Փաստ ինֆո

Հայաստանի կողմից վարվող քաղաքականության արդյունքում է, որ արցախցիների վերադարձի իրավունքի հարցը չի բարձրաձայնվում միջազգային ատյաններում ու այն քննարկման առարկա չի դարձել, բայց Տոյվո Կլաարի հայտարարությունը վկայում է այն մասին, որ որքան էլ փորձեն այդ հարցը շրջանցել՝ միևնույն է, արցախցիների վերադարձի իրավունքի հարցը առօրեական է անկախ նրանից, թե օրվա իշխանությունները ինչ են ուզում կամ ում՝ ինչ խոստում են տվել։ Այս մասին «Փաստինֆոյի» հետ զրույցում ասաց Արցախի Հանրապետության Ազգային Ժողովի պատգամավոր Դավիթ Գալստյանը։

Նա հիշեցրեց, որ Արցախի ԱԺ-ի կողմից ստեղծվել է Վարդան Օսկանյանի գլխավորությամբ հանձնախումբ, որի ջանքերի շնորհիվ այսօր այդ հարցը տարբեր հարթակներում բարձրաձայնվում է:

«Այս հարցը չի կարող փակվել, այն գնալով ավելի շատ հարթակներից է հնչելու»,-ասաց նա։

Անդրադառնալով Կլաարի` վերադարձի հարցի շուրջ ԼՂ հայերի՝ Բաքվի հետ ուղիղ բանակցությունների մասին դիտարկմանը, Գալստյանը նշեց, որ այսօր միակ միջազգային մանդատ ստացած խումբը ԵԱՀԿ Մինսկի խումբն է, որը լիազորություններ ունի Արցախի հակամարտության հարցում բանակցություններ իրականացնել։

«Արցախի անվտանգության երաշխավորը հանդիսացել և հանդիսանում էր Հայաստանի Հանրապետությունը, որը օրվա իշխանություններն այդ պարտականություններ չկատարեցին։ Այսօր էլ Ադրբեջանն ամեն ինչ անում է, որպեսզի լուծարի ԵԱՀԿ Մինսկի խումբը, սակայն ցավոք Հայաստանի իշխանության կողմից որևէ արձագանք չկա Ադրբեջանի իշխանություններին։ Մենք ամեն ինչ պետք է անենք, որ Արցախի հարցը բերվի բանակցային սեղան։ Իսկ միակ մանդատ ունեցող հարթակը Մինսկի խումբն է, որի սեղանին էլ օրվա իշխանությունները պետք է դնեն այդ հարցը՝ փորձելով վերակենդանացնել այդ հարթակը և սկսել բանակցություններ Արցախի ժողովրդի վերադարձի մասով։ Մնացած այլ որևէ հարթակում Հաագային միջազգային դատարանի որոշումները չկատարող երկրի հետ բանակցությունները կործանարար կարող են լինել», - արձանագրեց Արցախի պատգամավորը: 

Դիտարկմանը, թե Մինսկի խմբի անդամ հանդիսացող երկու պետությունները՝ ԱՄՆ-ն և Ֆրանսիան հակամարտության մեջ են խմբի երրորդ անդամ հանդիսացող պետության՝ ՌԴ-ի հետ, հետևաբար ինչպե՞ս է պատկերացնում, որ հնարավոր լինի վերագործարկել այդ ֆորմանտը՝ նա պատասխանեց, որ Արցախի հարցը կարող է լինել այն հենց այն խթանը, որի շնորհիվ կողմերը կրկին կնստեն բանակցային սեղանի շուրջ՝ տարածաշրջանում խաղաղություն հաստատելու օրակարգով։

«Ամեն դեպքում, Ադրբեջանի վարքագիծը իմանալով ուղիղ բանակցությունների, առանց միջնորդի չպետք է գնալ, քանի որ Ադրբեջանը այն երկիրը չէ, որ իր խոստումները կատարի։ Այս հարցում բազմիցս համոզվել ենք»։

Հարցին, թե ինչ միջազգային երաշխիքների ներքո է հնարավոր արցախցիների վերադարձը՝ նա նշեց, որ երբ լինեն բանակցություններ՝ բոլոր հարցերը, պետք է դառնան բանակցությունների թեմա։ «Նախ պետք է սկսել բանակցությունները, խոսել արցախցիների իրավունքների մասին, կարգավիճակի մասին, ապա միայն հստակեցնել, թե ինչ անվտանգային միջավայրում է հնարավոր մեր վերադարձը։ Այդ հարցերը չեն կարող առանձին - առանձին քննարկվել, բոլոր այդ հարցերը պետք է քննարկվեն փաթեթային։ Քանի դեռ չկան բանակցություններ՝ շատ անիրատեսական է խոսելն այն մասին, թե ինչ միջազգային երաշխիքների ներքո է հնարավոր վերադարձը»։

Աղբյուր` Փաստինֆո