Փաստ ինֆո

Երևանի ընդհանուր իրավասության քրեական դատարանում` դատավոր Կարեն Ֆարխոյանի նախագահությամբ, այսօր շարունակվել են ՀՀ երկրորդ նախագահ Ռոբերտ Քոչարյանի որդու` Լևոն Քոչարյանի և Սերգեյ Ասատուրովի գործով դատալսումները:

Հիշեցնենք, որ 2023թ․ սեպտեմբերի 22-ի ոստիկանության ծառայողները դաժան ծեծի ենթարկելով բերման են ենթարկել անհնազանդության ակցիաներին մասնակցող Լեւոն Քոչարյանին։ Վնասվածքների հետևանքով Լևոն Քոչարյանը տեղափոխվել էր հիվանդանոց։ Նույն օրը հայտնի դարձավ, որ Լ. Քոչարյանը ձերբակալվել է՝ ոստիկանության 4 ծառայողի՝ «բերետավորի», նկատմամբ իբրև բռնություն գործադրելու համար։ Վարույթն իրականացնող մարմինը մեղադրանք է ներկայացրել, ապա՝ կալանավորման միջնորդությամբ դիմել դատարան, որը բավարարվել է։ Լևոն Քոչարյանն ազատ է արձակվել կալանքից՝ ԱԺ պատգամավոր դառնալուց հետո։ Նախաքննության ավարտական փուլում Լևոն Քոչարյանի մեղադրանքը փոփոխվել է։ Մեղադրանք է ներկայացվել նաև Սերգեյ Ասատուրովին։

«Փաստինֆո»-ի հաղորդմամբ` այսօրվա նիստում դատարանում հետազոտվել են գործում առկա տեսագրությունները` Լևոն Քոչարյանի ձերբակալման կադրերի վերաբերյալ: Պաշտպանության կողմը պնդում է`իրենց պաշտպանյալը որեւէ հակաիրավական գործողություն չի արել, եւ, որ սա քաղաքական հետապնդում է նրա նկատմամբ, ավելին` տեսագրություններում հստակ երևում է, որ ոստիկանները հատուկ ուժ են կիրառել Լևոն Քոչարյանի նկատմամբ` սկսած խեղդելու հնարքից: Պաշտպան Էրիկ Ալեքսանյանը նկատեց` երբ Սերգեյ Ասատուրովը և Լևոն Քոչարյանը մոտեցել են, ոստիկանները պարզապես կանգնած են եղել, որևէ հակաիրավական գործողություն, Ոստիկանության ծառայողների օրինական գործունեությանը միջամտելու որևէ գործողություն չեն իրականացրել:

Պաշտպան Արամ Վարդևանյանն էլ կարևորեց, որ տեսանյութերում ևս արձանագրված է, որ մխրճվելու որևէ գործողություն չի արվել, ավելին, լսելի են քաղաքացիների ձայներ, միևնույն ժամանակ, չի լսվում ոստիկանության օրինական պահանջ, վերջիններս անգամ բառ չեն ասում, սկսում են պարզապես բերման ենթարկել և այդ ընթացքում ակտիվ գործողություններով աչքի է ընկնում գործով տուժող ոստիկաններից մեկը: Հայտարարությամբ հանդես եկավ նաև Լևոն Քոչարյանը` նշելով, որ տեսանյութերը ևս մեկ անգամ ցույց են տալիս այս գործի աբսուրդ լինելը։

«Մենք արդեն երկրորդ տեսանյութն ենք դիտում, արդյո՞ք որևէ մեկը իմ կողմից բռնություն տեսավ` ոչ, ևս մեկ անգամ` ոչ, որովհետև նման բաներ չեն եղել։ Պարզ տրամաբանությունը հուշում է, որ եթե կան ցուցմունքներ և դրանք իրար հակասում են, ապա կա տեսանյութ, նայում ես՝ հասկանալու համար, թե ի վերջո ո՞րն է չափազանցնում։

Այս տեսանյութերը նայելուց հետո մեղադրողը ինչպե՞ս է գրում, թե «եղել է օրինական պահանջ», «մենք մխրճվել ենք», «հարվածքներ ենք հասցրել», երբ ակնհայտ երևում է՝ նման բան չի եղել։ Եթե մի բանը սուտ է, ասում ենք, որ սուտ է։ Ձեր վիրավորանքը մեր նկատմամբ այս ամբողջ գործողությունն է»,- նշեց նա։

Հեղինակ՝ Իզաբել Սահակյան

Աղբյուր` Փաստինֆո