Փաստ ինֆո

«Դատարանի համար զարմանք էր այս միջնորդությունն այս հիմքով ներկայացնելը»․ դատավոր Արման Հովհաննիսյանը մերժեց Վազգեն Սաղաթելյանի և Նարեկ Սամսոնյանի գործող հանրային մեղադրողների ներկայացրած բացարկի միջնորդությունը

«Իմնեմնիմի» փոդքաստի հեղինակներ Նարեկ Սամսոնյանի և Վազգեն Սաղաթելյանի գործը կշարունակվի քննվել Երևանի ընդհանուր իրավասության քրեական դատարանի դատավոր Արման Հովհաննիսյանի նախագահությամբ, թեև դատախազությունը փորձում էր մեղադրյալներին չկալանավորելու որոշումը կայացրած դատավորին ստիպել՝ հեռանալու վարույթից։ Դատարանը մերժեց դատախազների միջնորդությունը։

«Փաստինֆո»-ի հաղորդմամբ՝ դատական նիստի մեկնարկին նախագահողը հայտնեց, որ գրություն է ստացվել ՀՀ ԱՆ Պրոբացիայի ծառայությունից, համաձայն որի՝ կառույցը չի կարող վերահսկել մեղադրյալների վարքագիծը, քանի որ առկա չէ գործիքակազմը։ Դատարանը հարցում-պարզաբանում է ուղարկել Պրոբացիայի ծառայությանը՝ արձանագրելով, որ գործիքակազմի չլինելը չի կարող մեկնաբանվել ի վնաս մեղադրյալի։ Ինչպես նաև՝ դատարանը խնդրել է պարզաբանել, թե տնային կալանքի և վարչական հսկողության դեպքում, երբ կիրառվում է սահմանափակումներ՝ համացանցի հասանելիության, շփումների, ինչ գործիքակազմ է կիրառվում, օրինակ, ինչ գործիքակազմ կարող է լինել, օրինակ, ուղիղ եթերներին հետևելու համար և, ի վերջո, ում պատասխանատվության տիրույթում է գտնվում կատարման համար համապատասխան միջոցները։ Նշված գրությունների հրապարակումից հետո հանրային մեղադրողը միջնորդություն ներկայացրեց՝ դատավորին բացարկ հայտնելու մասին՝ իբրև թե կասկածի տակ դնելով դատավորի անկողմնակալությունը։ Հատկանշական է, որ հանրային մեղադրողը միջնորդությամբ անդրադարձել է Պրոբացիայի ծառայության գրությանը, որն իբրև նախորդ նիստում պետք է հրապարակվեր, անդրադարձ կատարվեր, քննարկվեր, սակայն այս մինչ այդ գրությանն անդրադառնալը որոշել է մեղադրյալների նկատմամբ կալանքի միջնորդությունը մերժել։ Նախագահողը, սակայն, այս առնչությամբ նկատեց, որ գրությունը ստացել էր հենց նախորդ հրատապ նիստի օրը, բացի այդ, այդ նիստին քննարկվել է խափանման միջոցի պայմանի խախտել-չխախտելու հարցը, ուստի, Պրոբացիայի ծառայության գրությունը կարող է վերաբերել դատարանի նախորդ որոշման հիմնավորվածության հարցին, հետևաբար, պայմանի ենթադրյալ խախտման հարցին վերաբերելի չէ։ Դատարանը նկատեց՝ նախորդ որոշման օրինականության հարցը կարող է քննարկվել միայն վերադաս ատյանում։ Պաշտպանության կողմը ներկայացված բացարկի միջնորդության դեմ առարկեց։

Լսելով կողմերին՝ նախագահողը մերժեց միջնորդությունը։

«Անկեղծ՝ դատարանի համար զարմանք էր այս միջնորդությունն այս հիմքով ներկայացնելը, որովհետև շատ լավ եմ ճանաչում երկու հանրային մեղադրողներին էլ, շատ վաղուց, երկուսն էլ պրոֆեսիոնալ են։ Դատարանը գտնում է, որ քրեական դատավարության օրենսդրությունը պասիվ դատավարական ընթացակարգից անցում է կատարել ատիվ ընթացակարգի։ Թե ինչու է այդպես, զուտ դատարանի գնահատականը չէ։ Նախորդով դատարանից պահանջվում էր, որ բոլորին լսեն, հետո առանձին խորհրդակցական սենյակում որոշում կայացնել, իսկ ներկայիս քրեական դատավարության օրենսգիրքն ուղիղ նշում է՝ բացառապես գործը լուծող ակտերն է կայացվում առանձին սենյակում, որը վերաբերում է վերդիկտին, գործը կարճելուն և այլն։ Խափանման միջոցի հետ կապված ուղիղ ասվում է՝ պետք է լսել կողմերի կարծիքները և կայացնել որոշում»,- ասաց դատավոր Արման Հովհաննիսյանը։

Հիշեցնենք, որ մարտի 22-ին Նարեկ Սամսոնյանը և Վազգեն Սաղաթելյանը ձերբակալվել, ապա՝ կալանավորվել են իրենց հեղինակային «Իմնեմնիմի» հաղորդաշարում Փաշինյանի հասցեին հնչեցված գնահատականի համար։ Ընդ որում՝ նրանց մեղադրանք է ներկայացվել ՀՀ քրեական օրենսգրքի 297-րդ հոդվածի 2-րդ մասի 1-ին և 3-րդ կետերի հատկանիշներով, այն է՝ խուլիգանությունը, որն իրականացվել է մի խումբ անձանց կողմից՝ տեղեկատվական կամ հաղորդակցական տեխնոլոգիաներն օգտագործելով։ Մասնագիտական հանրությունը այս հետապնդումը քաղաքական է գնահատում՝ նշելով, որ սա քայլ է՝ խոսքի ազատության դեմ։ Ընդ որում, այսպես կոչված, «համացանցային խուլիգանության» հոդվածը, կարելի է ասել, նույնական է «ծանր վիրավորանքի» հոդվածին, որն այս իշխանությունների «նորամուծությունն» էր և հեռացվեց ՝ միջազգային կառույցների ճնշումների ներքո։

Հեղինակ՝ Իզաբել Սահակյան

Աղբյուր` Փաստինֆո