավարտվել, ավելին, ամեն օր ճանապարհ են քանդում, հարևան շենքերը ջրից են զրկում, իսկ անձրևի դեպքում փողոցն անանցանելի է դառնում։

-  Ես հիշում եմ, որ եղել է հարկերի ավելացման դիմում կառուցապատողից, որը մերժվել է։ Ամեն դեպքում, կարծում եմ համապատասխան ստորաբաժանումները պետք է դրա վերաբերյալ լրացուցիչ ուսումնասիրություն անեն տեղում։

Աղբյուր` Փաստինֆո